Paano Sinasanay an mga Saksi ni Jehova na Maisagibo an Saindang Ministeryo?

An mga Saksi ni Jehova padagos na nag-aako nin pagsasanay sa gabos na aspekto kan buhay ninda bilang Kristiyano, kaiba na an saindang ministeryo. Iyan su ipinagbuot ni Jesus sa saiyang mga parasunod na dapat gibuhon—an paghuhulit saka pagtutukdo kan maugmang bareta kan Kahadian nin Diyos. (Mateo 24:14; 28:19, 20) Nag-aako kami kan pagsasanay na iyan sa mga pagtiripon mi kada semana saka sa samong taunan na mga kumbensiyon asin mga asembleya. An mga Saksi ni Jehova na may mga responsabilidad sa kongregasyon o sa organisasyon nag-aako nin dagdag pang pagsasanay sa espesyal na mga paadalan na basado sa Bibliya.

Sa artikulong ini

Anong pagsasanay an inaako kan mga Saksi ni Jehova?

Mga pagtiripon kan kongregasyon. Kada semana, nag-aatender kami sa duwang pagtiripon sa samong mga lugar nin pagsamba na inaapod na Kingdom Hall. Sa parati, ginigibo iyan sa tahaw kan semana asin sa puro kan semana. Puwedeng mag-atender diyan an gabos asin mayong pangungulekta nin kuwarta.

Pagtiripon sa tahaw kan semana. Tinutukduan kami kun paano mapapauswag an samong pagbasa, pakikipag-ulay, pagtaram sa publiko, asin paghuhulit saka pagtutukdo. Itinatao an pagsasanay paagi sa mga pahayag, pagtukar, demonstrasyon, asin video. Kaya, natatabangan kaming magin mas epektibo sa paghiras sa iba kan mensahe kan Bibliya saka sa pagtutukdo nin Bibliya sa mga interesado. Nakikinabang sa pagsasanay na ini an gabos na nag-aatender sa mga pagtiripon. Urog sa gabos, huli sa samong mga pagtiripon nagkukusog an pagtubod mi sa Diyos asin an pagkamuot mi sa saiya saka sa samong mga kapagtubod.
Pagtiripon sa puro kan semana. Igwa ini nin duwang kabtang. An inot iyo an sarong diskurso na basado sa Bibliya na espesipikong iinandam para sa publiko. An ikaduwa iyo an hapot-simbagan na pagtukar nin sarong artikulo sa pag-aadalan na edisyon kan An Torrengbantayan.a Tinutukar asin ipinapaliwanag kan mga artikulo an mga tema saka mga prinsipyo sa Bibliya na nakakatabang sa samong ministeryo saka sa buhay mi.

Mga asembleya asin kumbensiyon. Kada taon, igwa kami nin tulong darakulang pagtiripon na inaatenderan nin mga parahayag hali sa dakul na kongregasyon. An maugmang mga okasyon na ini nakapokus sa sarong espesipikong tema na basado sa Bibliya asin may kaibang mga pahayag, demonstrasyon, interbiyu, saka mga video. Arog kan samong mga pagtiripon sa kongregasyon, tinatabangan kami kan mga asembleya asin kumbensiyon na makanuod pa manungod sa Bibliya saka magin mas marahay na mga ministro kan maugmang bareta. Puwedeng mag-atender diyan an gabos asin mayong pangungulekta nin kuwarta.

Mga paadalan na basado sa Bibliya kan mga Saksi ni Jehova

Iniimbitaran an nagkapirang Saksi ni Jehova na magklase sa manlain-lain na paadalan na basado sa Bibliya para sa dagdag pang pagsasanay. Ano an mga paadalan na ini? Ano an katuyuhan kan mga iyan saka gurano kalawig? Asin sairisay an puwedeng magklase?

Paadalan sa Paglilingkod Bilang Payunir

Katuyuhan: Tanganing sanayon an mga ministrong naglilingkod nin bilog na panahon, na inaapod na mga payunir,b na magin mas epektibo sa gibuhon na paghuhulit asin pagtutukdo. An pag-aadal may kaibang mga pagtukar, demonstrasyon, pahayag, saka workshop.
Lawig: Anom na aldaw.
Mga kuwalipikadong magklase: Iniimbitaran na magklase an mga nakasarong taon na sa pagigin payunir. Puwedeng imbitaran giraray na magklase an mga haloy nang payunir na dai nakapagklase sa paadalan na ini sa naglihis na limang taon.

