Kun Paano Makatatabang sa May Helang an Pagtubod

AN MGA tala nin milagrosong pagpaomay sa Biblia naggagarantiya sato na an Dios may pagmakolog sa satong karahayan, asin ipinaheheling kaiyan an saiyang kapangyarihan na magbolong. Mantang an milagrosong mga pagpaomay na ini nakapamuraway sa Dios asin nagtao nin makuring kagayagayahan, rasonableng ihapot, Sagkod daw ngonyan igwa kan balaog na pagbolong paagi sa banal na espiritu?

An simbag sa hapot na iyan dai​—asin tibaad ipagngalas nin iba an dahelan. An milagrosong mga pagpaomay kan enot na siglo nakaotob na kan katuyohan kaiyan. An The Illustrated Bible Dictionary tama an pagkasabi: “An katuyohan kan mga milagro sa pagbolong teolohiko, bakong medikal.” Ano an pira sa teolohikong mga katuyohan na inotob kan mga milagrong idto?

Primero, an mga milagro ni Jesus sa pagbolong nakaotob sa katuyohan na ipamidbid sia bilang an Mesiyas. Asin pagkagadan nia, an mga iyan nakatabang na patunayan na an bendisyon nin Dios nasa bagong Kristianong kongregasyon. (Mateo 11:​2-6; Hebreo 2:​3, 4) Saro pa, ipinaheling kaiyan na maootob an panuga nin Dios na bolongon an katawohan sa bagong kinaban. Pinatutunayan kaiyan an pagtubod niato na talagang maabot an panahon na “mayo nin nag-eerok na masabi: ‘Naghehelang ako.’ An mga tawo na nag-eerok sa daga iyo an mga pinatawad sa saindang kasalan.” (Isaias 33:24) Oras na maotob na an mga katuyohan na ini kan enot na siglo, dai na kaipuhan an mga milagro.

Mahalagang mangnohon na an mga disipulo ni Jesus kan enot na siglo igwa mismo nin mga kamatean na dai binolong sa milagrosong paagi. Ini dugang pang ebidensia na an milagrosong pagbolong ni Jesus asin kan mga apostol sa katuyohan na magtokdo nin mahahalagang katotoohan, bakong tumao nin serbisyo medikal. Kan irinirekomendar an remedyo sa parateng pagkahelang ni Timoteo, itinokdo ni Pablo an nakararahay na paggamit sa arak, bakong pagbolong paagi sa pagtubod. Si Pablo, na naggibo nin mga milagro sa pagbolong, dai narahayan sa “tonok sa laman” na daing ontok sa ‘pagtampal’ sa saiya.​—2 Corinto 12:7; 1 Timoteo 5:23.

Kan magadan an mga apostol, nawara na an balaog na pagbolong. Ipinarisa mismo ni Pablo na ini mangyayari. Sa pagbaing kan Kristianong kongregasyon sa sarong omboy, si Pablo nagsabi: “Kan ako aki pa, nagtataram ako kaidto siring sa aki, nag-iisip siring sa aki, nangangatanosan siring sa aki; alagad ngonyan na ako dakula na, binayaan ko na an mga ugale nin sarong aki.” An punto kan saiyang ilustrasyon iyo na an milagrosong mga balaog kan espiritu kabtang kan pagkaomboy kan Kristianong kongregasyon. Idto “mga ugale nin sarong aki.” Kaya, sia nagsabi: “Iyan [an milagrosong mga balaog] mahahale.”​—1 Corinto 13:​8-11.

Makatatabang daw an Pagtubod Kun Kita Maghelang?

Minsan siring, dawa kun kita dai nagsasarig sa pagbolong paagi sa pagtubod, tunay na maninigo na mamibi sa Dios para sa tabang kun kita naghehelang. Asin mayo nanggad nin sala sa pamimibi nin iba para sa sato. Alagad an mga pamibi kaipuhan na realistiko asin kaoyon sa kabotan nin Dios. (1 Juan 5:​14, 15) Mayo nin pagboot sato an Biblia na mamibi para sa pagbolong paagi sa pagtubod.a Imbes, inaarang niato an mamomoton na pagsuportar ni Jehova sa panahon kan mga pagbalo na gikan sa helang.

