Kun Taano ta Mahalaga Pa Man Giraray an Kababaan nin Buot
“An kadunungan nasa mga hababa an buot.”—TAL. 11:2, NW.
1, 2. Taano ta isinikwal nin Diyos si Saul? (Hilingon an ritrato sa itaas.)
KAN nagpupuon pa sanang maghadi si Hading Saul kan suanoy na Israel, saro siyang tawong irinerespeto saka may kababaan nin buot. (1 Sam. 9:1, 2, 21; 10:20-24) Pero dai nahaloy, sunod-sunod na kapangahasan an saiyang ginibo. Kan an propeta nin Diyos na si Samuel dai mag-abot sa Gilgal sa sinabi kaining aldaw, nalangkag si Saul. Nagpepreparar na an mga Filisteo para sumakyada, asin binabayaan na si Saul kan mga Israelita. Tibaad naisip niya, ‘Kaipuhan kong gumibo nin paagi—ora mismo.’ Siya na an nagdulot kan atang sa Diyos, pero bako siyang awtorisado na gibuhon ini. Kaya, dai naugma si Jehova.—1 Sam. 13:5-9.
2 Kan mag-abot si Samuel sa Gilgal, sinaway niya si Saul. Pero, imbes na akuon an pagtatanos sa saiya, nagdahilan si Saul, binasol an iba, asin pinalataw na mayo man nin maraot sa ginibo niya. (1 Sam. 13:10-14) Puon diyan, dakul na iba pang kapangahasan an ginibo ni Saul. Kaya naiwara niya an saiyang pagkahadi asin, an mas mahalaga, an pag-uyon ni Jehova. (1 Sam. 15:22, 23) Magayon an kapinunan kan buhay ni Saul, pero trahedya an nagin katapusan kaiyan.—1 Sam. 31:1-6.
3. (a) Ano an iniisip nin dakul kun dapit sa kababaan nin buot? (b) Anong mga hapot an sisimbagon niyato?
3 Sa kinaban na ini na grabe an kompetisyon, dakul an naghuhuna na tanganing magin mapanggana dapat sindang magin iba sa kadaklan. Kaya isinasakripisyo ninda an kababaan nin buot, na ipinaghahambog an saindang sadiri para magin garo baga mas matibay sinda sa iba. Halimbawa, sarong sikat na aktor na nagin pulitiko an minsan nagsabi: “Sa ano man na paagi, mayo sa bokabularyo ko an kababaan nin buot—saka dai man lugod mangyari na maikonektar iyan sako.” Pero, taano ta mahalaga pa man giraray ngunyan an kababaan nin buot? Ano an kababaan nin buot, asin ano an bako? Asin paano kita magdadanay na may kababaan nin buot dawa nasa masasakit na sitwasyon o kun ginigipit kita nin iba? Sa artikulong ini, sisimbagon ta an inot na duwang hapot. An ikatulong hapot sisimbagon sa masunod na artikulo.
KUN TAANO TA MAHALAGA AN KABABAAN NIN BUOT
4. Ano an kapangahasan?
4 Ipinapahiling kan Bibliya na an kapangahasan iyo an kabaliktaran kan kababaan nin buot. (Basahon an Talinhaga 11:2.) Kaya, sarong kadunungan nanggad an paghagad ni David nin tabang ki Jehova na ‘pugulan siya sa mga kapaabaw-abawan’ o kapangahasan. (Sal. 19:13) Ano an kapangahasan? Masasabing pangahas an saro kun ginigibo niya an sarong bagay na bako man siyang awtorisado na gibuhon, tibaad huli ta mapalangkaw siya o mayo siyang tiyaga na maghalat. Huling bako kitang perpekto, gabos kita nagigin pangahas kun minsan. Pero arog kan ipinapahiling sa nangyari ki Hading Saul, kun magin ugali na niyato an pagigin pangahas, dai mahahaloy, maaanggot sa sato an Diyos. Arog kaini an sinasabi kan Salmo 119:21 mapadapit ki Jehova: “Sinasagwi mo an mga [pangahas].” (An Banal na Biblia) Taano?
5. Taano ta seryosong bagay kun magigin kitang pangahas?
5 Mas magabat pa an kapangahasan kisa sa dai tinutuyong mga salang gibo. Inot, kun kita pangahas, dai ta iginagalang si Jehova bilang satong Diyos asin Tagapamahala. Ikaduwa, kun ginigibo ta an mga bagay na bako man kita awtorisado, posibleng marhay na makaiwal ta an iba. (Tal. 13:10) Asin ikatulo, mapapasupog kita o magigin kitang mangmang pa ngani para sa iba pag nahiling o naaraman nindang may ginibo kitang kapangahasan. (Luc. 14:8, 9) Mayong marahay na ibubunga kun magigin pangahas kita. Arog kan ipinapahiling kan Bibliya, an kababaan nin buot iyo an dapat na magin paggawi niyato.
