“Pakarhaya an Agihan kan Saimong mga Bitis” Para Umuswag Ka

KAN maghali sa Babilonya an banwaan nin Diyos kan 537 B.C.E., interesado si Jehova sa ruta ninda pa-Jerusalem. Sinabihan niya sinda: ‘[Pakarhayon] nindo an dalan kan banwaan. Pantaya nindo, pantaya nindo an lansangan. Halia nindo an mga gapo.’ (Isa. 62:10) Imahinara kun paano iyan posibleng ginibo kan ibang Judio. Posibleng pinakarhay kan nagkairinot an inaagihan nindang dalan, tibaad tinambakan an mga lubak saka hinarali an mga ulang. Siguradong nakatabang iyan sa nagsurunod sa sainda pabalik sa dagang tinubuan.

Arog man kaiyan an dalan pasiring sa espirituwal na mga pasuhan. Gusto ni Jehova na an gabos niyang lingkod maglakaw sa dalan na iyan na dai nauulang nin ano man na bagay na dai kaipuhan. Sinasadol kita kan Bibliya: “Pakarhaya an agihan kan saimong mga bitis, asin ta magigin sigurado an gabos mong dalan.” (Tal. 4:26, NW) Kita gabos makikinabang sa madunong na sadol na iyan nin Diyos.

GUMIBO NIN MADUNONG NA MGA DESISYON

Tibaad may nadangog ka nang nagsabi nin arog kaini manungod sa sarong tin-edyer: ‘Kadakul siyang magigibo’ o kaya, ‘Harayo an maaabot niya.’ An kadaklan na hoben may marahay na salud, alistong isip, asin makusog na pagmawot na magin mapanggana. Tama nanggad an sinasabi kan Bibliya: ‘An kamurawayan kan mga barobata [o, hoben] iyo an saindang kakusugan.’ (Tal. 20:29) Kun ginagamit kan sarong hoben an saiyang talento asin kusog tanganing paglingkudan si Jehova, maaabot niya an espirituwal na mga pasuhan asin magigin tunay na maugma.

Pero arog kan aram mo, pinapahalagahan man na marhay sa kinaban an kakayahan kan mga hoben. Pag matibay sa klase an sarong hoben na Saksi, tibaad engganyaron siya kan saindang guidance counselor, maestra, o kaklase na magkua nin halangkaw na edukasyon bilang paagi tanganing magin mapanggana sa sistemang ini nin mga bagay. O pag matibay sa isport, tibaad engganyaron siya kan iba na gibuhon iyan na karera. Arog daw kaiyan an sitwasyon mo, o may kamidbid ka na napapaatubang sa siring na panggigipit? Ano an makakatabang sa sarong Kristiyano na gumibo nin madunong na desisyon?

Makakatabang an mga prinsipyo sa Bibliya na makapaghanda kita sa paglakaw sa pinakamarahay na dalan nin buhay. ‘Girumduma an saimong Kaglalang sa mga aldaw nin saimong pagkahoben,’ an sabi kan Parahulit 12:1. Paano ‘gigirumdumon kan mga hoben na arog mo an saindong Kaglalang’ sa pinakamarahay na paagi?

Estudyaran an nangyari ki Erica na taga Sulnupan na Aprika. Mahilig siyang magkawat nin putbol. Kan 15 anyos siya, napili na siyang magkawat para sa team na pambato kan saindang nasyon. Nangangahulugan iyan na dai mahahaloy, puwede siyang ipadara sa Europa para sa pinakamarahay na pagsasanay, tapos puwede siyang magin propesyonal na parakawat nin putbol. Pero paano niya magigibo an konseho na ‘girumdumon an saiyang Kaglalang’? Ano man an manunudan mo digdi pati na kan iba pang hoben?

Nagpuon si Eric na makipag-adal nin Bibliya sa Mga Saksi ni Jehova kan nag-eeskuwela siya. Nanudan niya na permanenteng sosolusyunan kan Kaglalang an mga problema nin katawuhan. Nasabutan niya na mahalagang gamiton an saiyang panahon asin kusog sa paggibo kan kabutan nin Diyos. Dahil diyan, nagdesisyon si Eric na dai gibuhon na karera an pagkawat nin putbol. Imbes, nagpabawtismo siya asin nagin maigot sa espirituwal. Kan huri, nagin ministeryal na lingkod siya dangan naimbitaran na mag-adal sa Bible School for Single Brothers.

Posible kutanang nagin mayaman asin bantog si Eric kun siya nagin propesyonal na parakawat nin putbol. Pero napag-isip-isip niya na tama an prinsipyong ini sa Bibliya: ‘Naghuhuna an tawong mayaman na an kayamanan niya an mag-iingat saiya, arog kan halangkaw asin makusog na mga kudal sa palibot nin siyudad.’ (Tal. 18:11, BPV)b Iyo, an seguridad na garo baga makukua paagi sa kayamanan talagang imahinasyon o paghuna sana. Saro pa, an mga pursigidong magin mayaman sa parati garo man sana sinasaksak an saindang sadiri nin kadakul na kakulugan.—1 Tim. 6:9, 10.