Ipinaheheling kan Biblia kun ano an ipamimibi nin mga maimbod kun naghehelang sa pagsabi kaiyan: “Si Jehova mismo magpapakosog sa saiya sa ibabaw nin sopa nin kahelangan; an gabos niang higdaan sasalidahan mo sa panahon kan saiyang paghelang.” (Salmo 41:3) An paghorophorop sa Tataramon nin Dios makatatabang sa mga may emosyonal na helang. An salmista nagsurat: “An saimong mamomoton na kabootan, O Jehova, nangataman sa sako. Kan an sakuyang nakariribok na mga kaisipan dumakol sa sakong boot, an saimong mga panranga nakaranga sa sakong kalag.”​—Salmo 94:​18, 19; helingon man an 63:​6-8.

Dugang pa, kaipuhan na magpaheling kita nin marahay na kaisipan dapit sa salud, asin hinahatolan kita kan Biblia manongod digdi. Mas marahay na mamuhay sono sa mga prinsipyo kan Biblia kisa mag-abuso sa droga, magsigarilyo, mag-inom nin sobra, o magpalabilabi sa pagkakan asin dangan kun magkahelang, magpabolong paagi sa pagtubod huli sa kadaihan nin paglaom. An pamimibi para sa milagro kun an saro nagkakahelang dai ikasasalida sa madonong na gawe tanganing makalikay sa mga helang na malilikayan, arog baga kan pagkakan nin masustansiang mga kakanon kun igwa o pagpatabang sa kuwalipikadong mga doktor kun posible.

An Tataramon nin Dios nagsasadol man sato na pataluboon an marahay na mga kaisipan na makatatao nin pakinabang sa satong pisikal na salud. An librong Mga Talinhaga naghahatol: “An trangkilong puso iyo an buhay kan laman, alagad an pag-inom kalapaan sa mga tolang.” “An puso na maogma nakaoomay, alagad an espiritung nagmomondo nakapaaalang sa mga tolang.” (Talinhaga 14:30; 17:22) An pamimibi na pataluboon logod sa sato kan banal na espiritu an katrangkilohan nin boot asin kagayagayahan daing ibang itatao kundi kapakipakinabang na mga epekto sa satong pisikal na salud.​—Filipos 4:​6, 7.

Ano Man an Pagbolong Paagi sa Pagtubod?

Siyempre, dawa kun an saro mamuhay sa paaging pinakamarahay sa salud na itinotogot kan saiyang kamugtakan, puwede pa man giraray na umabot an helang. Ano na? May peligro daw an pagdolok sa parabolong paagi sa pagtubod sa paglaom na mabolong? Iyo, may peligro. An modernong mga parabolong paagi sa pagtubod bihirang magbolong nin libre. Asin an paggasto nin kuwarta sa parabolong paagi sa pagtubod mantang an kuwartang iyan puwedeng gastohon sa medikal na tabang puwedeng magbunga nin dakulang kapierdihan. Apuwera kaiyan, taano ta tatawan nin kuwarta an mga tawo na nag-aaprobetsar sa pagigin mapaniwalaon nin mga tawo?

An iba tibaad mangatanosan: ‘Seguro may halaga man an pagbolong paagi sa pagtubod kun nabobolong man an minsan sadit na porsiento kan mga nagduduman sa mga “parabolong.”’ Alagad ta pinagdududahan pa kun baga talagang may nabobolong nin permanente an mga parabolong paagi sa pagtubod. Inaadmitir kan Encyclopædia Britannica: “Kakadikit sanang pagsiyasat na sono sa depinidong mga paagi an ginibo manongod sa dakol na dai aram na mga bagay sa pagbolong paagi sa pagtubod.”