KUN ANO AN KABABAAN NIN BUOT
6, 7. Ano an kapakumbabaan, asin paano iyan konektado sa kababaan nin buot?
6 Magkakonektar na marhay an kababaan nin buot asin kapakumbabaan. Sa Bibliya, an kapakumbabaan nanunungod sa pagigin bakong mapalangkaw o mapaabaw-abaw. Inaapod iyan na kababaan nin isip. (Fil. 2:3) Sa pangkagabsan, an saro na mapakumbaba, saro man na hababa an buot, saro na aram kun sagkod sain an kakayahan asin nagibo niya, na inaadmitir an saiyang mga sala, asin na andam na mag-ako nin mga suhestiyon saka bagong ideya. Nauugmang marhay si Jehova sa mga mapakumbaba.
7 Ipinapahiling sa Bibliya na an saro na hababa an buot, midbid an sadiri niya asin aram an saiyang mga limitasyon. Sa orihinal na lengguwahe kan teksto, an pagduduon garo yaon sa kun ano an dapat na magin pagtratar sa iba nin saro huli sa pakaaram niya kan saiyang limitasyon.
8. Ano an nagkapirang senyales na nagigin na kitang pangahas?
8 Nuarin masasabing nagpupuon na kitang mag-isip o gumawi na may kapangahasan? Pag-isipan an pira sana sa mga senyales. Tibaad mag-isip na kita na mas importante kita sa iba huling kita, o an saro na midbid ta, may pribilehiyo sa kongregasyon. (Roma 12:16) Tibaad gustong-gusto niyato na sa satong sadiri ipinopokus kan mga tawo an saindang atensiyon. (1 Tim. 2:9, 10) O tibaad dinidiktahan na niyato an iba kan dapat o dai ninda dapat gibuhon basado sa satong personal na opinyon o dahil may pribilehiyo o katungdan kita sa kongregasyon. (1 Cor. 4:6) Sa parati, pag minagawi kita nin arog kaini, dai niyato naririsa na nagigin na palan kitang pangahas.
9. Taano ta nagigin pangahas an iba? Magtao nin sarong halimbawa sa Bibliya.
9 Puwedeng magin pangahas an siisay man pag pinabayaan niya, dawa temporaryo lang, na madaog siya kan saiyang mga pagmawot o kaluyahan. Dakul an nagin pangahas huling gusto nindang umawon kan iba, nauuri sinda sa iba, asin dai ninda makontrol an saindang kaanggutan. Sa arog kaining mga gibo kan laman nagpadaog an ibang mga karakter sa Bibliya arog ni Absalom, Uzias, saka Nabucodonosor, asin tinukduan sinda ni Jehova nin leksiyon huli sa saindang kapangahasan.—2 Sam. 15:1-6; 18:9-17; 2 Cron. 26:16-21; Dan. 5:18-21.
10. Taano ta dapat niyatong likayan na husgaran an motibo kan iba? Magtao nin sarong halimbawa sa Bibliya.
10 Pero may iba pang dahilan kun taano ta tibaad nagigin pangahas kun minsan an saro. Halimbawa, hilinga an duwang pangyayari sa Bibliya na nasa: Genesis 20:2-7 asin Mateo 26:31-35. An dahilan daw kan garo kapangahasan ni Abimelec asin Pedro iyo an saindang kaluyahan sa laman? O dai lang ninda aram an gabos na detalye, o nagin lang sindang pabigla-bigla? Huling dai kita nakakabasa nin puso, sarong kadunungan saka pagpahiling nin pagkamuot kun dai ta huhusgaran an motibo kan iba.—Basahon an Santiago 4:12.
AN KABTANG MO SA AREGLO NIN DIYOS
11. Ano an koneksiyon kan kababaan nin buot sa pakasabot niyato sa satong kabtang sa areglo nin Diyos?
11 An kapinunan talaga kan kababaan nin buot iyo na kun malinaw na niyatong nasasabutan an satong kabtang sa areglo nin Diyos. Bilang sarong Diyos nin areglo, tinatawan ni Jehova an lambang saro sa sato nin kabtang sa mga gibuhon kan saiyang organisasyon. Iba-iba an satong asignasyon sa kongregasyon, pero gabos kita kaipuhan. Huli sa daing kapantay na kabuutan ni Jehova, gabos kita tinawan niya nin manlain-lain na balaog, talento, kakayahan, o abilidad. Kun may kababaan kita nin buot, gagamiton ta an mga ini tanganing pamurawayon siya asin tabangan an iba. (Roma 12:4-8) Iyo, pinagtitiwalaan kita ni Jehova, tinatawan nin onra, saka responsabilidad, asin linalauman niyang gagamiton ta iyan sa paaging gusto niya.—Basahon an 1 Pedro 4:10.