Nakakaugma ta dakul na hoben an nakakamati nin kagaya-gayahan asin nagdadanay na seguridad paagi sa paglaog sa bilog na panahon na paglilingkod. Sinabi ni Eric: “Nakabali ako sa dakulang ‘team’ nin mga naglilingkod ki Jehova nin bilog na panahon. Iyan an pinakamarahay na team na puwede kong balihan. Nagpapasalamat ako ki Jehova huling ipinahiling niya sakuya an solamenteng dalan pasiring sa tunay na kaugmahan asin kapangganahan sa buhay.”

Kumusta man ika? Imbes na mag-abot nin kinabanon na mga pasuhan, taano ta dai pakarhayon nin may determinasyon an ‘saimong mga dalan’ sa paglilingkod ki Jehova paagi sa pagpapayunir?—Hilingon an kahon na “Kamtan an mga Pakinabang na Dai Makukua sa Unibersidad.”

HALION AN MGA ULANG SA SAIMONG DALAN

Mantang nagpapasyar sa sangang opisina sa Estados Unidos an sarong mag-agom, nahiling ninda na maugmahon an mga Bethelite duman na naglilingkod ki Jehova. Kan huri nagsurat an sister: “Nagin relaks na marhay kami sa rutina mi.” Kaya nagdesisyon sinda na urog na gamiton an saindang panahon asin kusog sa paglilingkod ki Jehova.

Garo baga dipisilon para sa mag-agom na gibuhon an kinakaipuhan na mga pagbabago. Pero sarong aldaw, pinag-isipan ninda an sinabi ni Jesus sa Juan 8:31, an teksto kan aldaw na idto, na nagsasabi: ‘Kun magdaranay kamo sa sakong mga tataramon, kamo mga tunay kong disipulo.’ Dahil diyan, nakapagsabi sinda: “Ano man an gibuhon ming pagsasakripisyo para pasimplehon an buhay, bawi nanggad.” Ipinabakal ninda an saindang dakulang harong, hinali an ibang bagay na nakakapagabat sa sainda, asin buminalyo sa sarong kongregasyon na nangangaipo nin tabang. Payunir na sinda ngunyan, saka nagtatabang man sa pagtugdok nin mga Kingdom Hall asin nagboboluntaryo sa mga pandistritong kumbensiyon. Ano an namamatian ninda? “Dai mi hunaon na arog palan kaini kaugma pag namumuhay nin simple, arog kan ipinapagibo sa sato kan organisasyon ni Jehova.”

PADAGOS NA MAGLAKAW SA DALAN PASIRING SA ESPIRITUWAL NA PAG-USWAG

Nagsurat si Solomon: ‘Ituruhok mo an saimong mga mata sa inutan; tanawa an saimong padudumanan.’ (Tal. 4:25, BPV) Arog nin drayber na nakaturuhok sa inaagihan na tinampo, dai kita dapat magpadisturbo sa mga bagay na puwedeng makaulang sa sato na magkaigwa asin mag-abot nin espirituwal na mga pasuhan.

Anong espirituwal na mga pasuhan an puwede mong abuton? Marahay nanggad na pasuhan an paglaog sa bilog na panahon na paglilingkod. Puwede man an paglilingkod sa haraning kongregasyon na nangangaipo nin eksperyensiyadong mga parahulit tanganing makobrehan an mahiwas na teritoryo. O tibaad kadakul nin maiigot na parahayag sa sarong kongregasyon pero kulang man an mga elder asin ministeryal na lingkod. Puwede ka daw magtabang paagi sa arin man digdi? Taano ta dai makipag-ulay sa saindong paraataman nin sirkito tanganing maaraman mo kun baga puwede ka? Kun gusto mong maglingkod sa mas harayong lugar, puwede kang maghagad nin impormasyon dapit sa hararayong kongregasyon na nangangaipo nin tabang.c

Balikan ta an eksena na sinambit sa Isaias 62:10. Posibleng nagparatrabaho an ibang Judio tanganing patagon an daga asin halion an mga ulang sa agihan pabalik sa saindang dagang tinubuan tangani na an banwaan nin Diyos makaabot sa destinasyon ninda. Kun naghihinguwa kang abuton an mga pasuhan sa sagradong paglilingkod, dai magsuko. Sa tabang nin Diyos, maaabot mo man iyan. Padagos na maghagad ki Jehova nin kadunungan mantang pighihinguwa mong halion an mga nakakaulang sa saimo. Dai mahahaloy, siguradong mahihiling mo kun paano ka niya matatabangan na ‘pakarhayon an agihan kan saimong mga bitis.’—Tal. 4:26, NW.