Tugutan na Pasarigon Asin Ingatan ni Jehova an Relasyon Nindo Bilang Mag-agom

1, 2. (a) Taano ta naiwara kan 24,000 na Israelita an saindang marahayon na bendisyon? (b) Taano ta mahalaga para sa sato an suanoy na pangyayaring iyan?

KAN madali nang maglaog an nasyon nin Israel sa Dagang Panuga, manampulong ribong lalaki sa sainda an ‘nakagibo nin [seksuwal na imoralidad] sa mga aking babayi nin Moab.’ Bilang resulta, 24,000 an ginadan ni Jehova. Isip-isipa iyan—madali na kutang makua kan mga Israelita an saindang mana na haloy na nindang hinahalat, pero naiwara ninda an marahayon na bendisyon na iyan huling nagpadaog sinda sa sugot.​—Bil. 25:1-5, 9.

² Isinurat an kapaha-pahamak na halimbawang iyan “sa pagpatanid sato” na inabutan kan mga katapusan kan mga sistema nin mga bagay. (1 Cor. 10:6-11) Ngunyan, sa ultimong kabtang kan ‘mga huring aldaw,’ an mga lingkod nin Diyos madali nang maglaog sa matanos na bagong kinaban. (2 Tim. 3:1; 2 Ped. 3:13) Pero, makamumundo ta nagpabaya an ibang mga parasamba ni Jehova. Nasiod sinda nin imoralidad asin inani ninda an mapait na mga resulta kan imoral na paggawi. Namemeligrong maiwara kan siring na mga indibidwal an daing sagkod na mga bendisyon.

3. Taano ta kaipuhan nin mag-agom an paggiya asin proteksiyon ni Jehova? (Hilingon an ritrato sa kapinunan kan artikulo.)

³ Huli sa damat nin imoralidad ngunyan, kaipuhan kan mga agom na lalaki asin babayi an paggiya asin proteksiyon ni Jehova tanganing dai masayang an paghihinguwa ninda na ingatan an saindang relasyon bilang mag-agom. (Basahon an Salmo 127:1.) Pag-uulayan ta kun paano mapaparigon nin mag-agom an relasyon ninda paagi sa pag-iingat kan saindang puso, pagigin dayupot sa Diyos, pagsulot kan bagong personalidad, pagpapadanay nin makahulugan na komunikasyon, asin pagtao kan nanunungod sa agom.

INGATAN AN SAINDONG PUSO

4. Taano ta may mga Kristiyano na nakagibo nin imoralidad?

⁴ Paano posibleng matentaran an sarong Kristiyano na makagibo nin imoralidad? Parating nagpupuon sa mga mata an kapaha-pahamak na dalan nin imoralidad. An sabi ni Jesus: ‘An gabos na maghiling sa sarong babayi dahil sa [salang pagmawot] saiya, nagkasala na saiya nin pagsambay sa saiyang puso.’ (Mat. 5:27, 28; 2 Ped. 2:14) An dakul na Kristiyano na nakagibo nin imoralidad pinaluya an moral na depensa ninda paagi sa paghiling nin pornograpiya, pagbasa nin malalaswang babasahon, o paghiling nin makababaldi asin malaswang mga bagay sa Internet. An iba pinabayaan an sadiri ninda na malibang kan malaswa asin bulgar na mga pelikula, stage show, o programa sa telebisyon. May mga naglaog sa mga nightclub asin naghiling nin mga pasali na may naghuhuba (strip show) o naglaog sa mga massage parlor na may mga nakakapukaw sa seksong masahe.

5. Taano ta kaipuhan tang ingatan an satong puso?

⁵ An iba nagpadaog sa sugot huling naghanap sinda nin atensiyon sa ibang tawo na bako nindang agom. Sa kinaban na kulang nin pagpupugol asin nauugma sa paggibo kan gabos na klase nin imoralidad, madalion sana para sa madaya asin desperadong puso na magkaigwa nin romantikong pagmati sa iba. (Basahon an Jeremias 17:9, 10.) Si Jesus nagsabi: ‘Sa puso minahali an [maraot na] mga kaisipan, mga paggadan, mga pagsambay, asin mga pakisaro.’​—Mat. 15:19.

6, 7. (a) Sa anong makasalan na gibo puwedeng darahon nin madayang puso an sarong tawo? (b) Paano malilikayan an pagbagsak sa moral?

