Teokratikong Paadalan sa Pagmiministro
Katuyohan: Sanayon an mga parahayag na magin epektibong parahulit asin paratokdo kan maogmang bareta.
Lawig: Dagos-dagos.
Lugar: Lokal na Kingdom Hall. Kualipikasyon: Gabos na regular na nakikiasosyar sa kongregasyon, na minaoyon sa mga katokdoan kan Biblia asin namumuhay kaoyon kan Kristianong mga prinsipyo.
Pagpalista: An paraataman kan Teokratikong Paadalan sa Pagmiministro an naglilista sa mga estudyante.
Si Sharon, na sarong paralisado huli sa amyotrophic lateral sclerosis (ALS), nagsabi: “Dahil sa Teokratikong Paadalan sa Pagmiministro, nakanood akong mag-research asin magpresentar nin impormasyon sa lohikong paagi. Nakanood man akong magtao nin atension sa espirituwal na pangangaipo kan iba—bako sanang sa sako.”
Si Arnie, na haloy nang nagbibiaheng paraataman, nagsabi: “Nagdakula ako na nakakamol sa pagtaram asin nadedepisilan maghiling sa mata nin iba. Natabangan ako kan paadalan na ini na magkaigwa nin kompiansa asin makamate na ako may halaga. Sa tabang ni Jehova paagi sa pagsasanay na ini, nanodan ko kun paano maghangos nin tama asin magkonsentrar. Nagpapasalamat akong marhay sa kakayahan na omawon an Dios sa kongregasyon asin sa ministeryo.”
Paadalan Para sa mga Bagong Laog sa Bethel
Katuyohan: Tabangan an mga bagong laog sa Bethel na magin mapanggana sa paglilingkod ninda.
Lawig: 45 minutos kada semana sa laog nin 16 na semana.
Lugar: Bethel.
Kualipikasyon: Permanenteng miembro kan pamilyang Bethel o temporary volunteer na inaprobaran na maglingkod sa Bethel nin sarong taon o labi pa.
Pagpalista: An bagong mga miembro kan pamilyang Bethel automatikong ilinilista.
Si Demetrius, na nag-atender sa paadalan na ini kan dekada nin 1980, nagsabi: “Pinaoswag kan kursong ini an sakong ugale sa pag-adal asin inandam ako kaini para sa panghaloyan na paglilingkod sa Bethel. An mga instruktor, kurikulum, asin praktikal na konseho nakakombensir sako na si Jehova may mamomoton na pagmakolog asin na mawot niang tabangan ako na magin mapanggana sa paglilingkod sa Bethel.”
Si Kaitlyn nagsabi: “Natabangan ako na magpokus sa kun ano an pinakaimportante—an pagigin espirituwal na tawo. Pinararom kan Entrants’ School an pag-apresyar ko ki Jehova, sa harong nia, asin sa organisasyon nia.”
Pang-Kahadean na Paadalan sa Pagmiministro
Katuyohan: Sanayon an nagbibiaheng mga paraataman, mga elder, asin kun minsan ministeryal na mga lingkod na asikasohon an saindang pinangangatamanan asin mga paninimbagan sa organisasyon. (Gui. 20:28) Tinotokar digdi an dapit sa presenteng situwasyon kan mga kongregasyon, mga tendensia dian, asin mga pangangaipo kaiyan na dapat asikasohon tolos. An paadalan na ini ginigibo kada pirang taon depende sa desisyon kan Namamahalang Grupo.
Lawig: Sa nakaaging mga taon, ginigibo ini sa laog nin duwa sagkod sa duwa may kabangang aldaw para sa nagbibiaheng mga paraataman, saro may kabangang aldaw para sa mga elder, asin sarong aldaw para sa ministeryal na mga lingkod.
Lugar: Sa parate, sa Kingdom Hall o Assembly Hall.
Kualipikasyon: Nagbibiaheng paraataman, elder, o ministeryal na lingkod.