Ano an manunudan niyato sa halimbawa ni Jesus kun matawan kita nin bagong asignasyon? (Hilingon an parapo 12-14)
12, 13. Taano ta dai niyato dapat ipagngalas kun sa pana-panahon nagbabago an kabtang niyato sa areglo nin Diyos?
12 Pero, bakong permanente an satong asignasyon sa areglo nin Diyos. Puwedeng magbago iyan sa paglihis nin panahon. Pag-isipan an halimbawa ni Jesus. Sa primero, siya sana an kaibanan ni Jehova. (Tal. 8:22) Dangan nagtabang siyang lalangon an mga anghel, an uniberso, asin an tawo. (Col. 1:16) Kan huri, tinawan si Jesus nin bagong asignasyon sa daga. Inot, mamumundag siya bilang umboy, dangan magigin siyang adulto. (Fil. 2:7) Pagkatapos niyang magadan bilang atang, nagbalik si Jesus sa langit bilang espiritu tanganing magin Hadi kan Kahadian nin Diyos na inestablisar kan 1914. (Heb. 2:9) Asin bako iyan an huring pagbabago sa saiyang asignasyon. Pagkatapos kan saiyang Sangribong Taon na Paghadi, an Kahadian itatao ni Jesus ki Jehova “tanganing an Diyos lubos na mangibabaw sa gabos.”—1 Cor. 15:28.
13 Lauman niyato na sa pana-panahon puwedeng magbago man an satong mga asignasyon, na sa parati resulta kan ginigibo tang mga desisyon. Halimbawa, dati dai kang agom pero nagdesisyon kang mag-agom. Dangan, tibaad magkaigwa kamo nin mga aki. Pag-abot nin panahon, tibaad magdesisyon kamong pasimplehon an saindong buhay tanganing makapaglingkod nin bilog na panahon. An lambang desisyon niyato may kaibang pagbabago sa satong pribilehiyo o responsabilidad. Puwedeng magdakul o magdiit an satong nagigibo. Pero hoben man kita o may edad na, makusog o maluya, pirming kinokonsiderar ni Jehova kun sain kita pinakamarahay na gamiton sa paglilingkod sa saiya. An hinahagad niya sana sa sato iyo idtong makakaya niyato, asin pinapahalagahan niyang marhay ano man an satong ginigibo para sa saiya.—Heb. 6:10.
14. Paano makakatabang sa sato an kababaan nin buot tanganing magin kontento asin maugma kita sa ano man na kamugtakan?
14 Nagin maugma si Jesus sa ano man na asignasyon na itinao sa saiya, asin puwede man niyatong mamatian iyan. (Tal. 8:30, 31) An saro na may hababang buot kontento sa presenteng mga asignasyon o responsabilidad niya sa kongregasyon. Dai niya pinoproblema kun ano an magigin pribilehiyo niya sa maabot na panahon o kun ano an nagigibo kan iba. Imbes, kontento asin maugma siya huling ibinibilang niyang hali ki Jehova an ano man na asignasyon niya. Asin mantang isinasaabaga an mga iyan, iginagalang niya an kabtang o asignasyon na itinao ni Jehova sa iba. Matatabangan kita kan kababaan nin buot na magin maugma sa pagtao nin respeto asin tabang sa iba.—Roma 12:10.
KUN ANO AN BAKONG KABABAAN NIN BUOT
15. Ano an manunudan niyato sa kababaan nin buot ni Gideon?
15 Sarong marahayon na halimbawa nin kababaan nin buot si Gideon. Kan inot na magpahiling sa saiya an anghel ni Jehova, tulos na sinabi niya an simple niyang pinaghalian asin kamugtakan sa buhay. (Hok. 6:15) Pagkatapos niyang akuon an asignasyon na itinao ni Jehova, sinigurado ni Gideon na nasasabutan niyang marhay kun ano an hinahagad sa saiya na gibuhon, asin nagpagiya siya ki Jehova. (Hok. 6:36-40) Pusuan asin makusog an buot ni Gideon. Pero, nagin siyang maingat asin alisto an isip. (Hok. 6:11, 27) Dai niya ginamit an saiyang asignasyon tanganing magin prominente. Imbes, kan matapos na niya an ipinapagibo sa saiya ni Jehova, maugma siyang nagpuli sa saiyang harong.—Hok. 8:22, 23, 29.
