Inooyonan daw nin Dios an Pagbolong Paagi sa Pagtubod?
“NAKAHELING kita nin makangangalas na mga bagay ngonyan!” Iyo, napahanga an mga nakaheling. An paralisadong marhay na lalaki naomayan sa atubangan mismo kan saindang mga mata. An parabolong sinabihan an lalaki: “Buhat asin kuana an saimong hamak patin lakaw papuli sa saimong harong.” Asin iyan man nanggad an ginibo kan lalaki! Bako na siang paralisado. Bakong makangangalas na an mga yaon ‘nagpoon na magpamuraway sa Dios’! (Lucas 5:18-26) An pagbolong na ini, na ginibo ni Jesu-Cristo kaidtong haros 2,000 na taon na an nakaagi, malinawon na may pag-oyon nin Dios.
Kumusta man ngonyan? Sagkod daw ngonyan marahay na posibilidad an milagrosong pagbolong para sa mga daing nanonompongan na medikal na pagbolong? Si Jesus naggibo nin mga milagro sa pagbolong. An mga parabolong ngonyan paagi sa pagtubod naghihingakong nag-aarog sa saiya. Ano an maninigong pagmansay niato sa saindang mga paghihingako?
An pagbolong paagi sa pagtubod tinawan kan kahulogan na “sarong paagi nin pagpaomay sa mga helang paagi sa pamibi asin pagtubod sa Dios.” An Encyclopædia Britannica nagpapatunay: “An kasaysayan nin mga pagbolong paagi sa pagtubod sa Kristianismo nagpoon sa makangangalas na personal na mga ministeryo ni Jesus asin kan mga apostol.” Iyo, si Jesus nagpangyari nin pambihirang mga pagpaomay. An mga parabolong daw ngonyan paagi sa pagtubod nagmimilagro na kapareho nia?
Pagtubod—Kahagadan Daw?
Sono sa Black’s Bible Dictionary, si Jesus “espisipikong hinagad [an pagtubod] bilang kahagadan sa saiyang mga milagro nin pagbolong.” Alagad ta totoo daw iyan? Hinagad daw ni Jesus na an sarong may helang magkaigwa nin pagtubod bago nia sia bolongon? An simbag dai. An pagtubod kaipuhan sa kabtang kan parabolong pero dai man perming kaipuhan sa kabtang kan may helang. Sarong beses dai naomayan kan mga disipulo ni Jesus an sarong aking may subisubi. Pinaomayan ni Jesus an aki dangan sinabihan an mga disipulo kun taano ta dai sia ninda nabolong. “Sia nagsabi sa sainda: ‘Huli sa saindong kadikit na pagtubod.’”—Mateo 17:14-20.
Sono sa Mateo 8:16, 17, si Jesus “pinaomayan . . . an gabos na may kamatean.” Totoo, an mga tawong ini may paniniwala ki Jesus kaya sinda nagdolok sa saiya. (Mateo 8:13; 9:22, 29) Sa kadaklan sinda kaipuhan na dumolok asin makiolay bago nia sinda bolongon. Minsan siring, dai kaipuhan an pormal na kapahayagan nin pagtubod tanganing magibo an milagro. Sarong beses binolong ni Jesus an sarong lopog na dai ngani nakamimidbid ki Jesus. (Juan 5:5-9, 13) Kan banggi na sia dinakop, ibinalik ni Jesus an napalong na talinga kan oripon kan halangkaw na saserdote, minsan ngani an tawong ini saro sa grupo kan mga kaiwal ni Jesus na nagduman sa pagdakop sa saiya. (Lucas 22:50, 51) An totoo, may beses na binubuhay pa ngani ni Jesus an mga gadan!—Lucas 8:54, 55; Juan 11:43, 44.
Paano nagibo ni Jesus an siring na mga milagro? Huli ta sia nagsarig sa banal na espiritu, o puwersa aktiba nin Dios. Ini an nagpaomay, bakong an pagtubod kan may helang. Kun babasahon nindo an mga tala sa mga Ebanghelyo, maririsa man nindo na an mga pagbolong ni Jesus ginibo na daing seremonya. Mayo nin pag-eksibir o pagpukaw sa mga emosyon. Saro pa, ano man an helang, nungka na nasudya si Jesus. Permi siang mapanggana, asin nungka na sia nagpabayad.—Mateo 15:30, 31.
Kapareho daw kan Ginibo ni Jesus an Modernong mga Pagbolong?
An helang teribleng problema, asin kun iyan minaabot, natural sanang maghingoa kitang makaginhawa. Alagad paano kun kita nag-iistar sa sarong lugar na “an mga tawo, nangorogna an mga dukha, tinatrato nin propesyonal na mga paraataman sa salud bilang mga bagay asin bakong bilang mga tawo”? Iyan an situwasyon na namasdan nin sarong doktor sa sarong nasyon sa Latin Amerika. Asin paano kun kita nag-iistar sa sarong lugar na, arog sa nasyon na iyan, ‘40 porsiento sana sa mga doktor sa medisina an kuwalipikado sa saindang propesyon’?
Bakong makangangalas na an dakol, mantang mayo nin naheheling na ibang remedyo, ibinibilang na kisuerra maninigong probaran an pagbolong paagi sa pagtubod. Pero, kontrobersial an hinihingakong mga pagpaomay nin mga parabolong paagi sa pagtubod. Halimbawa, mga 70,000 an kinakarkulong nag-atender sa sarong miting sa São Paulo, Brazil, na an duwang parabolong ‘pinagtinaktinakan an ginatos na salming sa mata na iinapon kan mga yaon, na pinanunugaan an madaling mapaniwalang mga kagsadiri na ibabalik an saindang pagheling.’ An saro sa mga parabolong sadiosan na inadmitir sa sarong interbio: “Dai ko masasabi na maoomayan an gabos na may helang na ipinamimibi mi. Iyan depende sa saindang pagtubod. Kun an saro minatubod, sia maoomayan.” Ibinasol nia an dai pagkaomayi sa kakulangan nin pagtubod kan may helang. Pero girumdoma na, arog kan naheling niato sa enotan, ibinasol ni Jesus an dai pakabolong sa kakulangan nin pagtubod kan mga nagbobolong!
An saro pang parabolong nanuga na paoomayan an kanser asin paralisis. Ano an nangyari? Sono sa magasin na Veja, “an panuga minalataw na dai naotob.” Asin hinanyoga kun paano guminawe an tawo: “Sa laog nin haros duwang oras, [an parabolong paagi sa pagtubod] inaling an mga presente paagi sa mga sermon, pamibi, pagkurahaw, pagkanta—patin nanununtok pa, na an katuyohan paluwason an mga demonyo na nag-eerok sa hawak kan mga miembro. Sa katapusan, iinapon nia an saiyang kurbata asin panyo sa namumungnan na mga presente asin ilinibot an plato sa pagkolekta nin ‘boluntad na kontribusyon.’” Si Jesus asin an saiyang mga apostol nungka na naghagad nin kuwarta para sa milagrosong pagbolong, asin nungka na sinda naggibo nin siring na mga pasale.
Kaya malinaw na an siring na modernong mga parabolong paagi sa pagtubod dai ginigibo an ginibo ni Jesus. Asin masakit paniwalaan na ooyonan nin Dios an saindang ginigibo. Pero inooyonan daw nia an ano man na milagrosong pagbolong ngonyan? O may paagi daw na an satong pagtubod makatabang sato kun magkahelang kita o an satong mga namomotan?