“An Tataramon nin Diyos . . . Igwa nin Puwersa”

1. Taano ta kumbinsido kita na igwa nin puwersa an Tataramon nin Diyos? (Hilingon an ritrato sa itaas.)

BILANG mga lingkod ni Jehova, kumbinsido kita na an Tataramon nin Diyos, na mensahe niya para sa katawuhan, “buhay asin igwa nin puwersa.” (Heb. 4:12) Dakul sa sato an buháy na patotoo na may puwersa an Bibliya na magpabago nin buhay. An iba sa mga tugang ta dating parahabon, adikto sa droga, o naggigibo nin imoral. May mga nagin asensado sa sistemang ini nin mga bagay pero namatian ninda na may kulang sa buhay ninda. (Par. 2:3-11) Nakakaugma huling sa tabang kan nakakapabagong puwersa kan Bibliya dakul na tawong dating napariwara asin garo mayo nang pag-asa an igwa na ngunyan nin paglaom asin direksiyon an buhay. Posibleng dakul na kitang nabasa asin nagustuhan na arog kaiyan na mga eksperyensiya na ipinublikar sa An Torrengbantayan sa serye na “Binago kan Bibliya an Saindang Buhay.” Asin nahiling niyato na dawa pakatapos na maaraman an katotoohan, padagos man giraray na nag-uuswag sa espirituwal an mga Kristiyano sa tabang kan Kasuratan.

2. Ano an nagin epekto kan puwersa kan Tataramon nin Diyos sa mga tawo kan inot na siglo?

² Nakakangalas daw kun dakul na tawo ngunyan an naggigibo nin dakulang mga pagbabago huli sa pag-adal kan Tataramon nin Diyos? Dai nanggad! Nagigirumduman ta sa mga eksperyensiya ninda an satong mga tugang kan inot na siglo, na may langitnon na paglaom. (Basahon an 1 Corinto 6:9-11.) Pagkatapos na saro-saruon an pira sa mga klase nin tawong dai magmamana kan Kahadian nin Diyos, sunod na sinabi ni apostol Pablo: “Arog kaiyan dati an nagkapira sa saindo.” Pero nagbago sinda sa tabang kan Kasuratan asin kan banal na espiritu nin Diyos. Dawa kan Kristiyano na sinda, napaatubang pa man giraray an iba sa sainda sa seryosong mga problema sa espirituwal. Sinambit sa Bibliya an sarong linahidan na Kristiyano kan inot na siglo na kinaipuhan na itiwalag; kan huri, nagbago siya asin nakabalik sa kongregasyon. (1 Cor. 5:1-5; 2 Cor. 2:5-8) Bako daw na nakakapakusog nanggad isip-isipon an dapit sa manlain-lain na problema na inagihan asin napangganahan kan satong mga kapagtubod sa tabang kan Tataramon nin Diyos?

3. Ano an pag-uulayan ta sa artikulong ini?

³ Huling talagang mapuwersang kasangkapan an Tataramon nin Diyos asin itinao iyan sa satuya nin Diyos, siguradong gusto niyatong gamiton iyan sa pinakalubos na paagi. (2 Tim. 2:15) Sa artikulong ini, pag-uulayan niyato kun paano ta mas lubos na magagamit an puwersa kan Tataramon nin Diyos (1) sa satong personal na buhay, (2) sa ministeryo, asin (3) pag nagtutukdo sa plataporma. Makakatabang sa sato an mga pagirumdom na ini na maipahiling an satong pagkamuot asin pasasalamat sa satong mamumuton na Ama sa langit, na nagtutukdo sa sato tanganing makinabang kita.—Isa. 48:17.

SA SATONG PERSONAL NA BUHAY

4. (a) Ano an kaipuhan niyatong gibuhon tanganing magkaigwa nin epekto sa sato an Tataramon nin Diyos? (b) Paano ka nagtatagama nin panahon para sa pagbasa nin Bibliya?

