Naghahapot an mga Parabasa

Tunay daw an Diablo?

Iyo, itinotokdo kan Biblia na si Satanas na Diablo talagang tunay na persona. Minsan siring, tinutuyatuya kan mga kritiko kan Biblia an siring na paglaladawan sa Diablo. Sinasabi ninda na si Satanas nagrerepresentar sana sa prinsipyo nin karatan na nasa laog nin mga tawo.

Maninigo daw niatong ipagngalas an karibarawan mapadapit sa tunay na midbidan ni Satanas? Dai nanggad. Bilang ilustrasyon: Puedeng haleon nin sarong kriminal an marka kan saiyang mga moro sa pinangyarihan nin krimen tanganing ikatago nia an saiyang tunay na midbidan asin sa siring ikapadagos an saiyang ilegal na aktibidad na dai nadidiskobre nin iba. Kaagid kaiyan, si Satanas saro man na pinakautak nin mga kriminal na patago sanang namamahala, na nagpapalakop nin moral na karatan. Malinaw na ipinamidbid ni Jesus na si Satanas an responsable sa maraot na gibo-gibo nin mga tawo. Inapod ni Jesus si Satanas na “an namamahala sa kinaban na ini.”—Juan 12:31.

Saen hale an Diablo? An rebelyosong anghel na ini, na sa kapoonpooni sarong sangkap na espiritung linalang sa langit, ginibo an saiyang sadiri na Diablo kan magmawot siang gayo na sia an sambahon nin mga tawo imbes na an Dios. An Biblia may rekord nin pag-oolay ni Satanas asin ni Jesus digdi sa daga na dian ihinayag kan Diablo an saiyang maimot na ambisyon. Hiningoa ni Satanas na si Jesus “lumuhod asin gumibo nin sarong akto nin pagsamba” sa saiya.—Mateo 4:8, 9.

Siring man, sa mga pakikipag-olay sa Dios, na nakasurat sa libro nin Job, ihinayag ni Satanas an saiyang mga motibo. Gigibohon nia an gabos na paagi tanganing impluwensiahan an mga tawo na talikdan an Dios.—Job 1:13-19; 2:7, 8.

Isip-isipa: Kun si Satanas nakipag-olay ki Jehova Dios asin ki Jesu-Cristo, posible daw na si Satanas magin sanang prinsipyo nin karatan na nasa laog nin iba? Mayo nanggad nin karatan sa Dios o sa saiyang Aki! Kun siring, malinaw nanggad na si Satanas tunay na persona—sarong maraot na espiritung linalang na mayo nin paggalang ki Jehova o ki Jesus.

An maraot na gibo-gibo nin mga tawo nagpapatotoo na tunay an Diablo. An mga nasyon sa kinaban na ini pinapabayaan na malapa an sobrang mga kakanon ninda mantang grabe an gutom kan saindang mga sakop. An mga nasyon nagtitipon nin mga armas para sa lagdoan na paggaradanan. Inaatian ninda an daga. Pero, dai aram nin kadaklan na tawo an dahelan kan siring na mga gibo na maongison asin nagpapahamak sa sadiri. Taano?

Ihinahayag kan Biblia na “binuta [ni Satanas] an isip kan mga dai nagtutubod.” (2 Corinto 4:4) Tanganing kontrolon an katawohan, naggagamit si Satanas nin dai naheheling na organisasyon. Sia “an namamahala sa mga demonyo.” (Mateo 12:24) Kun paanong an sarong lider puedeng pamahalaan an sarong organisadong krimen na dai nagpapamidbid sa gabos na kalabot dian, ginagamit man ni Satanas an saiyang dai naheheling na organisasyon nin maraot na mga anghel tanganing kontrolon an kadakol na tawo na mayo nanggad nin aram dapit sa saiyang papel o impluwensia.

Nagpapasalamat nanggad kita na ibinuyagyag kan Biblia an Diablo asin an saiyang organisasyon! Sa siring, makakagibo kita nin mga paagi na labanan an impluwensia kan Diablo. An Biblia nagsasadol sa sato: “Magpasakop kamo sa Dios; alagad tumangon nindo an Diablo, asin sia madulag sa saindo.”—Santiago 4:7.