School for Kingdom Evangelizers

Katuyuhan: Tanganing magtao nin espesyal na pagsasanay sa eksperyensiyadong mga ministro na naglilingkod nin bilog na panahon. Mas papauswagon digdi an kakayahan kan mga estudyante sa paghuhulit saka pagtutukdo, asin pag-aadalan nindang marhay an mga tema sa Bibliya. An dakul sa mga naggradwar iinaasignar sa mga lugar kun sain kaipuhan nin dakul pang mga ebanghelisador.
Lawig: Duwang bulan.
Mga kuwalipikadong magklase: Puwedeng mag-aplay an mga payunir kun naaabot ninda an mga kahagadan asin nasa kamugtakan sinda na maglingkod sain man may pangangaipo.

Paadalan Para sa mga Elder sa Kongregasyon

Katuyuhan: Tanganing tabangan an mga elderc na magibo an saindang mga responsabilidad sa kongregasyon, arog kan pagtutukdo saka pagpapastor, asin tanganing pararumon an saindang pagkamuot sa Diyos saka sa mga kapagtubod ninda.—1 Pedro 5:2, 3.
Lawig: Limang aldaw.
Mga kuwalipikadong magklase: Iniimbitaran na magklase an bagong manombrahan na mga elder pati man an mga elder na dai nakapagklase sa paadalan na ini sa naglihis na limang taon.

School for Circuit Overseers and Their Wives

Katuyuhan: Tanganing sanayon an nagbibiyaheng mga ministro, na inaapod na mga paraataman nin sirkito,d na magibo nin mas epektibo an saindang mga responsabilidad. (1 Timoteo 5:17) Tatabangan man digdi an mga Kristiyanong elder na ini asin an saindang mga agom na magkaigwa nin urog pang pakasabot sa Kasuratan.
Lawig: Sarong bulan.
Mga kuwalipikadong magklase: Iniimbitaran na magklase an bagong mga paraataman nin sirkito asin an saindang mga agom pag nakasarong taon na sinda sa saindang asignasyon. Pagkatapos kaiyan, iimbitaran giraray sinda kada maglihis an mga limang taon.

Pang-Kahadian na Paadalan sa Pagmiministro

Katuyuhan: Tanganing tabangan an mga elder asin mga ministeryal na lingkode na magibo an saindang mga responsabilidad sa kongregasyon kauyon kan presenteng kamugtakan asin mga pangangaipo. (2 Timoteo 3:1) An paadalan ginigibo kada pirang taon.
Lawig: Lain-lain an lawig, pero sa parati sarong aldaw iyan.
Mga kuwalipikadong magklase: Mga paraataman nin sirkito, mga elder, asin mga ministeryal na lingkod.

Bethel Service School

Katuyuhan: Tanganing tabangan an mga naglilingkod sa Bethelf na magin mapanggana sa saindang trabaho asin tanganing mapararom an saindang pagkamuot sa Diyos saka sa lambang saro.
Lawig: Lima may kabangang aldaw.
Mga kuwalipikadong magklase: Kaipuhan na mag-atender an mga bagong miyembro na naglilingkod sa Bethel. Puwedeng imbitaran giraray na mag-atender an mga haloy nang naglilingkod sa Bethel na dai nakaatender sa paadalan na ini sa naglihis na limang taon.

Watchtower Bible School of Gilead

Katuyuhan: Tanganing tabangan an mga estudyante na urog na pahalagahan an nasusurat na Tataramon nin Diyos asin isabuhay an mga nanunudan ninda. (1 Tesalonica 2:13) An maimbod na Kristiyanong mga lalaki saka babayi na nagklase sa Gilead mas dakula an naitatabang sa organisasyon ni Jehova asin sa pagtutukdo nin Bibliya sa bilog na kinaban. An mga naggradwar diyan puwedeng iasignar na maglingkod sa sangang opisina o bilang misyonero—tibaad sa sadiri nindang nasyon o sa ibang nasyon.
Lawig: Limang bulan.
Mga kuwalipikadong magklase: Iniimbitaran kan mga sangang opisina na mag-aplay an piling mga ministro na naglilingkod nin bilog na panahon. An paadalan ginigibo sa Estados Unidos, sa Watchtower Educational Center sa Patterson, New York.

School for Branch Committee Members and Their Wives

Katuyuhan: Tanganing sanayon an mga miyembro kan Komite kan Sangayg na pangatamanan an mga gibuhon sa sangang opisina asin an espirituwal na mga aktibidad kan mga Saksi ni Jehova sa nasyon o sa mga nasyon na nasa pangangataman kan sangang opisina ninda.
Lawig: Duwang bulan.
Mga kuwalipikadong magklase: Iniimbitaran kan World Headquarters kan Mga Saksi ni Jehova an piling mga miyembro kan Komite kan Sangay kaiba an mga agom ninda para magklase sa paadalan, na ginigibo sa Watchtower Educational Center sa Patterson, New York.