Pagpalista: An mga elder asin ministeryal na mga lingkod tinatawan nin imbitasyon kan paraataman nin sirkito. An nagbibiaheng mga paraataman iniimbitaran kan sangang opisina.
“Dawa ngani dakolon an itinotokdo sa paadalan sa halipot sanang panahon, pinapakosog kaiyan an mga elder asin tinatabangan sinda na magdanay na magayagaya asin ‘magpakalalaki’ sa paglilingkod ki Jehova. An bagohan sagkod haloy nang mga elder nakakanood na magin epektibo sa pagpastor asin lubos na magkasararo sa ‘saro sanang pag-iisip.’”—Quinn.
“Balanse nanggad an pagsasanay na ini kun mapadapit sa pagpararom kan satong pagpapahalaga sa espirituwal na mga bagay, pagpatanid sa sato dapit sa mga peligro, asin pagtao sa sato nin praktikal na mga suhestion sa pangangataman sa aripompon. Mabooton si Jehova ta tinatabangan nia kita.”—Michael.
Paadalan sa Paglilingkod Bilang Payunir
Katuyohan: Tabangan an mga payunir na ‘lubos na otobon an saindang ministeryo.’—2 Tim. 4:5, NW.
Lawig: Duwang semana.
Lugar: An sangang opisina an nagdedesisyon; sa parate, sa Kingdom Hall.
Kualipikasyon: Nakapagregular payunir na nin kisiera sarong taon.
Pagpalista: An kualipikadong mga payunir automatikong ilinilista asin iniimpormaran kan paraataman nin sirkito.
“Natabangan ako kan paadalan na atubangon an mga kadepisilan sa ministeryo asin sa sakong buhay,” an sabi ni Lily. “Nag-oswag na marhay an sakong paagi nin pag-adal, pagtokdo, asin paggamit nin Biblia. Mas andam na ako na tabangan an iba, suportaran an mga elder, asin makatabang sa pag-oswag kan kongregasyon.”
Si Brenda, na duwang beses nang nakapag-atender sa paadalan na iyan, nagsabi: “Nakatabang iyan sako na magtao nin 100 porsientong atension sa espirituwal na mga bagay, mapakosog an konsensia ko, asin magpokus sa pagtabang sa iba. Malinaw nanggad na bukas-palad si Jehova!”
Paadalan Para sa mga Magurang sa Kongregasyon
Katuyohan: Tabangan an mga elder kun paano aasikasohon an mga paninimbagan ninda sa kongregasyon asin mapararom an saindang espirituwalidad.
Lawig: Limang aldaw.
Lugar: An sangang opisina an nagdedesisyon; sa parate, sa Kingdom Hall o Assembly Hall.
Kualipikasyon: Nombradong elder.
Pagpalista: An mga elder iniimbitaran kan sangang opisina.
Mangnohon an sinabi kan nagkapira sa ika-92 na klase sa Estados Unidos:
“Nakinabang akong marhay sa paadalan, asin tinabangan ako kaiyan na ebalwaron an sakong sadiri saka aramon kun paano ko mapapangatamanan an mga karnero ni Jehova.”
“Andam ako na magin mas nakakapakosog sa gabos paagi sa pagdodoon kan pangenot na mga punto sa Kasuratan.”
“Gagamiton ko an pagsasanay na ini sa bilog kong buhay.”
School for Traveling Overseers and Their Wives
Katuyohan: Tabangan an mga paraataman nin sirkito asin distrito na magin mas epektibo sa paglilingkod sa mga kongregasyon mantang sinda ‘nagpapagal sa pagtaram asin sa pagtokdo.’—1 Tim. 5:17; 1 Ped. 5:2, 3.
Lawig: Duwang bulan.
Lugar: An sangang opisina an nagdedesisyon.
Kualipikasyon: Paraataman nin sirkito o distrito.
Pagpalista: Iniimbitaran kan sangang opisina an nagbibiaheng mga paraataman asin an saindang agom.
