Pagdanayon an Panglaog na Katuninungan sa Ibong kan mga Pagbabago sa Kamugtakan

1, 2. (a) Ano an puwedeng magin epekto sa sarong Kristiyano kan dai inaasahan na mga pagbabago sa saiyang buhay? (Hilingon an ritrato sa kapinunan kan artikulo.) (b) Sigun sa Salmo 131, anong sabuot an makakatabang sa sato na mapagdanay an satong panglaog na katuninungan?

NAMUNDO kan primero si Lloyd asin Alexandra kan maaraman nindang mare-reassign sinda sa langtad. Labi na kaya sindang 25 taon sa Bethel. Sinabi ni Lloyd: “Midbid ako sa pagigin Bethelite asin sa asignasyon ko. Nasasabutan ko an mga dahilan kan pagbabago, pero sa suminurunod na semana asin bulan, parati akong nakakamati na hinabuan ako. Paburubago an emosyon ko—ngunyan positibo, uruatyan disganado.”

² Kun magkaigwa nin dai inaasahan na pagbabago sa buhay, puwedeng mahadit kitang marhay. (Tal. 12:25) Tibaad madipisilan pa ngani kitang akuon iyan. Kun mamugtak kita sa sitwasyon na iyan, paano kita magdadanay na ‘kalmado asin matuninong’? (Basahon an Salmo 131:1-3.)a Pag-ulayan ta kun paano napagdanay kan pirang karakter sa Bibliya asin kan mga lingkod ni Jehova sa presenteng panahon an saindang panglaog na katuninungan sa ibong kan mga pagbabago sa saindang kamugtakan.

KUN PAANO NAKAKATABANG “AN KATUNINUNGAN NIN DIYOS”

3. Anong pagbabago an nangyari sa buhay ni Jose?

³ Mga 17 anyos kaidto si Jose kan, huli sa pagkauri, ipinabakal siya kan mga tugang niya bilang uripon. Paborito kaya si Jose kan saindang ama. (Gen. 37:2-4, 23-28) Sa laog nin mga 13 taon, kinaipuhan ni Jose na tagalan an pagigin uripon asin pagkabilanggo sa Ehipto, harayo sa namumutan niyang amang si Jacob. Ano an nakatabang ki Jose na dai mawaran nin paglaom asin dai maghinanakit?

4. (a) Mantang nakabilanggo, sa ano ipinokus ni Jose an saiyang isip? (b) Paano sinimbag ni Jehova an mga pamibi ni Jose?

⁴ Mantang nakabilanggo, posibleng marhay na ipinokus ni Jose an saiyang isip sa ebidensiya na binebendisyunan siya ni Jehova. (Gen. 39:21; Sal. 105:17-19) An makahulang mga pangaturugan kaidto ni Jose nakadagdag man sa saiyang pagtitiwala na inuuyunan siya ni Jehova. (Gen. 37:5-11) Posibleng marhay na parati siyang namimibi ki Jehova na sinasabi an gabos niyang kapurisawan. (Sal. 145:18) Bilang simbag sa udok sa pusong mga pamibi ni Jose, tinawan siya ni Jehova nin panglaog na kumbiksiyon na ‘masasakaibanan Niya siya’ sa gabos niyang kasakitan.—Gibo 7:9, 10.b

5. Ano an epekto kan “katuninungan nin Diyos” sa pagmawot niyatong mag-abot nin espirituwal na mga pasuhan?

⁵ Sa ibong kan dipisil na mga kamugtakan, puwede ta mismong mamatian ngunyan an nakakaginhawang epekto kan “katuninungan nin Diyos” na nagbabantay sa satong kaisipan. (Basahon an Filipos 4:6, 7.) Kaya kun madulok kita ki Jehova pag namamatian niyatong dai ta na kaya an mga kahaditan, mapapakusog kan katuninungan nin Diyos an satong determinasyon na mag-abot nin espirituwal na mga pasuhan asin poprotektaran kita kaiyan sa ano man na tendensiyang sumuko. Pag-ulayan ta an pirang halimbawa kaini sa presenteng panahon.

