Natural na mga Kalamidad—Patunay na Maringis an Diyos?

KUN ANO AN SINASABI KAN IBA: “An Diyos an namamahala sa kinaban, kun siring, saiya hali an natural na mga kalamidad; kaya talagang maringis siya.”

KUN ANO AN SINASABI KAN BIBLIYA: ‘An bilog na kinaban nasa kapangyarihan kan maraot.’ (1 Juan 5:19) Siisay an “maraot” na iyan? Ipinapamidbid siya kan Bibliya na si Satanas. (Mateo 13:19; Marcos 4:15) Masakit daw iyan paniwalaan? Isip-isipa ini: Kun si Satanas an may kontrol sa kinaban, kun siring, iniimpluwensiyahan niya an mga tawo na magin makasadiri, mahanab, asin hayakpit an isip arog niya. Bako daw na ipinapaliwanag kaiyan kun taano ta rinaraot nin tawo an kapalibutan? Dakul na eksperto an nagpapatanid na an pagraot sa kapalibutan sarong dahilan sa pagkaigwa nin natural na mga kalamidad—magsalang ini an kawsa, an minapagrabe, o ini an mas minasapeligro sa mga tawo.

Kun siring, taano ta tinutugutan nin Diyos na magkaigwa si Satanas nin grabeng impluwensiya? Makukua an simbag sa kapinunan kan kasaysayan nin tawo, kan an inot tang mga magurang nagrebelde sa Diyos bilang Tagapamahala. Puon kaidto, arog man kaiyan an ginibo kan kadaklan na tawo. Kan pinili nindang isikwal an pamamahala nin Diyos, an kinaban namugtak sa kamot kan kaiwal nin Diyos, si Satanas. Kaya inapod ni Jesus si Satanas na an namamahala, o ‘puon kan kinaban.’ (Juan 14:30) Mamamahala daw si Satanas sagkod lamang? Dai!

Si Jehovaa bakong matagas an puso kun manungod sa mga kasakitan na pinangyari ni Satanas. Sa katunayan, an Diyos apektadong marhay sa pagsakit nin tawo. Halimbawa, kun manungod sa kasakitan na inagihan kan Israel, sinabi kan Bibliya mapadapit sa Diyos: “Sa panahon kan gabos nindang kasakitan nasakitan man siya.” (Isaias 63:9, NW) Marahay sana ta sa dai na mahahaloy, tatapuson nin Diyos an maringis na pamamahala ni Satanas! Ninombrahan niya an saiyang Aki, si Jesu-Cristo, na magin matanos asin may hustisyang Hadi sagkod lamang.

KUN PAANO KA NAPAPALABOT: Sa pamamahala ni Jesus, gigibuhon niya an dai nagibo kan pamamahala ni Satanas—an pagprotektar sa mga tawo sa natural na mga kalamidad. Prinotektaran kaidto ni Jesus an mga disipulo niya sa makusugon na bagyo. Sabi kan Bibliya: ‘Sinaway niya an duros, patin nagsabi sa dagat: “Tuninong, untok.” Asin an duros nag-untok, asin nagtuninong.’ Sinabi kan mga disipulo: ‘Siisay daw ini, na minsan an duros asin an dagat nagkukuyog saiya?’ (Marcos 4:37-41) An pangyayaring iyan nagtatao sato nin kumpiyansa na poprotektaran ni Jesus an gabos na makinuyog na tawo sa pamamahala niya bilang Hadi.—Daniel 7:13, 14.