⁶ Oras na makagamot sa saindang madayang puso an salang mga pagmawot, an duwang tawo na parehong naaakit sa lambang saro mapuon nang mag-ulay-ulay dapit sa mga bagay na dapat sa agom sana ninda sinasabi. Dai mahahaloy, naggigibo na sinda nin paagi tanganing pirming maghilingan, asin an garo man daa dai tinutuyo asin garo baga nagkataon sanang pagkahilingan mas parati nang nangyayari. Mantang mas naglalaad an pagmati ninda, nagluluya man an moral na depensa ninda. Mantang nagigin sindang mas dayupot, nagigin mas dipisil man na pumundo, dawa ngani aram nindang sala an saindang ginigibo.​—Tal. 7:21, 22.

⁷ Luway-luway na natutumpag an espirituwal na depensa mantang an salang mga pagmawot asin pag-uulay nakakaabot na sa pagkaputan nin kamot, paghadukan, pagkarinyo, grabeng paghinapiyapan na nakakapukaw nin hurot, asin iba pang kapahayagan nin kapadangatan na para sana sa agom ninda. Sa katapos-tapusi, ‘nabubutong sinda asin naaakit kan sadiri nindang kamawutan.’ Kun an kamawutan nangidam na, iyan ‘mangangaki nin kasalan’​—sa kasong ini, nin seksuwal na imoralidad. (Sant. 1:14, 15, NW) Makamumundo nanggad! Nalikayan kuta an biyong pagbagsak na ini sa moral kun tinugutan ninda si Jehova na pakusugon an saindang paggalang sa kabanalan nin pag-aguman. Pero paano?

PADAGOS NA MAGIN DAYUPOT SA DIYOS

8. Paano nagtatao nin proteksiyon sa moral an pakikikatuod ki Jehova?

⁸ Basahon an Salmo 97:10. An pakikikatuod ki Jehova mahalagang marhay na gikanan nin proteksiyon sa moral. Mantang naaaraman ta an magayunon na mga kuwalidad nin Diyos asin naghihinguwa kitang magin ‘mga paraarog sa Diyos, siring sa mga aking namumutan, asin maglakaw sa pagkamuot,’ mapapakusog kitang isikwal an ‘pagsambay asin an gabos na karumputan.’ (Efe. 5:1-4) An mga mag-agom na nakakaaram na ‘huhukuman nin Diyos an mga parapakisaro asin an mga parasambay,’ nagmamaigot na magin kagalang-galang asin daing digta an saindang relasyon bilang mag-agom.​—Heb. 13:4.

9. (a) Paano linabanan ni Jose an sugot na gumibo nin imoral? (b) Ano an manunudan ta sa halimbawa ni Jose?

⁹ Pinaluya kan ibang maimbod na mga lingkod nin Diyos an saindang moral na depensa paagi sa pakikiiba-iba sa mga katrabaho nindang bakong Saksi pagkatapos nin trabaho. Dawa oras nin trabaho, puwedeng magkaigwa nin mga sugot. Sa lugar kan trabaho ni Jose, naaraman kan guwapong hoben na ini na nagugustuhan siyang marhay kan agom kan saiyang amo. Aroaldaw siyang inaakit kaini. Sa kahuri-hurihi, ‘kinaptan niya siya sa bado, na nagsabi: “Dumurog ka sako!”’ Pero nakadulag si Jose. Ano an nakatabang ki Jose na mapagdanay na makusog an saiyang espirituwal na depensa dawa sa nakakatentar na sitwasyon na iyan? An nagprotektar sa kalinigan kan saiyang moral asin integridad iyo an marigon na determinasyon niya na dai maraot an saiyang relasyon sa Diyos. Huli sa saiyang marigon na paninindugan, nawaran siya nin trabaho asin bakong makatanusan na ibinilanggo, pero binendisyunan siya ni Jehova. (Gen. 39:1-12; 41:38-43) Nasa trabaho man o pribadong lugar, kaipuhan na lumikay an mga Kristiyano sa mga nakakatentar na sitwasyon kaiba an saro na bako nindang agom.

MAGSULOT KAN BAGONG PERSONALIDAD

10. Anong proteksiyon sa moral an itinatao kan bagong personalidad?

¹⁰ Mahalagang kabtang an bagong personalidad sa espirituwal na depensa nin mag-agom huling iyan ‘linalang suno sa [kabutan nin] Diyos sa katanusan asin sa [kaimbudan].’ (Efe. 4:24) An mga nagsulot kan bagong personalidad na ini ‘ginagadan’ an mga kabtang kan saindang hawak kun dapit sa ‘pagsambay, karumputan, hurot, maraot na mawot, asin kaaraan.’ (Basahon an Colosas 3:5, 6.) An tataramon na ‘ginagadan’ nagpapahiling na dapat ginigibo ta an gabos tanganing labanan an imoral na mga pagmawot kan laman. Lilikayan ta an ano man na makakapukaw kan satong seksuwal na pagmawot sa saro na bako tang agom. (Job 31:1) Mantang namumuhay kita kauyon kan kabutan nin Diyos, nanunudan tang ‘ikaungis an maraot’ asin ‘dumayupot sa marahay.’​—Roma 12:2, 9.