DUMULOK KI JEHOVA TANGANING MAGKAIGWA GIRARAY NIN PANGLAOG NA KATUNINUNGAN

6, 7. Kun dapit sa pagpamibi, paano nakakatabang an pagigin espesipiko tanganing magkaigwa giraray kita nin panglaog na katuninungan? Magtao nin halimbawa.

⁶ Kan ipaaram ki Ryan asin Juliette na tapos na an asignasyon ninda bilang temporaryong mga espesyal payunir, nangluyang marhay an buot ninda. “Ipinamibi mi tulos iyan ki Jehova,” an sabi ni Ryan. “Aram mi na marahayon na oportunidad ini na ipahiling na nagtitiwala kami sa saiya. Dakul an baguhan sa samong kongregasyon, kaya ipinamibi mi ki Jehova na tabangan kaming magin marahayon na halimbawa nin pagtubod.”

⁷ Paano sinimbag ni Jehova an saindang pamibi? Nagigirumduman ni Ryan: “Pagkapamibi mi, nawara tulos an mga negatibong sabuot asin an mga paghadit mi kan inot. Binantayan kan katuninungan nin Diyos an samong puso asin kaisipan. Narealisar ming padagos kaming magagamit ni Jehova kun papagdanayon mi an tamang sabuot.”

8-10. (a) Paano makakatabang sa sato an espiritu nin Diyos na makayanan an mga kahaditan? (b) Sa anong mga paagi puwede kitang tabangan ni Jehova kun naghihinguwa kitang magdanay na nakapokus sa espirituwal?

⁸ Apuwera sa napapakalma kita kan espiritu nin Diyos, puwede man kitang itukdo kaiyan sa mga tekstong makakatabang tanganing magdanay na panginot sa sato an espirituwal na mga bagay. (Basahon an Juan 14:26, 27.) Pag-isipan an eksperyensiya kan mag-agom na si Philip asin Mary na naglingkod kaidto sa Bethel sa laog nin haros 25 taon. Sa laog nin apat na bulan, nagadan pareho an saindang ina asin an saro pang kaparyente dangan kinaipuhan nindang atamanon an ama ni Mary na may dementia.

⁹ Nagigirumduman ni Philip: “Paghuna ko okey man ako maski paano, pero may kulang. Naagihan ko sa sarong pag-aadalan na artikulo sa Torrengbantayan an Colosas 1:11. Iyo, nagtatagal ako pero bako pa palan lubos. Kaipuhan kong ‘magtagal sa gabos na bagay na may pakatios asin kaugmahan.’ Ipinagirumdom sa sako kan bersikulong ini na an kaugmahan sa buhay nakadepende bako sa sakong kamugtakan, kundi sa epekto kan espiritu nin Diyos sa sakong buhay.”

¹⁰ Huling hininguwa ni Philip asin Mary na papagdanayon an saindang pokus sa espirituwal, binendisyunan sinda ni Jehova sa dakul na paagi. Dai nahaloy pagluwas sa Bethel, pareho sindang nagkaigwa nin progresibong mga tinutukduan sa Bibliya na gustong mag-adal nin duwang beses o labi pa kada semana. Sinabi ni Mary: “Sinda an kaugmahan mi saka an paagi ni Jehova para sabihon samo na magigin okey an gabos.”

TAWAN SI JEHOVA NIN DAHILAN NA BENDISYUNAN KA

11, 12. (a) Paano tinawan ni Jose si Jehova nin dahilan na bendisyunan siya? (b) Paano binendisyunan si Jose sa saiyang pakatagal?

¹¹ Pag nakaeksperyensiya kita nin biglang mga pagbabago, posible na an pagparaisipon ta na sana iyo an mga kahaditan dapit sa puturo ta. Puwede kutang ini an nangyari ki Jose. Imbes, malinaw na pinili niyang gibuhon an pinakamarahay na magigibo niya sa presenteng kamugtakan niya, kaya tinawan niya si Jehova nin dahilan na bendisyunan siya. Dawa nasa bilangguan, maigot na ginibo ni Jose an ano man na trabaho na itinao sa saiya kan puon na opisyal, arog kaidto kan nagtatrabaho pa siya ki Potifar.—Gen. 39:21-23.

