An Papel kan Banal na Espiritu sa Pagkaotob kan Katuyohan ni Jehova
“An sakong tataramon na magluwas sa sakong ngoso . . . siertong magigin mapanggana sa sakuyang sinubolan kaiyan.”—ISA. 55:11.
1. Iilustrar an pagkakalaen nin plano asin nin katuyohan.
IMAHINARA na duwang lalaki an parehong nag-aandam na magbiahe sakay nin auto. An enot may espesipiko asin detalyadong plano nin ruta pasiring sa destinasyon nia. An ikaduwa malinaw sa isip an saiyang destinasyon, alagad may aram man siang dakol na alternatibong ruta. Andam siang magbago nin dalan kun kaipuhan tanganing maatubang an ano man na tibaad mangyari. Sa nagkapirang bagay, an magkalaen na pamamaagi kan duwang lalaking ini nag-iilustrar kan pagkakalaen nin plano asin nin katuyohan. An plano puedeng ikomparar sa pag-andam nin detalyadong ruta, mantang an katuyohan puedeng mangahulogan nin pagkaigwa nin pasohan alagad dai man boot sabihon na may saro sanang espesipikong paagi tanganing maabot iyan.
2, 3. (a) Ano an kalabot sa katuyohan ni Jehova, asin paano nia inatubang an situwasyon na naglataw kan magkasala si Adan asin Eva? (b) Taano ta maninigo kitang magin kaoyon kan pagkaotob kan katuyohan ni Jehova?
2 Kun mapadapit sa paggibo ni Jehova kan kabotan nia, sia mayo nin nakatalaan nang plano, kundi igwa sia nin naootob na katuyohan. (Efe. 3:11) Kalabot sa katuyohan na ini an orihinal na katuyohan nia para sa katawohan asin sa daga—na an globong ini magin paraisong istaran, na dian an sangkap na mga tawo makakapamuhay na may katoninongan asin kaogmahan sagkod lamang. (Gen. 1:28) Kan magkasala si Adan asin Eva, inatubang ni Jehova an situwasyon na iyan asin naggibo sia nin mga areglo tanganing siertohon na maootob an saiyang katuyohan. (Basahon an Genesis 3:15.) Nagdesisyon si Jehova na an saiyang simbolikong babae magmundag nin “banhi,” o Aki, na pag-abot nin panahon malaglag sa parasutsut, si Satanas, asin mahale kan gabos na danyos na dara nia.—Heb. 2:14; 1 Juan 3:8.
3 Mayo nin kapangyarihan sa langit o sa daga an makakaolang sa pagkaotob kan ihinayag na katuyohan nin Dios. (Isa. 46:9-11) Taano ta masasabi niato iyan? Huling kalabot an banal na espiritu. An dai malalabanan na puersang iyan garantiya na “siertong magigin mapanggana” an katuyohan nin Dios. (Isa. 55:10, 11) Marahay na kita danay na lubos na kaoyon kan pagkaotob kan katuyohan nin Dios. An satong oportunidad na mabuhay sa ngapit nakadepende sa kaotoban kaiyan. Dugang pa, nakakapakosog sa pagtubod na maheling kun paano ginagamit ni Jehova an banal na espiritu. Kun siring, pag-olayan niato an papel kan espiritu—kan nakaagi, sa presente, asin sa ngapit—sa pagkaotob kan katuyohan ni Jehova.
An Papel kan Banal na Espiritu kan Nakaagi
4. Paano gradwal na ihinayag ni Jehova an saiyang katuyohan?
4 Kan mga panahon kan Biblia, gradwal na ihinayag ni Jehova an saiyang katuyohan. Kan primero, an midbidan kan ipinanugang Banhi “sarong sagradong hilom.” (1 Cor. 2:7) Sinambit giraray ni Jehova an banhi pakalihis sana nin mga 2,000 na taon. (Basahon an Genesis 12:7; 22:15-18.) Tinawan ni Jehova si Abraham nin panuga na nagtao nin orog na liwanag. An mga tataramon na “paagi sa saimong banhi” malinaw na nagpaparisa na an Banhi madatong bilang tawo, saro na gikan ki Abraham. Makakasierto kita na nagsusubaybay si Satanas na may dakulang interes mantang nahahayag an detalyeng ini. Mayong duda na gusto nanggad kan Kaiwal na iyan na pohoon o raoton an linahe ni Abraham asin sa siring maolang an katuyohan nin Dios. Alagad imposibleng mangyari iyan, huli ta naghihiro an dai naheheling na espiritu nin Dios. Sa anong mga paagi?
