Kun Paano Aabuton an Puso kan mga Tawong Mayong Relihiyon

1. Sa nakaaging mga dekada, anong pagbabago an nangyari sa nagkapirang lugar?

SA LAOG nin rinibong taon, an kadaklan sa mga tawo sa kinaban igwa nin relihiyon na kinabibilangan. Pero sa nakaaging mga dekada, nagkaigwa nin risang-risang pagbabago. Padakul nin padakul an mga tawo na ibinibilang an sadiri ninda na mayong relihiyon. Sa katunayan, may mga nasyon na an kadaklan sa populasyon nagsasabi na mayo sindang relihiyon.b—Mat. 24:12.

2. Ano an posibleng mga rason kun taano ta dakulon na tawo an mayong relihiyon?

² Taano ta nagdadakul an mga tawo na ibinibilang an saindang sadiri na mayong relihiyon?c Tibaad an iba nakapokus sa kaugmahan o kadakul nin problema. (Luc. 8:14) An iba nagin ateista. May mga nagtutubod sa Diyos pero iniisip na an relihiyon makaluma, bakong praktikal, asin bakong kauyon kan siyensiya saka bakong lohikal. Tibaad nadadangog ninda sa mga amigo, maestra, o sa mga personalidad sa media na nagpuon an buhay paagi sa ebolusyon, pero bihira sindang makadangog nin makatanusan na dahilan para magtubod sa Diyos. May mga nasusuyang marhay sa mga lider nin relihiyon na paslo sa kuwarta asin kapangyarihan. May mga lugar na tinatawan nin opisyal na restriksiyon kan gobyerno an mga aktibidad nin relihiyon.

3. Ano an katuyuhan kan artikulong ini?

³ Inaasahan ni Jesus na ‘magibo kita nin mga disipulo sa mga tawo kan gabos na nasyon.’ (Mat. 28:19) Paano niyato tatabangan an mga tawong mayong relihiyon na mamutan an Diyos asin magin disipulo ni Cristo? Dapat niyatong tandaan na an reaksiyon nin sarong indibidwal sa satong mensahe puwedeng magdepende sa kun sain siya nagdakula. Halimbawa, tibaad iba an reaksiyon kan mga taga Europa sa satong mensahe kisa sa mga taga Asia. Taano? Sa Europa, dakul an nakakaaram mapadapit sa Bibliya asin pamilyar sinda sa ideya na an Diyos an naglalang kan gabos na bagay. Pero sa Asia, an kadaklan sa mga tawo dikit sana o mayo nin aram dapit sa Bibliya, asin tibaad dai sinda nagtutubod na may Kaglalang. Katuyuhan kan artikulong ini na tabangan kitang abuton an puso kan gabos na nanunumpungan ta sa ministeryo, ano man an saindang pinaghalian o paniniwala.

PAPAGDANAYON AN POSITIBONG SABUOT

4. Taano ta puwede niyatong mapagdanay an pagigin positibo?

⁴ Magin Positibo. Kada taon, may mga dating mayong relihiyon na nagigin Saksi ni Jehova. Dakul sa sainda an dati nang igwa nin halangkaw na pamantayan sa moral asin nasusuya sa pagsagin-sagin kan mga tawong may relihiyon. An iba man hababa an pamantayan sa moral asin dakul sa sainda an may maraot na mga gibo-gibo na kaipuhan nindang bayaan. Sa tabang ni Jehova, makakasigurado kita na mahahanap niyato an mga tawong “igwang pusong nasa tamang kamugtakan para sa buhay na daing katapusan.”—Gibo 13:48; 1 Tim. 2:3, 4.

5. Ano sa parati an dahilan kaya marahay an reaksiyon nin mga tawo sa satong mensahe?

⁵ Magin Mabuot Asin Mataktika. Sa parati, marahay an reaksiyon nin mga tawo sa satong mensahe, bakong huli sa kun ano an satong sinasabi, kundi huli sa kun paano niyato iyan sinasabi. Nagugustuhan ninda pag mabuot kita, mataktika, asin talagang interesado sa sainda. Dai ta sinda pinipirit na dangugon an satong sinasabi. Imbes, pinagmamaigutan niyatong masabutan kun taano ta arog kaiyan an pananaw ninda dapit sa relihiyon. Halimbawa, habo kan iba na makipag-ulay manungod sa relihiyon sa mga dai ninda bisto. Para sa iba, kawaran nin modo na haputon an sarong tawo kan opinyon niya manungod sa Diyos. An iba man nasusupog na mahiling na nagbabasa nin Bibliya, lalo na kun kaiba nin sarong Saksi ni Jehova. Ano man an dahilan, hinihinguwa niyatong magin mapagsabot sa saindang sabuot.—2 Tim. 2:24.