16, 17. Ano an ikokonsiderar nin saro na hababa an buot pag iniisip niyang pahiwason an saiyang paglilingkod?
16 An pagigin hababa an buot dai man nangangahulugan na dai na kita maabot o maako nin dugang pang mga pribilehiyo. Dinadagka kita gabos kan Kasuratan na gumibo nin pag-uswag. (1 Tim. 4:13-15) Pero, kaipuhan daw na magkaigwa nguna kita nin bagong asignasyon tanganing magibo ini? Dai man. Sa tabang ni Jehova, puwede kitang umuswag sa espirituwal ano man an asignasyon niyato ngunyan. Puwede niyatong padagos na pauswagon an mga kakayahan na itinao sa sato nin Diyos tanganing lalo kitang makapaglingkod sa saiya asin makatabang sa iba.
17 Bago akuon an sarong bagong asignasyon, inaaram nguna nin saro na hababa an buot kun ano an hinahagad kaini sa saiya na gibuhon. Dangan onesto niyang eestudyaran an saiyang kamugtakan. Halimbawa, magigibo daw niya an dugang na trabaho o responsabilidad na iyan na mayo siyang mapapabayaan na iba pang importanteng mga bagay? Puwede daw niyang idelegar sa iba an iba niyang gibuhon tanganing magkapanahon siya para sa bagong asignasyon? Kun dai an simbag sa arin man sa hapot na ini, tibaad sa ngunyan, ibang indibidwal an nasa kamugtakan na mag-ako kan bagong asignasyon. Makakatabang an makatotoohan saka may pagpamibing pag-estudyar sa satong kamugtakan tanganing maaraman kun baga kaya pa niyatong isaabaga an bagong asignasyon. Kun dai, papahiruon kita kan kababaan nin buot na sayumahan iyan.
18. (a) Kun may kababaan kita nin buot, ano an gigibuhon niyato kun tawan kita nin bagong asignasyon? (b) Paano makakatabang an Roma 12:3 tanganing magin hababa an satong buot?
18 Mahihiling niyato sa halimbawa ni Gideon na dai kita magigin mapanggana sa inako tang bagong asignasyon kun dai kita mapagiya asin mapatabang ki Jehova. Iyo, inaagda kita na “maglakaw na may kababaan nin buot kaiba kan [satong] Diyos.” (Miq. 6:8, NW) Kaya, kun natawan kita nin bagong mga paninimbagan, kaipuhan niyatong mamibi asin hurop-hurupon an ano man na sinasabi sa sato ni Jehova paagi kan saiyang Tataramon asin organisasyon. Kaipuhan niyatong gumibo nin pagbabago tanganing maiuyon an satong nagriripay-dipay na paglakaw sa deretsong panginginot ni Jehova. Tandaan na an “minapatalubo” o an minapadakula sa sato, bako an sadiri niyatong kakayahan kundi an kapakumbabaan ni Jehova na andam niya kitang tabangan. (Sal. 18:35) Kaya, kun may kababaan nin buot kitang malakaw na kaibanan nin Diyos, matatabangan kita kaiyan na magin tama sana—bakong sobra, bakong kulang—an paghiling niyato sa satong sadiri.—Basahon an Roma 12:3.
19. Ano an mga dahilan kun taano dapat kitang magpahiling nin kababaan nin buot?
19 Itinatao nin saro na hababa an buot an gabos na kaumawan na maninigo ki Jehova, huling Siya an satong Kaglalang asin Soberano kan Uniberso. (Kap. 4:11) Matatabangan kita kan kababaan nin buot na magin kontento asin magin mabunga sa iinasignar sa satong kabtang sa areglo nin Diyos. Papahiruon kita kan kababaan nin buot na igalang an namamatian saka opinyon kan satong mga kapagtubod, kaya mapagdadanay ta an satong pagkasararo. Papahiruon man kita kan kababaan nin buot na inuton an kapakanan kan iba kisa sa satong sadiri, asin na pag-isipan na marhay an gigibuhon tanganing malikayan an magabat na mga sala. Ini an dahilan kun taano ta mahalaga pa man giraray para sa gabos na lingkod nin Diyos an kababaan nin buot, asin ikinakaugmang marhay ni Jehova an mga nagpapahiling kaiyan. Pero kumusta kun may mga sitwasyon na puwedeng makabalo sa satong pagigin hababa an buot? Manunudan ta sa masunod na artikulo kun paano magdadanay na may kababaan nin buot dawa nasa arog kaiyan na mga sitwasyon.