⁴ Tanganing magkaigwa nin epekto sa sato an Tataramon nin Diyos, kaipuhan niyatong basahon iyan nin regular​—aroaldaw kun posible. (Jos. 1:8) Siyempre, kadaklan sa sato pirming sibot. Pero, dai nanggad niyato dapat pagtugutan an ano man​—dawa an satong mga responsabilidad—na makaulang sa satong rutina nin pagbasa nin Bibliya. (Basahon an Efeso 5:15, 16.) Dakul na lingkod ni Jehova an naggibo nin paagi tanganing magkaigwa nin panahon na mabasa an Bibliya aroaldaw​—an iba ginigibo iyan pakamata o bago magturog o sa ano man na oras kan aldaw. Namatian ninda an sinabing ini kan salmista: ‘Kaniguan an pagkamuot ko sa saimong pagbuot! Sa bilog na aldaw iyo iyan an sakuyang pighuhurop-hurop.’​—Sal. 119:97.

5, 6. (a) Taano ta mahalaga an paghurop-hurop? (b) Paano kita epektibong makakapaghurop-hurop? (c) Paano ka personal na nakinabang sa pagbasa asin paghurop-hurop kan Tataramon nin Diyos?

⁵ Apuwera sa pagbasa nin Bibliya, importante man na hurop-hurupon ta an satong mga binabasa. (Sal. 1:1-3) Kun gigibuhon niyato iyan, saka sana niyato maiaaplikar sa pinakamarahay na paagi sa satong buhay an dai nalulumang kadunungan kaiyan. Kaya, imprentado man o elektronikong Bibliya an binabasa ta, an dapat na magin pasuhan ta iyo na mailaog sa satong puso an mga nababasa ta.

⁶ Paano kita epektibong makakapaghurop-hurop? Nakatabang sa iba an pagpundo nguna pagkatapos na mabasa an sarong porsiyon kan Kasuratan tanganing pag-isipan an mga hapot na arog kan, ‘Ano an sinasabi kaini sako dapit ki Jehova? Sa anong mga paagi naiaaplikar ko na sa sakong buhay an prinsipyo na yaon sa porsiyon na ini kan Tataramon nin Diyos? Ano pang mga pagbabago an kaipuhan kong gibuhon?’ Mantang hinuhurop-hurop ta na may kaibang pagpamibi an Tataramon nin Diyos, magigin determinado kitang mas lubos pang maiaplikar an sadol kaiyan. Iyo, mas lubos niyatong magagamit an puwersa kaiyan sa satong buhay.​—2 Cor. 10:4, 5.

SA MINISTERYO

7. Paano niyato magagamit nin lubos an Tataramon nin Diyos sa satong ministeryo?

⁷ Ano an makakatabang sa sato tanganing magamit niyato nin lubos an Tataramon nin Diyos sa satong ministeryo? An inot iyo na gamiton iyan pirmi pag naghuhulit asin nagtutukdo. Mapadapit digdi, sarong brother an nagsabi, “Kun naghaharong-harong ka tapos si Jehova mismo an kaiba mo, ika sana daw an maparataram o papataramon mo man siya?” An punto niya iyo ini: Pag binabasa ta an Tataramon nin Diyos sa ministeryo, tinutugutan niyatong makaulay ni Jehova an kagharong. Mas mapuwersa nanggad an sarong piniling marhay na teksto kisa sa ano man na puwedeng sabihon ta. (1 Tes. 2:13) Haputon an sadiri, ‘Hinihinguwa ko daw na makabasa pirmi nin Bibliya sa mga nakakaulay ko sa ministeryo?’