5, 6. Paano ginamit ni Jehova an saiyang espiritu tanganing protehiran an mga indibiduwal na kaiba sa linahe na gigikanan kan Banhi?
5 Ginamit ni Jehova an saiyang espiritu tanganing protehiran an mga indibiduwal na kaiba sa linahe na gigikanan kan Banhi. Ki Abram (Abraham), si Jehova nagsabi: “Ako kalasag para sa saimo.” (Gen. 15:1) Makahulogan an mga tataramon na iyan. Halimbawa, isip-isipa an nangyari kaidtong mga 1919 B.C.E. kan si Abraham asin Sara temporaryong mag-istar sa Gerar. Huling dai aram ni Abimelec, an hade kan Gerar, na si Sara agom ni Abraham, kinua nia si Sara tanganing magin agom nia. An mga bagay-bagay daw minaniobra ni Satanas na dai ninda naaaraman, na pinagmamaigotan na olangon si Sara na ipangaki an banhi ni Abraham? Mayong sinasabi an Biblia dapit dian. An sinasabi kaiyan iyo na si Jehova nag-interbenir. Sa sarong pangatorogan, pinatanidan nia si Abimelec na dai duotan si Sara.—Gen. 20:1-18.
6 Bako sanang sarong beses na nangyari iyan. Dakol na beses na ilinigtas ni Jehova si Abraham asin an saiyang pamilya. (Gen. 12:14-20; 14:13-20; 26:26-29) Kaya, mapadapit ki Abraham asin sa mga naggikan sa saiya, an salmista makakapagsabi: “Dai [ni Jehova] tinogotan an siisay man na tawo na dayaon sinda, kundi huli sa sainda sinagwe nia an mga hade, na an sabi: ‘Dai nindo pagduotan an sakuyang mga linahidan, asin dai kamo maggibo nin maraot sa sakuyang mga propeta.’”—Sal. 105:14, 15.
7. Sa anong mga paagi prinotehiran ni Jehova an nasyon nin Israel?
7 Paagi sa espiritu ni Jehova, saiyang prinotehiran an suanoy na nasyon nin Israel, na dian mamumundag an ipinanugang Banhi. Paagi sa espiritu nia, itinao ni Jehova sa Israel an saiyang Ley, na iyo an nagin paagi na maingatan an tunay na pagsamba asin maprotehiran an mga Judio na dai madigtaan sa espirituwal, moral, asin pisikal. (Ex. 31:18; 2 Cor. 3:3) Kan panahon kan mga Hokom, an espiritu ni Jehova nagtao nin kapangyarihan sa nagkapirang lalaki tanganing iligtas an Israel sa mga kaiwal kaiyan. (Hok. 3:9, 10) Durante kan mga siglo sagkod na mamundag si Jesus, na iyo an pangenot na kabtang kan banhi ni Abraham, siertong kalabot an banal na espiritu sa pagprotehir sa Jerusalem, Betlehem, asin sa templo—na an gabos na iyan magkakaigwa nin kabtang sa kaotoban kan mga hula manongod ki Jesus.
8. Ano an nagpapaheling na an banal na espiritu direktang kalabot sa buhay asin ministeryo kan Aki nin Dios?
8 An banal na espiritu direktang kalabot sa buhay asin ministeryo ni Jesus. Paagi sa pagpunsionar kan banal na espiritu sa matris kan birhen na si Maria, iyan may naotob na nungka pang nagibo bago o pagkatapos kaidto. Pinangyari kaiyan an sarong bakong sangkap na babae na mangidam asin magmundag nin sangkap na Aki, na bakong sakop kan penalidad na kagadanan. (Luc. 1:26-31, 34, 35) Kan huri prinotehiran kan espiritu an omboy na si Jesus na dai magadan na mayo pa sa panahon. (Mat. 2:7, 8, 12, 13) Kan si Jesus mga 30 anyos na, sia linahidan nin Dios nin banal na espiritu, na ninombrahan sia tanganing magin paramana kan trono ni David asin isinugo sia na maghulit. (Luc. 1:32, 33; 4:16-21) An banal na espiritu nagtao nin kapangyarihan ki Jesus na gumibo nin mga milagro, kaiba na an pagpaomay sa mga may helang, pagpakakan sa mga tawo, asin pagbuhay sa mga gadan. An siring na makapangyarihan na mga gibo patanaw kan mga bendisyon na maaasahan niato sa pamamahala ni Jesus bilang hade.