Sa ano nakabase an pagsasanay na itinatao sa mga Saksi ni Jehova?

An Bibliya an panginot na librong ginagamit kan mga Saksi ni Jehova sa pagsasanay na inaako ninda. Nagtutubod kami na an Bibliya ipinasabong nin Diyos asin mababasa diyan an pinakamarahay na giya na makakatabang sa gabos na aspekto kan buhay mi bilang Kristiyano.—2 Timoteo 3:16, 17.

Nagbabayad daw an mga Saksi ni Jehova sa pagsasanay na naaako ninda?

Dai. Libre an pagsasanay asin pagtutukdo. An mga aktibidad kan Mga Saksi ni Jehova sinusuportaran nin boluntad na mga donasyon.—2 Corinto 9:7.

a An Bibliya asin an samong mga pantabang sa pag-adal nin Bibliya, kaiba an mga video, available sa samong website na jw.org.

b An payunir sarong marahay na arugan na bawtisadong Saksi—lalaki man o babayi—na naggagamit nin espesipikong bilang nin oras kada bulan sa paghiras sa iba kan mensahe sa Bibliya.

c An mga elder maimbod na mga Kristiyanong lalaki na nagtutukdo sa mga lingkod ni Jehova gamit an Bibliya asin nagtatabang saka nagpapakusog sa sainda. Mayo sindang suweldo sa paglilingkod ninda.

d An paraataman nin sirkito sarong ministro na naglilingkod nin bilog na panahon asin nagdadalaw kada semana sa iba-ibang kongregasyon sa saiyang sirkito. Pinapakusog niya an saiyang espirituwal na mga tugang paagi sa mga pahayag na basado sa Bibliya asin paagi sa pag-iba sa sainda sa ministeryo.

e An mga ministeryal na lingkod nagtatabang sa saindang mga tugang sa iba-ibang praktikal na mga paagi. Kaya, nagigibo kan mga elder na magtao nin dakul na panahon sa pagtutukdo asin pagpapastor.

f Bethel an apod sa mga sangang opisina kan Mga Saksi ni Jehova. An mga ministro na naglilingkod nin bilog na panahon diyan nagsusuportar sa mga aktibidad kan mga Saksi sa teritoryo na nasa pangangataman kan sangay.

g An Komite kan Sangay kompuwesto nin tulo o labi pang mga lalaki na maygurang sa espirituwal.

Paano nakikinabang an mga Saksi ni Jehova sa saindang pagsasanay?

“Dahil masusupgon ako, nasasakitan akong ipakipag-ulay an Bibliya sa mga dai ko bisto. Pero dahil sa pagsasanay na inako ko sa pagtiripon sa tahaw kan semana, nagkusog an kumpiyansa ko saka nag-uswag an paagi ko nin pagtutukdo. Dai na man ako nag-aalangan na makipag-ulay sa iba sa kongregasyon pati sa mga katrabaho ko.”—Natasha, Estados Unidos.
“Natabangan ako kan pagklase ko sa School for Kingdom Evangelizers na mas maipahiling an Kristiyanong mga kuwalidad, arog kan pagkamuot, pagpapasensiya, saka kabuutan. Kaya, namati ko na nagin akong mas marahay na Kristiyano, amigo, saka kapwa. Natabangan man ako kan paadalan kun paano mag-research nin mga tema sa Bibliya saka kun paano ipapaliwanag an Tataramon nin Diyos sa paaging naaabot an puso kan mga tawo.”—Stephen, Nigeria.
“Natabangan ako kan Paadalan Para sa mga Elder sa Kongregasyon na magin mas mapakumbaba para magin mas marahay na elder. Natukduan ako kan mga pahayag na kaipuhan kong arugon an halimbawa ni Jesus.”—Luca, Italy.
“Nanudan ko sa Pang-Kahadian na Paadalan sa Pagmiministro na mahalaga an pagigin madaling dulukon, mabuot, saka mamumuton sa pagtrato sa iba. Pag nagtatabang palan ako sa iba, dapat na pagkamuot an magpahiro sako, bako dahil lang ta obligasyon ko iyan na gibuhon.”—Samuel, United Kingdom.
“An Gilead school nakatabang samo na siyasaton an sadiri mi gamit an Tataramon nin Diyos na siring sa salming. (Santiago 1:22-25) Dahil diyan, nahiling mi kun ano an mga kaipuhan ming baguhon sa personalidad mi saka sa paglilingkod mi ki Jehova. Nanudan mi man na mas isipon an kapakanan kan iba kisa kan sa samo saka na an pagkamuot an magpahiro samo sa gabos ming sinasabi pati ginigibo.”—Elnathan asin Princess, Pilipinas.