11. Paano mapapakusog kan bagong personalidad an relasyon nin mag-agom?

¹¹ An bagong personalidad nagpapabanaag ‘kan ladawan kan [Saro] na naglalang kaiyan,’ si Jehova mismo. (Col. 3:10) Nagbubunga nanggad nin bendisyon kun pinaparigon kan mga agom na lalaki asin babayi an saindang moral na depensa paagi sa pagpahiling nin ‘pagkahirak, kabuutan, kapakumbabaan, kahuyuan, asin pakatios’! (Col. 3:12) Mas magkakasaro man sinda bilang mag-agom kun ‘tutugutan ninda an katuninungan ni Cristo na maghadi sa saindang mga puso.’ (Col. 3:15) Nakakakontento nanggad sa mga mag-agom an ‘pagkaigwa nin mamumuton na kapadangatan sa lambang saro’! Nauugma sinda na “manginot” o iyo an mag-inot sa “pagtaong onra sa lambang saro.”​—Roma 12:10, NW.

12. Para sa saimo, anong mga kuwalidad an mahalaga tanganing magin maugma an relasyon nin mag-agom?

¹² Kan haputon kun anong mga kuwalidad an nakakatabang sa pagigin maugma kan saindang relasyon bilang mag-agom, si Sid nagsimbag: “An pagkamuot an panginot na kuwalidad na pirmi ming pinagmamaigutan na ipahiling. Naaraman mi man na mahalagang marhay an kahuyuan.” Nag-uyon diyan an saiyang misis na si Sonja asin nagsabi man ini: “Talagang mahalagang marhay na kuwalidad an kabuutan. Asin pinagmamaigutan mi man na ipahiling an kapakumbabaan, dawa bako iyan pirming pasil.”

PAPAGDANAYON AN MAKAHULUGAN NA KOMUNIKASYON

13. Ano an saro sa pinakamarahay na paagi tanganing magdanay na marigon an relasyon nin mag-agom, asin taano?

¹³ Mayong duda na an mabuot na pagtaram an saro sa pinakamarahay na paagi tanganing magdanay na marigon an relasyon nin mag-agom. Makamumundo nanggad kun mas magalang pa sinda kun nakikipag-ulay sa mga estranghero o sa mga ataman nindang hayop kisa kun nakikipag-ulay sa agom ninda! Kun an mag-agom daing kontrol na nagtitinaraman nin ‘kapaitan, kaanggutan, kaungisan, karibukan, asin rilibakan,’ luway-luway nindang rinaraot an espirituwal na depensa kan saindang pag-aguman. (Efe. 4:31) Imbes na paluyahon nin daing untok na pagtatsar o makulog na panunuya an relasyon nindang mag-agom, kaipuhan na pasarigon ninda iyan paagi sa mga tataramon na mabuot, mamumuton, asin mapagmalasakit.​—Efe. 4:32.

14. Ano an mga dapat tang likayan na gibuhon?

¹⁴ An Bibliya nagsasabi na igwa nin ‘panahon nin pag-alo’ o dai paggirong. (Par. 3:7) Dai ini nangangahulugan na dai na kita magirong, ta maulang iyan sa kinakaipuhan na pag-uulay. “Sa arog kaiyan na sitwasyon,” an sabi nin sarong agom na babayi sa Alemania, “an dai paggirong makakakulog sa saimong agom.” Pero, idinugang niya: “Dawa ngani masakit kun minsan na magin kalmado pag nai-stress, bako man marahay na iluwas na sana an kaanggutan. Tapos, bigla kang makakataram o makakagibo nin sarong bagay na makakakulog sa agom mo, asin papagrabehon sana kaiyan an sitwasyon.” Dai mareresolberan nin agom na lalaki asin babayi an problema ninda paagi sa pagsilyakan o dai paggirungan. Imbes, mapaparigon ninda an saindang relasyon bilang mag-agom kun dai ninda tutugutan na magin ugali na an pagkontrahan o pabayaan na maglawig an saindang diskusyunan.