9, 10. (a) Paano risang-risa na naghihiro an banal na espiritu sa mga disipulo ni Jesus kan enot na siglo? (b) Anong pangyayari sa pagkaotob kan katuyohan ni Jehova an ihinayag kan enot na siglo C.E.?
9 Poon kan Pentecostes 33 C.E., ginamit ni Jehova an saiyang espiritu tanganing lahidan an sekondaryong kabtang kan banhi ni Abraham, na an dakol sa sainda dai naggikan ki Abraham. (Roma 8:15-17; Gal. 3:29) Risang-risa na naghihiro an banal na espiritu sa mga disipulo ni Jesus kan enot na siglo, na nagpangyari sa sainda na makapaghulit na may kaigotan asin nagtao sa sainda nin kapangyarihan na gumibo nin mga milagro. (Gibo 1:8; 2:1-4; 1 Cor. 12:7-11) Paagi sa mga balaog na idto na paggibo nin mga milagro, ihinayag kan banal na espiritu an risang marhay na pangyayari sa pagkaotob kan katuyohan ni Jehova. Dai na ginagamit kaidto ni Jehova an areglo sa pagsamba na kaidto pang dakol nang siglo an nakaagi asin nakasentro sa templo sa Jerusalem. An saiyang pag-oyon yaon na sa bagong maestablisar na Kristianong kongregasyon. Poon kaidto, ginagamit ni Jehova an linahidan na kongregasyon na iyan tanganing magibo an saiyang katuyohan.
10 Pagprotehir, pagtao nin kapangyarihan, paglahid—pira sana ini sa mga paagi na ginamit ni Jehova an banal na espiritu kan mga panahon kan Biblia tanganing siertohon na maootob an saiyang katuyohan. Pero, kumusta man sa satong panahon? Paano ginagamit ni Jehova ngonyan an saiyang espiritu tanganing suportaran an katuyohan nia? Kaipuhan niatong maaraman iyan huli ta gusto niatong humiro kaoyon kan espiritu. Kun siring, pag-olayan niato an apat sa mga paagi na ginagamit ni Jehova sa presente an saiyang espiritu.
An Papel kan Banal na Espiritu sa Presente
11. Ano an nagpapaheling na an banal na espiritu sarong puersa para sa kalinigan kan banwaan nin Dios, asin paano nindo ikakapaheling na nakikipagtabangan kamo sa espiritu?
11 Enot, an banal na espiritu sarong puersa para sa kalinigan kan banwaan nin Dios. An mga may kabtang sa katuyohan ni Jehova dapat na magin malinig sa moral. (Basahon an 1 Corinto 6:9-11.) An nagkapira na nagigin tunay na Kristiano dating nakikikabtang sa imoral na mga gibo arog baga kan pakikisaro, pagsambay, asin homoseksuwalidad. An mga pagmawot na nagreresulta sa makasalan na mga gibo puedeng makagamot nin hararom. (Sant. 1:14, 15) Pero, an siring na mga indibiduwal “nahugasan na,” na nagpaparisang naggibo na sinda nin mga pagbabago sa buhay na kaipuhan tanganing mapaogma an Dios. Ano an nakakatabang sa sarong namomoot sa Dios na mapangganang labanan an natural na tendensiang gibohon an salang mga pagmawot? An “espiritu kan satong Dios,” an sabi kan 1 Corinto 6:11. Paagi sa pagdadanay na malinig sa moral, ipinapaheling nindo na tinotogotan nindo an espiritung iyan na magin nangingibabaw na puersa sa saindong buhay.
12. (a) Segun sa bisyon ni Ezequiel, paano ginigiyahan ni Jehova an saiyang organisasyon? (b) Paano nindo ikakapaheling na minahiro kamo kaoyon kan espiritu?
12 Ikaduwa, ginagamit ni Jehova an espiritu nia tanganing giyahan an saiyang organisasyon pasiring sa direksion na gusto nia. Sa bisyon ni Ezequiel, an langitnon na kabtang kan organisasyon ni Jehova ilinaladawan bilang sarong langitnon na karuwahe na dai napupugolan sa paghiro tanganing gibohon an katuyohan ni Jehova. Ano an nagpapangyari sa karuwahe na humiro sa sarong partikular na direksion? An banal na espiritu. (Ezeq. 1:20, 21) Girumdomon niato na an organisasyon ni Jehova kompuesto nin duwang kabtang, sa langit asin sa daga. Kun an langitnon na kabtang ginigiyahan kan banal na espiritu, totoo man iyan sa daganon na kabtang. Paagi sa pagigin makinuyog asin maimbod sa paggiya na inaako hale sa daganon na kabtang kan organisasyon nin Dios, ipinapaheling nindo na kamo minasabay sa langitnon na karuwahe ni Jehova asin minahiro kaoyon kan saiyang banal na espiritu.—Heb. 13:17.