¹² Sarong aldaw, ipinagkatiwala ki Jose an pangangataman sa duwang lalaki na dating may halangkaw na posisyon sa palasyo ni Faraon. Nakua ni Jose an tiwala kan duwa huli sa saiyang kabuutan, kaya sinabi ninda sa saiya an saindang mga problema asin an mga pangaturugan ninda kan nakaaging banggi na dai ninda masabutan. (Gen. 40:5-8) Dai aram ni Jose na an pag-uulay palan na idto an magigin dahilan na magrahay an kamugtakan niya pag-abot nin panahon. Pakalihis nin duwang taon, pinaluwas siya sa bilangguan asin sa aldaw man sanang iyan ninombrahan siyang magin tagapamahala na ikaduwa ki Faraon.—Gen. 41:1, 14-16, 39-41.

13. Paano niyato matatawan si Jehova nin dahilan na bendisyunan kita ano man an satong kamugtakan?

¹³ Arog ni Jose, tibaad mamugtak kita sa sarong sitwasyon na haros mayo kitang kontrol o talagang dai niyato kontrolado. Pero kun magdadanay kitang matinios asin maigot na gigibuhon an pinakamarahay na magigibo ta sa satong sitwasyon, matatawan ta si Jehova nin dahilan na bendisyunan kita. (Sal. 37:5) Iyo, tibaad ‘maribaraw’ kita kun minsan, pero arog kan sinabi ni apostol Pablo, nungka iyan na maabot sa punto na ‘dai na kitang paglaom.’ (2 Cor. 4:8; nota sa ibaba) Mapapatunayan niyatong totoo an sinabing ini ni Pablo lalo na kun magdadanay kitang nakapokus sa satong ministeryo.

MAGDANAY NA NAKAPOKUS SA SAIMONG MINISTERYO

14-16. Paano an ebanghelisador na si Felipe nagdanay na nakapokus sa saiyang ministeryo sa ibong kan mga pagbabago sa saiyang kamugtakan?

¹⁴ Marahayon na halimbawa an ebanghelisador na si Felipe na nagdanay na nakapokus sa saiyang ministeryo sa ibong nin mga pagbabago sa saiyang kamugtakan. Nagkaigwa nin grabeng persekusyon sa Jerusalem pagkagadan ni Esteban bilang martir.c Kan panahon na iyan, may bagong pribilehiyo nin paglilingkod si Felipe. (Gibo 6:1-6) Pero kan nagkasuruway-suway an mga parasunod ni Cristo, dai nanggad kaya ni Felipe na magmasid na sana na mayong gigibuhon. Nagduman siya sa Samaria, na sarong siyudad na an kadaklan na lugar dai pa napapaabutan kan maugmang bareta kan panahon na iyan.—Mat. 10:5; Gibo 8:1, 5.

¹⁵ Andam si Felipe na magduman sain man siya giyahan kan espiritu nin Diyos, kaya ginamit siya ni Jehova tanganing buksan an bagong mga teritoryo. Posibleng marhay na nagustuhan siya kan mga Samaritano huling namatian nindang dai siya nagpapalain-lain—minemenos kaya kaidto kan mga Judio an mga Samaritano. Bakong makangangalas na “an gabos nakapokus” sa saiya!—Gibo 8:6-8.

¹⁶ Dangan giniyahan kan espiritu nin Diyos si Felipe pasiring sa Asdod asin Cesarea, duwang siyudad na dakul an Hentil. (Gibo 8:39, 40) Mga 20 taon puon kan inot siyang maghulit sa Samaria, minalataw na nagbago giraray an kamugtakan ni Felipe. May pamilya na siya asin nakaistar kun sain siya naghuhulit. Sa ibong kan mga pagbabago sa saiyang kamugtakan, nagdanay na nakapokus si Felipe sa saiyang ministeryo, kaya siya asin an saiyang pamilya abundang binendisyunan ni Jehova.—Gibo 21:8, 9.

17, 18. Paano makakatabang sa sato an pagpokus sa ministeryo tanganing magdanay na positibo pag nagkaigwa nin mga pagbabago?