“Orog ming napahalagahan an pagkapayo ni Jesus sa organisasyon. Nahiling mi na kaipuhan parigonon an mga tugang na dinadalaw mi asin pakosogon an pagkasararo kan lambang kongregasyon. Itinadom kan kurso sa isip mi na dawa ngani an nagbibiaheng paraataman nagtatao nin sadol asin nin pagtatanos pa ngani kun beses, an pangenot niang pasohan iyo na tabangan an mga tugang na mahiling na sinda namomotan ni Jehova.”—Joel, enot na klase, 1999.
Bible School for Single Brothers
Katuyohan: Andamon an mayong agom na mga elder asin ministeryal na mga lingkod sa pag-asikaso sa dagdag pang mga paninimbagan sa organisasyon ni Jehova. An dakol na naggradwar iaasignar sa saindang nasyon, saen man may pangangaipo. An iba puedeng iasignar sa ibang nasyon kun sasabihon ninda na andam sindang maglingkod duman. An nagkapirang naggradwar puedeng iasignar bilang temporaryong special pioneer tanganing ponan asin pahiwason an gibohon sa hararayo asin napapasuway na mga lugar.
Lawig: Duwang bulan.
Lugar: An sangang opisina an nagdedesisyon; sa parate, sa Kingdom Hall o Assembly Hall.
Kualipikasyon: Mayong agom na mga brother na an edad nasa pag-oltanan nin 23 asin 62 anyos, may marhay na salud, asin nagmamawot na maglingkod saen man may mas dakulang pangangaipo. (Mar. 10:29, 30) Sinda dapat na nakapaglingkod na bilang regular payunir nin kisiera duwang taon asin kisiera duwang magkasunod na taon bilang elder o ministeryal na lingkod.
Pagpalista: Sarong miting an ginigibo sa pansirkitong asamblea tanganing magtao nin impormasyon para sa mga interesado.
“Huling nakapokus ako sa kursong ini, pinahiro ako kan espiritu ni Jehova na gumibo nin mga pagbabago sa sadiri ko,” an sabi ni Rick, na kaiba sa ika-23 na klase sa Estados Unidos. “Pag tinawan ka ni Jehova nin asignasyon, susuportaran ka nia. Nanodan ko na kun makonsentrar ako sa kabotan nin Dios, bako sa sadiri ko, papakosogon nia ako.”
“Nanodan kong apresyaron an organisasyon nin Dios bilang sarong milagro sa presenteng panahon,” an sabi ni Andreas, na naglilingkod sa Alemania. “Natabangan ako kan pagsasanay na ini na magin andam sa maabot na gibohon. Nanodan ko man sa dakol na halimbawa sa Biblia an pundamental na katotoohan na ini: An paglilingkod sa mga tugang asin ki Jehova nagbubunga nin tunay na kaogmahan.”
Bible School for Christian Couples
Katuyohan: Tawan nin espesyal na pagsasanay an mga mag-agom tanganing mas lubos sindang magamit ni Jehova asin kan saiyang organisasyon. An dakol na naggradwar iaasignar sa mga lugar sa saindang nasyon na igwa nin mas dakulang pangangaipo. An nagkapira puedeng iasignar sa ibang nasyon kun sasabihon ninda na andam sindang maglingkod duman. An mga naggradwar puedeng iasignar bilang temporaryong special pioneer tanganing ponan asin pahiwason an gibohon sa hararayo asin napapasuway na mga lugar.
Lawig: Duwang bulan.
Lugar: Ginigibo an paadalan na ini sa Estados Unidos, asin poon sa Setyembre 2012, gigibohon man ini sa piling mga sangay sa bilog na kinaban, sa parate, sa Kingdom Hall o Assembly Hall.
Kualipikasyon: Mga mag-agom na an edad nasa pag-oltanan nin 25 asin 50 anyos, may marhay na salud, nasa kamugtakan na maglingkod saen man may mas dakulang pangangaipo, asin igwa kan saboot na: ‘Uya ako, sugoa ako.’ (Isa. 6:8) Sinda dapat na kisiera duwang taon nang mag-agom asin nasa bilog na panahon na paglilingkod nin dai mababa sa duwang magkasunod na taon. An agom na lalaki dapat na sarong elder o ministeryal na lingkod nin dai mababa sa duwang magkasunod na taon.