13, 14. (a) Sairisay an minakompuesto sa “kapag-arakian na ini” na sinambit ni Jesus? (b) Magtao nin halimbawa na nagpapaheling na tinatabangan kita kan banal na espiritu na masabotan an mga katotoohan sa Biblia. (Helingon an kahon na “Kamo daw Minasabay sa Orog na Liwanag?”)
13 Ikatolo, tinatabangan kita kan banal na espiritu na masabotan an mga katotoohan sa Biblia. (Tal. 4:18) Haloy nang ginagamit kan “maimbod asin mapagmansay na oripon” an magasin na ini bilang an pinakapaagihan sa pagtao nin orog na liwanag. (Mat. 24:45) Halimbawa, estudyare an pakasabot niato dapit sa mga minakompuesto sa “kapag-arakian na ini” na sinambit ni Jesus. (Basahon an Mateo 24:32-34.) Anong kapag-arakian an pinanonongdan ni Jesus? Ipinaliwanag kan artikulong “An Presensia ni Cristo—Ano an Kahulogan Kaiyan Para sa Saindo?” na an pinanonongdan ni Jesus, bako an mga maraot, kundi an saiyang mga disipulo, na madali na kaidtong lahidan nin banal na espiritu.a An linahidan na mga parasunod ni Jesus, kaidtong enot na siglo asin sa presenteng panahon niato, iyo an mga makakaheling kan tanda patin makakabatid man kan kahulogan kaiyan—na si Jesus “harani na sa mga tata.”
14 Ano an kahulogan sa sato kan paliwanag na ini? Minsan ngani dai niato kayang kuentahon an eksaktong lawig kan “kapag-arakian na ini,” marahay na isaisip niato an nagkapirang bagay manongod sa tataramon na “kapag-arakian”: Sa parate nanonongod iyan sa mga tawo na manlaenlaen an edad, na an buhay nagkainarabotan sa sarong partikular na peryodo nin panahon; bako iyan halawigon na marhay; asin may katapusan iyan. (Ex. 1:6) Kun siring, paano niato sasaboton an mga tataramon ni Jesus manongod sa “kapag-arakian na ini”? Minalataw na an boot sabihon nia iyo na magkakainarabotan an buhay kan mga linahidan na nakaheling sa pagpoon kan tanda kaidtong 1914 asin an buhay kan ibang linahidan na makakaheling sa pagpoon kan dakulang kahorasaan. An kapag-arakian na iyan may kapinonan, asin siertong may katapusan iyan. An kaotoban kan manlaenlaen na aspekto kan tanda malinaw na nagpaparisa na an kahorasaan na iyan siertong harani na. Paagi sa pagpadanay kan saindong pakamate nin pag-apura asin pagdadanay na mapagbantay, ipinapaheling nindo na kamo minasabay sa nag-oorog na liwanag asin minasunod sa paggiya kan banal na espiritu.—Mar. 13:37.
15. Ano an nagpapaheling na an banal na espiritu an nagpapakosog sa sato na ipahayag an maogmang bareta?
15 Ikaapat, pinapakosog kita kan banal na espiritu na ipahayag an maogmang bareta. (Gibo 1:8) May iba pa daw na paliwanag kun paano ikinahulit sa bilog na kinaban an maogmang bareta? Pag-isipan iyan. Posibleng huli sa sobrang pagkamasusupgon o pagkahandal, tibaad kabilang kamo sa mga nag-isip kaidto, ‘Dai ko noarin man makakayang maghulit sa harong-harong!’ Pero ngonyan, maigot na kamong nakikikabtang sa gibohon na iyan.b Dakol na maimbod na Saksi ni Jehova an padagos na naghuhulit sa ibong nin pagtumang o persekusyon. Solamenteng an banal na espiritu nin Dios an makakapakosog sa sato na pangganahan an masakiton na mga olang asin na gibohon an mga imposible kutana kun sa sadiri sana niatong kosog. (Miq. 3:8; Mat. 17:20) Paagi sa lubos na pakikikabtang sa paghuhulit, ipinapaheling nindo na nakikipagtabangan kamo sa espiritung iyan.
