Naghahapot an mga Parabasa . . .

Nagbobolong daw an Mga Saksi ni Jehova Paagi sa Pagtubod?

▪ Nungkang nagbolong an Mga Saksi ni Jehova paagi sa pagtubod. Arog ni Jesus, naniniwala sinda na an pangenot na gibohon ninda iyo na ihulit an maogmang bareta manongod sa Kahadean nin Dios. Naniniwala man sinda na an tunay na mga Kristiano namimidbid, bakong huli sa pagbolong paagi sa pagtubod, kundi huli sa sarong bagay na mas mahalaga nanggad.

Sierto nanggad na dakula an halaga sa sato gabos kan mapagmalasakit na pagbolong ni Jesu-Cristo sa mga may helang kaidtong enot na siglo C.E. Paagi kaiyan, sia nagtao nin garantiya na sa pamamahala nia bilang Hade kan Kahadean nin Dios, “mayo nin nag-eerok na masabi: ‘Naghehelang ako.’”—Isaias 33:24.

Pero, kumusta man ngonyan? An mga parabolong paagi sa pagtubod na miembro nin Kakristianohan saka nin nagkapirang relihion na bakong Kristiano nagsasabi na sinda nakakabolong daa paagi sa milagro. Pero, estriktong nagpatanid si Jesus tumang sa mga indibiduwal na masabi na “naggibo [daa sinda] nin dakol na milagro” sa ngaran nia. (Mateo 7:22, An Banal na Biblia [edisyon na 2007]) Sia masabi sa sainda: “Dai ko nanggad kamo midbid. Rumayo kamo sa sako mga paragibo nin maraot!” (Mateo 7:23, An Marahay na Bareta Biblia) Kaya, talaga daw na tanda nin pag-oyon o bendisyon nin Dios an soboot mga milagro sa presenteng panahon na ginigibo nin mga parabolong paagi sa pagtubod?

Helinga an sinasabi kan Biblia manongod sa pagbolong kaidto ni Jesus. Kun ikokomparar an sinasabi kaiyan asin an mga paagi ngonyan nin mga parabolong paagi sa pagtubod, maririsa tolos niato kun baga hale sa Dios an mga pagbolong na iyan ngonyan.

Nungkang ginamit ni Jesus an pagbolong tanganing makaengganyo nin mga parasunod o nin dakol na nagmamasid asin nagdadangog. Sa kabaliktaran, sia naggibo nin dakol na milagro na dai naheling nin publiko. Sa dakol na beses, sinabihan nia an mga binolong nia na dai pagsabihon kiisay man an milagrong ginibo nia.—Lucas 5:13, 14.

Nungkang nagpabayad si Jesus sa mga milagrong ginibo nia. (Mateo 10:8) Pirme man na nagin mapanggana an pagbolong nia. An gabos na may helang na nagdolok sa saiya lubos na narahay, asin an pagrahay dai nakadepende sa pagtubod kan indibiduwal. (Lucas 6:19; Juan 5:5-9, 13) Iyo, nagbuhay pa ngani si Jesus nin mga gadan!—Lucas 7:11-17; 8:40-56; Juan 11:38-44.

Minsan ngani talagang ginibo ni Jesus an mga milagrong iyan, an ministeryo nia nakakonsentrar bakong sa pagtipon nin mga nakomberte paagi sa paggibo nin mga milagro na kalabot an emosyon. Imbes, an pangenot na gibohon nia iyo na ipahayag an maogmang bareta kan Kahadean nin Dios. Inorganisar ni Jesus an mga parasunod nia na magin paragibo nin disipulo, na matokdo sa iba kan paglaom na magkamit nin perpektong hawak sa pamamahala kan Kahadean nin Dios.—Mateo 28:19, 20.

Totoo, an nagkapira sa mga parasunod ni Jesus kan enot na siglo tinawan nin espesyal na kakayahan na magbolong, alagad nagpondo ini. (1 Corinto 12:29, 30; 13:8, 13) An tunay na mga Kristiano ngonyan namimidbid, bakong paagi sa pagbolong, kundi paagi sa mapagsakripisyong pagkamoot sa lambang saro. (Juan 13:35) An mga pagbolong ngonyan paagi sa pagtubod dai nagreresulta sa sarong tunay na pamilyang Kristiano hale sa gabos na rasa asin kamugtakan sa buhay na pinagsasararo nin siring na pagkamoot.

Minsan siring, igwa nin sarong grupo nin mga Kristiano na pinagsasararo nin makosogon na pagkamoot kaya habo nanggad nindang kolgan an lambang saro—o an siisay man—dawa sa pinakamaringis na pagralabanlaban nin mga tawo. Sairisay sinda? An Mga Saksi ni Jehova. Midbid sinda sa bilog na kinaban sa pagpaheling nin arog-Cristong pagkamoot. Sarong milagro, sabi ngani, an pagsararoon an mga tawo hale sa laen-laen na rasa, nasyon, kultura, asin etniko, saka nagin posible sana iyan paagi sa banal na espiritu nin Dios. Taano ta dai ka mag-atender sa saro sa mga pagtiripon ninda tanganing maheling mo mismo iyan?

[Ritrato sa pahina 13]

Talaga daw na may suporta nin Dios an mga parabolong ngonyan paagi sa pagtubod (arog kan maheheling sa too)?