Nangyayari Pa daw an Milagrosong mga Pagpaomay?
“AKOA nindo si Jesus asin maomayan kamo!” An mga sarabihon na arog kaini nagin dahelan tanganing maniwala si Alexandre, miembro nin sarong iglesiang Ebangheliko, na an pagtomar nin bolong para sa saiyang helang magpaparisa nin kakulangan nin pagtubod. Nagin kombensido sia na an saiya sanang pagtubod an magtatao kan milagrosong pagpaomay na kaipuhan nia. Si Benedita, sarong sinserong Katoliko, natudok na marhay an boot kan mabaretaan nia an manongod sa mga milagrong pagpaomay sa santuaryo kan Aparecida do Norte, sa estado nin São Paulo, Brazil. Ginagamit an mga orasyon na itinokdo sa saiya kan saiyang inaon, si Benedita namibi sa Nuestra Señora del Aparecida, ki Antonio, asin sa iba pang “santo” na logod tawan sia nin kapangyarihan na magpaomay sa mga may helang.
Minalataw na dawa sa pagtatapos kan ika-20 siglo, dakol pa an naniniwala sa milagrosong mga pagpaomay—alagad taano? Posible na an nagkapira nadedesganar kun daing gayo nin nahihimo an mga doktor na pagianon an helang, kolog, asin pagsakit kan saindang mga namomotan, nangorogna an saindang mga aki. An mga nagsasakit nin makuri sa pabalikbalik na mga helang tibaad maghona na huli sa halangkaw na kantidad nin medisina sa presenteng panahon, mayong mawawara sa sainda kun sinda maghingoang kamtan an pagpaomay paagi sa pagtubod. An iba naheheling sa TV an laen-laen na iglesia asin indibiduwal na nag-aalok nin bolong sa AIDS, depresyon, kanser, pagkabua, altapresyon, asin dakol na iba pang kamatean. Baga man sinda nagtutubod o dai sa siring na mga paghihingako, sinda tibaad dumolok sa mga iyan bilang an ultimong remedyo. An iba pa na naniniwala na an dahelan kan saindang helang maraot na mga espiritu tibaad maghona na an pinagkatodan na bolong mayo nin epekto sa sainda.
Sa ibong na lado, yaon an mga makosog na minakontra, minakondenar pa ngani, sa ideya nin milagrong mga pagpaomay nin gadan nang mga “santo” o buhay pang mga parabolong. Sono sa Jornal da Tarde, sa pagmate kan inmunologo na si Dráusio Varella an paniniwalang iyan “dinadaya an pagtubod kan mga dai nagmamaan asin desesperado.” Idinugang nia: “Huling naglalaom sa mga milagro, tibaad talikdan nin dakol an seryosong medikal na pagbolong huli sa mga paradayang ini.” Asin an The New Encyclopædia Britannica nagpapaliwanag: “An bakong pinagkatodan na mga pagpaomay kaidto konektado sa sagradong mga lugar asin relihiosong mga rituwal, asin an siensia medikal may tendensiang iatribwir an gabos na pagpaomay na iyan sa normal na proseso nin suhestion na epektibo ta marahay an mga kamugtakan.” Pero, dakol an naniniwala na sinda talagang naomayan paagi sa milagro. Para sa sainda, epektibo an pagpaomay na iyan!
An mga pamilyar sa Biblia nakakaaram na si Jesu-Cristo nagpaomay sa mga may helang sa dakol na okasyon, na ginigibo ini paagi sa “kapangyarihan nin Dios.” (Lucas 9:42, 43) Sa siring tibaad iniisip-isip ninda, ‘Nagpupunsionar pa daw an kapangyarihan nin Dios asin nagpapangyari sa milagrosong mga pagpaomay ngonyan?’ Kun iyo, taano an mga pagprobar na magbolong ta dai ikinatatao an ipinanugang mga resulta? Iyan daw huli ta an pasyente kulang nin pagtubod o kulang an saiyang donasyon? Tama daw na an sarong Kristiano pabolong sa milagrosong paagi kun sia nagtitios nin makolog o tibaad dai na nabobolong na helang? Asin mangyayari pa daw liwat an dai nasusudyang klase nin milagrosong mga pagpaomay na ginibo ni Jesus? Manonompongan nindo an simbag sa mahalagang marhay na mga hapot na ini sa sunod na artikulo.