15. Paano mapapakusog nin marahay na komunikasyon an relasyon nin mag-agom?

¹⁵ Napapakusog an bugkos nin pag-aguman kun matao nin panahon an mag-agom na sabihon sa kada saro an saindang mga namamatian asin opinyon. Parehong importante kun ano an sinasabi ta asin kun paano ta iyan sinasabi. Kaya, dawa sa masakit na mga sitwasyon, hinguwahon na magin mabuot sa saimong pagtaram, sa tono man nin boses o sa ginagamit mong mga tataramon. Sa siring, magigin mas madali para sa agom mo na magdangog sa saimo. (Basahon an Colosas 4:6.) Mapaparigon nin agom na lalaki asin babayi an relasyon ninda bilang mag-agom paagi sa marahay na komunikasyon na an sinasabi sana sa saindang agom iyo an ‘mga tataramon na makakaparahay saka tama sa panahon, nganing pakinabangan.’​—Efe. 4:29, BPV.a

ITAO AN NANUNUNGOD SA AGOM

16, 17. Taano ta importante para sa mga mag-agom na magin mapagrisa sa emosyonal asin seksuwal na pangangaipo kan lambang saro?

¹⁶ Mapapakusog man nin mag-agom an saindang relasyon kun iniinot ninda an ikakarahay asin kapakanan kan saindang agom kisa sa sadiri ninda. (Fil. 2:3, 4) Kaipuhan na magin mapagrisa an agom na lalaki siring man an agom na babayi sa emosyonal asin seksuwal na pangangaipo kan saindang agom.​—Basahon an 1 Corinto 7:3, 4.

¹⁷ Makamumundo, may ibang agom na habong magin karinyoso o magpahiling nin seksuwal na kadayuputan, asin para sa ibang mga lalaki, nababawasan daa an pagigin lalaki ninda kun nagpapahiling sinda nin kapadangatan. An Bibliya nagsasabi: “Kamong mga agom na lalaki maninigo nindong hinguwahon na sabuton an saindong agom na kaibanan nindo.” (1 Ped. 3:7, Phillips) Kaipuhan na masabutan kan agom na lalaki na bako sanang pagdudurog an kalabot sa nanunungod sa saiyang agom. Mas posibleng ikaugma nin agom na babayi an seksuwal na relasyon kun an agom niya mamumuton asin karinyoso sa gabos na panahon bako sana kun sinda nagdudurog. Kun pareho sindang nagpapahiling nin mamumuton na konsiderasyon, posibleng marhay na mapaniguan ninda an emosyonal asin pisikal na mga pangangaipo kan kada saro.

18. Paano mapapakusog nin mga agom na lalaki asin babayi an bugkos kan saindang pag-aguman?

¹⁸ Dawa ngani mayo nin puwedeng ipanarahutan sa pagigin bakong maimbod sa agom, an kawaran nin kapadangatan puwedeng magin dahilan na an agom maghanap nin kapadangatan asin kadayuputan sa ibang tawo. (Tal. 5:18; Par. 9:9) Kaya, sinasadol kan Bibliya an mga mag-agom: ‘Dai nindo ipagsayuma an [nanunungod] sa saindong agom, apuwera sana kun nagkauyon kamong duwa na dai nguna sa halipot na panahon.’ Taano? ‘Ta tibaad sugutan kamo ni Satanas huli sa dai nindo pakapugol sa sadiri.’ (1 Cor. 7:5, BPV) Makamumundo nanggad kun tutugutan nin mag-agom na aprobetsaran ni Satanas an ‘dai ninda pakapugol sa sadiri’ asin magpadaog sa sugot asin makakomiter nin pagsambay an siisay man sa sainda! Sa kabaliktaran, kun an kada saro sa mag-agom hinahanap an ‘ikakarahay nin iba, bakong an ikakarahay kan sadiri niya,’ asin itinatao an nanunungod sa saiyang agom bilang kapahayagan kan saiyang pagkamuot imbes na obligasyon sana, mapapakusog kan seksuwal na relasyon an bugkos kan pag-aguman.​—1 Cor. 10:24, BPV.

PADAGOS NA INGATAN AN SAINDONG PAG-AGUMAN

19. Ano an determinado tang gibuhon, asin taano?

¹⁹ Madali na kitang lumaog sa matanos na bagong kinaban. Kaya ikakapahamak ta kun mapadaog kita sa makalaman na mga pagmawot arog kan nangyari sa 24,000 na Israelita sa Kapatagan nin Moab. Pagkatapos na isaysay an makasusupog asin makamumundong pangyayaring iyan, nagpatanid an Tataramon nin Diyos: ‘An naghuhuna na siya nagtitindog mag-ingat na dai siya mapukan.’ (1 Cor. 10:12) Kaya, mahalagang marhay na pasarigon ta an relasyon ta sa satong agom paagi sa danay na pagigin maimbod sa satong langitnon na Ama asin sa satong agom. (Mat. 19:5, 6) Ngunyan, urog kisa kasuarin man, kaipuhan tang ‘maghinguwa nin maigot na makua kita sa katuninungan, dai nin digta asin dai nin kanawayan.’​—2 Ped. 3:13, 14.