Dawa kun garo baga nabobolong an nagkapira, ini bakong patotoo kan paghiro kan banal na espiritu. Sa Sermon sa Bukid, si Jesus nagsabi: “Balakid an masarabi sa sako sa aldaw na iyan, ‘Kagurangnan, Kagurangnan, bakong kami naghula sa ngaran mo, asin nagpaluwas nin mga demonyo sa ngaran mo, patin naggibo nin dakol na ngangalasan sa ngaran mo?’ Alagad sasabihan ko sinda: Dai ko kamo noarin man namidbid! Humarayo kamo sa sako, kamong mga paragibo nin katampalasanan.” (Mateo 7:​22, 23) Sinabi man ni Jesus na an iba, minsan ngani dai inooyonan nin Dios, maapod nin atension sa sainda man sana paagi sa mga tanda: “Huli ta may malataw na mga falsong Cristo asin falsong propeta asin magtatao nin darakulang tanda asin ngangalasan tanganing mandaya, kun sukat, minsan sa mga pinili.” (Mateo 24:24) Tunay na ikabibilang an modernong mga parabolong paagi sa pagtubod sa aplikasyon kan mga tataramon na iyan, huli sa saindang dramatikong mga pag-aatubang, daing ontok na paghagad nin kuwarta, asin hinihingakong milagrosong mga pagbolong.

An siring na mga tawo dai nagsusunod sa mga lakad ni Jesus. Kun siring, siisay an saindang sinusunod? Ipinaririsa iyan sato ni apostol Pablo kan sia magsabi: “Si Satanas nagmamalemale na anghel nin liwanag. Kaya bako man na dakulang bagay kun an saiyang mga ministro nagmamalemale na mga ministro nin katanosan. Alagad an saindang masasagkodan sono sa saindang mga gibo.” (2 Corinto 11:​14, 15) Kun an mga parabolong paagi sa pagtubod dai nakagigibo kan mga pagbolong na hinihingako ninda, kun siring sinda mga paradaya, na nag-aarog ki Satanas, “na nandadaya sa bilog na ineerokan na daga.” (Kapahayagan 12:9) Alagad ano kun, sa sadit na minoriya nin mga kaso, talagang nakabobolong sinda? Bako daw na dapat niatong isipon na an saindang mga gibong “ngangalasan” ginigibo sa kapangyarihan ni Satanas asin kan saiyang mga demonyo? Iyo nanggad!

An Panahon nin Tunay na Pagbolong

An milagrosong mga pagpaomay ni Jesus ginibo sa tabang kan banal na espiritu nin Dios. Ipinaheling kaiyan an katuyohan nia na resolberan an gabos na problema nin tawo sa salud sa itinalaan niang panahon. Ipinanunuga ni Jehova an “pagpaomay sa mga nasyon.” (Kapahayagan 22:2) Asin bako sana na paoomayan nia an mga helang kundi hahaleon man nia an kagadanan. Ipinaliwanag ni Juan na si Jesus napadigdi “tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Kanigoan karahay na pagbolong iyan! Si Jesus magibo liwat nin mga pagpaomay na arog kan mga nakatala sa Biblia pero sa mas mahiwas na paagi. Bubuhayon pa ngani nia an mga gadan! (Juan 5:​28, 29) Noarin ini mangyayari?

Sa bagong kinaban nin Dios, na, sono sa gabos na ebidensia, harani na. An bagong kinaban na iyan, na mapoon pakatapos na mahale na sagkod lamang an karatan kan palakaw na ini nin mga bagay, magigin tunay na bendisyon sa katawohan na may matanos na puso. Iyan magigin kinaban na daing kasakitan. “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” (Kapahayagan 21:4) Kabaliktaran nanggad sa naheheling niato sa palibot ngonyan!

Kun siring, sa mga panahon na may helang, mamibi sa Dios para sa tabang. Asin baga man may helang o mabagsik, adalan kun paano nanggad mangyayari an buhay na daing sagkod na daing helang. Parigonon an saindong pagtubod sa masasarigan na panugang ini nin Dios paagi sa pag-adal sa dakol na pagkasambit dian sa Biblia. Adalan kun paano madali nang maotob an katuyohan nin Dios dapit digdi sono sa saiyang iskedyul. Dai magduda, ta sinisierto sato kan Tataramon nin Dios: “Hahalonon nia an kagadanan sagkod lamang, asin papahidon kan Soberanong Kagurangnan na si Jehova an mga luha sa gabos na lalauogon.”​—Isaias 25:8.

[Nota sa Ibaba]

[Ritrato sa pahina 6]

An milagrosong mga pagbolong ni Jesus nakaotob na sa katuyohan kaiyan

[Ritrato sa pahina 7]

Ootrohon asin padadakolon ni Jesus an mga milagro sa pagbolong