8. Taano ta dai lang niyato dapat basta basahon an mga teksto pag naghuhulit kita?

⁸ Siyempre, bako lang basta pagbasa nin mga teksto sa mga nakakaulay ta an kaipuhan. Taano? Huling an kadaklan dikit sana o mayo pa nganing aram sa Bibliya. Totoo iyan kaidtong inot na siglo, asin totoo man iyan ngunyan. (Roma 10:2) Kaya, dai niyato dapat isipon na masasabutan na tulos kan kaulay ta an sarong teksto pakabasa ta kaiyan sa saiya. Puwede niyatong kuanon an pirang porsiyon kan sarong teksto​—tibaad paagi sa pagbasa utro kan panginot na mga tataramon​—asin ipaliwanag an kahulugan kaiyan. Dakula an maitatabang kaiyan tanganing maabot kan mensahe kan Tataramon nin Diyos an isip asin puso kan mga tawo.​—Basahon an Lucas 24:32.

9. Paano niyato matatabangan an mga nakakaulay ta na magkaigwa nin paggalang sa Bibliya? Magtao nin halimbawa.

⁹ Mahalaga man na iintrodusir niyato an mga teksto sa paaging matatabangan an kaulay ta na magkaigwa nin paggalang sa Bibliya. Halimbawa, puwede niyatong sabihon, “Hilingon ta kun ano an sinasabi kan satong Kaglalang dapit digdi.” Pag nakikipag-ulay kita sa saro na bakong Kristiyano an relihiyon, puwede niyatong sabihon, “Hilinga an sinasabi sa sato kan Banal na Libro.” O kun naghuhulit kita sa saro na bakong interesado sa relihiyon, puwede niyatong ihapot, “Nadangog mo na an suanoy na kasabihan na ini?” Iyo, iba-iba an satong nakakaulay kaya ibinabagay niyato sa kada indibidwal an paagi niyato nin pakikipag-ulay.—1 Cor. 9:22, 23.

10. (a) Isaysay an nagin eksperyensiya nin sarong brother. (b) Paano mo man nahiling an puwersa kan Tataramon nin Diyos sa saimong ministeryo?

¹⁰ Napatunayan kan dakul na an paggamit kan Tataramon nin Diyos sa ministeryo puwedeng magkaigwa nin dakulang epekto sa mga hinuhulitan ninda. Pag-isipan an sarong halimbawa. Dinalaw liwat nin sarong brother an sarong may edad nang lalaki na dakul na taon nang nagbabasa kan satong mga magasin. Imbes na basta na sana itao sa lalaki an pinakabagong isyu kan An Torrengbantayan, nagdesisyon an brother na magbasa nin sarong teksto na ginamit sa isyung iyan. Binasa niya an 2 Corinto 1:3, 4, na nagsasabi: “An Ama nin mamumuton na pagkahirak asin an Diyos nin gabos na karangahan . . . nagraranga sa sato sa gabos tang kasakitan.” Nataros na marhay kan mga tataramon na iyan an puso kan kagharong kaya nakiulay ining basahon utro kan brother an teksto. Sinabi kan lalaki na kaipuhan na marhay nindang mag-agom an karangahan, asin ngunyan interesado na siya sa mensahe kan Bibliya. Bako daw na mauyon ka na talagang igwa nin puwersa an Tataramon nin Diyos sa satong ministeryo?​—Gibo 19:20.

PAG NAGTUTUKDO SA PLATAPORMA

11. May anong paninimbagan an mga brother na nagtutukdo sa plataporma?

¹¹ Gustong-gusto niyato pag nag-aatender kita sa satong Kristiyanong mga pagtiripon, sa mga asembleya, asin kumbensiyon. An panginot na dahilan kaya ginigibo ta iyan iyo na sambahon si Jehova. Nakikinabang man kitang marhay sa espirituwal na mga pagtutukdo na itinatao diyan. Kaya dakulang pribilehiyo nanggad para sa mga brother an magtukdo sa plataporma. Pero kasabay kaiyan, dapat nindang midbidon na saro man iyan na magabat na paninimbagan. (Sant. 3:1) Dapat na pirmi nindang siguraduhon na an mga itinutukdo ninda talagang basado sa Tataramon nin Diyos. Kun inasignaran kang magtukdo sa plataporma, paano mo magagamit an puwersa kan Bibliya sa saimong pahayag?