¹⁷ Dakul na naglilingkod nin bilog na panahon an makakapagsabi na an pagpokus sa ministeryo nakatabang sa sainda na magdanay na maugma asin positibo sa ibong kan mga pagbabago sa kamugtakan. Kan magluwas sa Bethel si Osborne asin Polite, na mag-agom na taga South Africa, paghuna ninda makakakua tulos sinda nin part-time asin nin maiistaran. “Iyan lang, ta dai tulos kami nakahanap nin trabaho bakong arog kan inaasahan mi,” an sabi ni Osborne. Nagigirumduman kan agom niyang si Polite: “Dai kami nakahanap nin trabaho sa laog nin tulong bulan, saka mayo kaming tipon. Masakiton talaga.”

¹⁸ Ano an nakatabang sa sainda na makayanan an saindang dipisil na sitwasyon? Ini an sabi ni Osborne: “An paghuhulit kaiba kan kongregasyon nakatabang na marhay sa samo na magdanay na nakapokus asin positibo an samong isip. Nagdesisyon kami na makikabtang nin lubos sa paghuhulit imbes na tumukaw na sana saka magparahadit, asin nagresulta iyan sa dakulang kagaya-gayahan. Nagparahanap kami nin trabaho, asin nakakua man giraray kami.”

MAPASENSIYANG MAGHALAT KI JEHOVA

19-21. (a) Ano an makakatabang sa sato na mapagdanay an panglaog na katuninungan? (b) Anong mga pakinabang an makukua ta sa pag-adjust sa mga pagbabago sa satong kamugtakan?

¹⁹ Arog kan ipinapahiling sa mga halimbawang iyan, kun gigibuhon niyato an pinakamarahay na magigibo ta sa satong kamugtakan asin may pagtitiwalang mahalat ki Jehova, mapapagdanay niyato an satong panglaog na katuninungan. (Basahon an Miqueas 7:7.) Tibaad marealisar pa ngani niyato na kadakul palan kitang nakuang pakinabang sa espirituwal huli sa pag-adjust niyato sa satong bagong kamugtakan. Base sa saiyang eksperyensiya, si Polite na nasambitan kasubago nagsabi: “Kan ma-reassign kami, nanudan ko an buot sabihon kan lubos na pagtitiwala ki Jehova sa mga panahon na garo baga mayo nang paglaom. Mas nagkusog an relasyon ko sa saiya.”

²⁰ Si Mary na nasambitan kasubago, nagpapayunir mantang inaataman sagkod ngunyan an saiyang naggugurang nang ama. Inadmitir niya: “Nanudan ko na pag nahahadit ako, kaipuhan kong pumundo, mamibi, asin magkalma. Siguro an pinakamahalagang nanudan ko iyo na ipabaya ki Jehova an mga bagay-bagay, asin kakaipuhanon nanggad iyan lalo na sa maabot na panahon.”

²¹ Inadmitir ni Lloyd asin Alexandra, na sinambit sa kapinunan, na an saindang pagtubod nabalo kan nagbago nindang kamugtakan sa mga paaging dai ninda inaasahan. Pero sinabi ninda: “Ihinahayag kan mga pagbalo sa pagtubod kun baga tunay an samong pagtubod asin kun baga igo iyan tanganing suportaran asin rangahon kami sa mga panahon nin kadipisilan. Nakakatabang iyan sa samo na umuswag.”

22. Kun gigibuhon niyato an pinakamarahay na magigibo ta sa satong presenteng sitwasyon, sa ano kita makakasigurado?

²² Kun magkaigwa nin dai inaasahan na mga pagbabago sa buhay—iyan man huli sa pagbabago sa teokratikong asignasyon, hilang, o bagong paninimbagan sa pamilya—makakasigurado kang nagmamalasakit sa saimo si Jehova asin tatabangan ka niya sa tamang panahon. (Heb. 4:16; 1 Ped. 5:6, 7) Sa ngunyan, gibuhon an pinakamarahay na magigibo sa saimong sitwasyon. Rumani sa saimong Ama sa langit paagi sa pamibi, asin lubos na magtiwala sa saiya. Paagi kaini, mapapagdanay mo man an panglaog na katuninungan sa ibong kan mga pagbabago sa saimong kamugtakan.