Pagpalista: Sarong miting an ginigibo sa pandistritong kombension tanganing magtao nin impormasyon sa mga interesadong magpalista. Kun mayo kaiyan sa mga kombension sa saindong nasyon pero gusto mong mag-aplay, puede kang sumurat sa sangang opisina para sa dagdag na impormasyon.
“An walong semanang iyan nakakapabago nanggad nin buhay saka sarong dakulang oportunidad para sa mga mag-agom na gustong maglingkod nin orog pa! Determinado kami na papagdanayon an timbang na pamumuhay tanganing magamit mi sa madonong na paagi an samong panahon.”—Eric asin Corina, enot na klase, 2011.
Watchtower Bible School of Gilead
Katuyohan: Sanayon an mga estudyante na maglingkod bilang misyonero sa langtad sa matawong mga lugar, bilang nagbibiaheng paraataman, o bilang Bethelite. An pasohan iyo na magin mas maoswag asin organisado an gibohon sa langtad asin sa sangay.
Lawig: Limang bulan.
Lugar: Watchtower Educational Center, Patterson, New York, U.S.A.
Kualipikasyon: Mga mag-agom na yaon na sa sarong klase nin espesyal na bilog na panahon na paglilingkod—an boot sabihon, mga misyonerong dai pa nakapag- adal dian, mga espesyal payunir, nagbibiaheng mga paraataman, o mga Bethelite. Sinda dapat na magkaibanan sa siring na paglilingkod nin kisiera tolong magkakasunod na taon. Kaipuhan na sinda matibay magtaram, magbasa, asin magsurat nin Ingles.
Pagpalista: An mga mag-agom puedeng imbitaran kan Komite kan Sangay tanganing mag-aplay.
Si Lade asin Monique, na taga Estados Unidos, naglilingkod na ngonyan sa Aprika. “Inandam kami kan Gilead School na magduman saen man sa kinaban asin maglingkod kaiba kan namomotan tang mga tugang,” an sabi ni Lade.
Sinabi man ni Monique: “Mientras na inaaplikar ko an sakong nanonodan sa Tataramon nin Dios, nakakamate ako nin dakulang kagayagayahan sa sakong asignasyon. Para sa sako, an kagayagayahan na iyan dagdag pang ebidensia kan pagkamoot ni Jehova.”
School for Branch Committee Members and Their Wives
Katuyohan: Tabangan an mga miembro kan mga Komite kan Sangay mapadapit sa pagmanehar kan erokan na Bethel, pagtao nin atension sa mga bagay dapit sa paglilingkod na kalabot an mga kongregasyon, asin pangangataman sa mga sirkito asin distrito. Nakakanood man sinda manongod sa pagtradusir, pag-imprenta, asin pagpaktora nin literatura.
Lawig: Duwang bulan.
Lugar: Watchtower Educational Center, Patterson, New York, U.S.A.
Kualipikasyon: An brother dapat na miembro kan Komite kan Sangay o Komite kan Nasyon o inasignaran na magin siring.
Pagpalista: An mga brother asin an saindang agom iniimbitaran kan Namamahalang Grupo.
Si Lowell asin Cara, na kaiba sa ika-25 klase, naglilingkod sa Nigeria. “Napagirumdom ako na gurano man ako kasibot o ano man na gibohon an itinao sa sako, an makakapaogma ki Jehova iyo na gibohon an mga bagay-bagay segun sa paagi nia,” an sabi ni Lowell. “Idinoon man kan kurso na sa satong pagtratar sa iba, mahalagang marhay na arogon niato an pagkamoot na ipinapahiling ni Jehova sa mga lingkod nia.”
Sinabi man ni Cara, “An sarong komento na pighorophorop ko iyo ini: Kun dai ko maipaliwanag nin simple an sarong bagay, kaipuhan ko ngunang pag-adalan iyan bago magtokdo sa iba.”