12. Paano masisigurado nin sarong ispiker na an Kasuratan an pinakamahalagang kabtang kan saiyang pahayag?

¹² An Kasuratan an dapat na magin pinakamahalagang kabtang kan saimong pahayag. (Juan 7:16) Paano mo magigibo iyan? Siguraduhon na mayo nin ano man—mga eksperyensiya, ilustrasyon, o dawa an paagi mo nin pagpahayag—na makatahob o makaparayo kan atensiyon kan mga nagdadangog sa mga teksto sa Bibliya na ginagamit mo. Girumdumon man na dai maaapod na pagtutukdo sa Bibliya an basta sana pagbasa nin mga teksto. Sa katunayan, kun magamit ka nin kadakul-dakul na teksto posibleng mayong matandaan diyan an mga nagdadangog. Kaya pilion na marhay an mga gagamiton mong teksto, asin magtao nin panahon na basahon, ipaliwanag, iilustrar, asin iaplikar iyan na marhay. (Neh. 8:8) Kun an sarong pahayag basado sa outline na hali sa organisasyon, pag-adalan na marhay an outline asin an mga tekstong ginamit diyan. Hinguwahon na masabutan kun paano konektado sa outline an sitadong mga teksto. Dangan pumili nin mga tekstong gagamiton mo tanganing maitukdo an mga punto sa outline. (Makakakua ka nin praktikal na mga suhestiyon sa leksiyon 21 sagkod 23 kan Makinabang sa Edukasyon sa Teokratikong Paadalan sa Pagmiministro.) Urog sa gabos, mamibi ki Jehova na tabangan kang maitukdo an mahalagang marhay na mga punto na yaon sa saiyang Tataramon.​—Basahon an Esdras 7:10; Talinhaga 3:13, 14.

13. (a) Paano napahirong marhay an sarong sister kan paagi nin paggamit nin teksto sa sarong Kristiyanong pagtiripon? (b) Paano ka personal na nakinabang kan pagtutukdong basado sa Bibliya sa satong mga pagtiripon?

¹³ Nakapahirong marhay sa sarong sister sa Australia an tekstong nadangog niya sa sarong Kristiyanong pagtiripon. May marauton na mga nangyari sa saiya kan siya aki pa, pero nanudan niya an katotoohan sa Bibliya asin idinusay an saiyang buhay ki Jehova. Sa ibong kaiyan, nasakitan pa man giraray siyang maniwala na namumutan siya ni Jehova. Pero pag-abot nin panahon, nakumbinsir man giraray siya na namumutan siya nin Diyos. Ano an nakatabang sa saiya? Hinurop-hurop niya an sarong teksto na nadangog niya sa saro sa mga pagtiripon ta dangan ikinonektar niya iyan sa iba pang teksto sa Bibliya.a Arog kan sister na iyan, napahiro ka na man daw kan paagi nin paggamit kan Tataramon nin Diyos sa mga pagtiripon, asembleya, o kumbensiyon?—Neh. 8:12.

14. Paano niyato maipapahiling na pinapahalagahan ta an Tataramon ni Jehova?

¹⁴ Bako daw na nagpapasalamat nanggad kita ki Jehova huli sa saiyang nasusurat na Tataramon, an Bibliya? Dai sana niya iyan mamumuton na itinao para sa katawuhan, kundi inutob man niya an panuga niyang magdadanay iyan. (1 Ped. 1:24, 25) Siguradong gusto nanggad niyatong basahon nin regular an Tataramon nin Diyos, iaplikar sa satong buhay, asin gamiton pag nagtatabang sa iba. Paagi kaiyan, ipinapahiling ta na talagang namumutan asin pinapahalagahan ta bako sana an mahalagang marhay na regalong ini, kundi urog sa gabos, an Awtor kaiyan, an Diyos na Jehova.