An Papel kan Banal na Espiritu sa Ngapit
16. Taano ta makakakompiar kita na poprotehiran ni Jehova an saiyang banwaan durante kan dakulang kahorasaan?
16 Sa ngapit, gagamiton ni Jehova sa pambihirang mga paagi an saiyang banal na espiritu tanganing maotob an saiyang katuyohan. Estudyare nguna an mapadapit sa pagprotehir. Arog kan naheling niato, ginamit ni Jehova an saiyang espiritu kan nakaagi tanganing protehiran an mga indibiduwal saka an nasyon nin Israel sa kabilogan. Huli kaini, yaon sa sato an gabos na dahelan na magtubod na gagamiton nia an iyo man sanang makapangyarihan na espiritu tanganing protehiran an saiyang banwaan durante kan nagdadangadang na dakulang kahorasaan. Dai niato kaipuhan na magbanabana manongod sa kun paano man nanggad kita iingatan ni Jehova sa panahon na iyan. Imbes, may kompiansa niatong inaantisipar an ngapit, huli sa pakaaram na an mga namomoot ki Jehova pirme nanggad niang naheheling asin kaya nanggad na tabangan kan saiyang banal na espiritu.—2 Cron. 16:9; Sal. 139:7-12.
17. Paano gagamiton ni Jehova an saiyang banal na espiritu sa bagong kinaban?
17 Paano gagamiton ni Jehova an saiyang banal na espiritu sa maabot na bagong kinaban? An espiritung iyan an magiya sa pagsurat kan bagong mga rolyo na bibikladon sa panahon na iyan. (Kap. 20:12) Ano an magigin laog kan mga ini? Minalataw na iyan an detalyadong mga kahagadan ni Jehova sa sato durante kan sangribong taon. Inaantisipar daw nindo an pagsiyasat sa laog kan mga rolyong iyan? Hinahalat nanggad niato an bagong kinaban na iyan. Dai niato maiimahinar kun gurano kagayon an magigin buhay sa panahon na iyan, na dian gagamiton ni Jehova an saiyang banal na espiritu tanganing otobon an saiyang katuyohan sa daga asin sa katawohan na yaon dian.
18. Ano an saimong marigon na determinasyon?
18 Nungka niatong lingawan na an naootob na katuyohan ni Jehova siertong magigin mapanggana, huling ginagamit ni Jehova an saiyang banal na espiritu—an pinakamakapangyarihan na puersa sa uniberso—tanganing maotob iyan. Kalabot ka sa katuyohan na iyan. Kun siring, magin marigon na determinasyon mo na mapagngayongayong hagadon ki Jehova an saiyang espiritu asin humiro kaoyon kan paggiya kaiyan. (Luc. 11:13) Paagi kaiyan magkakaigwa ka kan oportunidad na mabuhay siring kan katuyohan ni Jehova para sa mga tawo—an mabuhay sagkod lamang sa Paraiso digdi sa daga.
[Mga Nota sa Ibaba]
b Para sa halimbawa nin saro na napangganahan an sobrang pagkamasusupgon asin nagin maigot sa ministeryo, helingon An Torrengbantayan na Setyembre 15, 1993, pahina 19.
Nagigirumdoman daw Nindo?
• Sa anong mga paagi ginamit ni Jehova an saiyang banal na espiritu kan mga panahon kan Biblia tanganing siertohon na maootob an saiyang katuyohan?
• Paano ginagamit ni Jehova sa presente an saiyang espiritu?
• Paano gagamiton ni Jehova sa ngapit an saiyang espiritu tanganing maotob an katuyohan nia?
[Kahon sa pahina 10]
Kamo daw Minasabay sa Orog na Liwanag?
Si Jehova padagos na nagpapasirang nin liwanag sa saiyang banwaan. Anong nagkapirang pagpakarhay sa pakasabot an ipinublikar sa An Torrengbantayan?
▪ Anong positibong leksion manongod sa espirituwal na pagtalubo an itinampok sa ilustrasyon ni Jesus dapit sa lebadura? (Mat. 13:33)—Hulyo 15, 2008, pahina 19-20.
▪ Noarin matatapos an pag-apod sa mga Kristiano para sa langitnon na paglaom?—Mayo 1, 2007, pahina 30-31.
▪ Ano an boot sabihon kan pagsamba ki Jehova “sa espiritu”? (Juan 4:24)—Hulyo 15, 2002, pahina 15.
▪ Sa arin na patyo naglilingkod an dakulang kadaklan? (Kap. 7:15)—Mayo 1, 2002, pahina 30-31.
▪ Noarin mangyayari an pagsuwaysuway sa mga karnero asin kanding? (Mat. 25:31-33)—Oktubre 15, 1995, pahina 14-24.