6. Paano ipinahiling ni apostol Pablo na madali siyang makibagay, asin paano ta siya maaarog?

⁶ Ano an puwede niyatong gibuhon kun garo baga dai komportable an kaulay ta pag ginagamit ta an mga terminong arog kan “Bibliya,” “paglalang,” “Diyos,” o “relihiyon”? Puwede niyatong arugon si apostol Pablo asin ibagay sa sainda an paagi kan satong pakikipag-ulay. Pag nakikipag-ulay sa mga Judio, ginamit ni Pablo an Kasuratan. Alagad, kan nakipag-ulay siya sa mga pilosopong Griego sa Areopago, dai niya sinabi na nagkokotar siya sa Bibliya. (Gibo 17:2, 3, 22-31) Paano ta maaarog an halimbawa ni Pablo? Kun makanumpong ka nin tawong dai nagtutubod sa Bibliya, tibaad mas marahay na dai direktang gamiton iyan pag nakikipag-ulay sa saiya. Kun marisa mo na tibaad dai komportable an saro na mahiling siya kan iba na nagbabasa nin Bibliya, purbaran na ipahiling sa saiya an teksto na dai naririsa kan iba, halimbawa paagi sa paggamit nin gadyet.

7. Ano an tibaad kaipuhan niyatong gibuhon tanganing maarog an halimbawa ni Pablo na ilinadawan sa 1 Corinto 9:20-23?

⁷ Magin Mapagsabot Asin Magdangog. Dapat na hinguwahon niyatong masabutan kun taano ta arog kaiyan an kaisipan kan mga tawong nanunumpungan ta. (Tal. 20:5) Pag-isipan giraray an halimbawa ni Pablo. Nagdakula siya na kaibanan an mga Judio. Siguradong kinaipuhan niyang ibagay an saiyang paghuhulit sa mga Hentil na dikit sana an aram o mayong aram dapit ki Jehova asin sa Kasuratan. Tibaad kaipuhan niyatong mag-research o maghapot sa eksperyensiyadong mga tugang sa kongregasyon tanganing magkaigwa kita nin empatiya asin masabutan an mga tawo sa satong teritoryo.—Basahon an 1 Corinto 9:20-23.

8. Ano an sarong paagi tanganing makapuon nin pag-uulay dapit sa Bibliya?

⁸ An pasuhan niyato iyo na mahanap an mga “maninigo.” (Mat. 10:11) Para magin epektibo, dapat na haputon niyato an mga tawo kun ano an saindang opinyon, dangan magdangog na marhay sa sainda. An sarong brother sa England hinahapot an mga tawo kun ano an opinyon ninda dapit sa kun paano magkakaigwa nin maugmang pamilya, kun paano papadakulaon an mga aki, o kun paano aatubangon an inhustisya. Pagkatapos madangog an simbag ninda, sasabihon niya, “Ano an masasabi mo sa sadol na ini na isinurat mga 2,000 na taon na an nakaagi?” Dangan, ipinapahiling niya sa sainda an piniling marhay na mga teksto gamit an saiyang cellphone na dai sinasambit an terminong “Bibliya.”

ABUTON AN PUSO NIN MGA TAWO

9. Paano niyato puwedeng matabangan an mga tawo na sa parati habong makipag-ulay dapit sa Diyos?

⁹ Puwede niyatong maabot an puso nin mga tawo na sa parati habong pag-ulayan an manungod sa Diyos paagi sa pakikipag-ulay sa sainda dapit sa temang pinagkakainteresan ninda. Halimbawa, dakul an napapahanga sa mga bagay sa daga asin sa langit. Kaya puwede niyatong sabihon: “Dakul baga an imbensiyon na inarog kan mga siyentista sa mga bagay na nahihiling ninda sa daga. Halimbawa, an mga nagdidisenyo nin mikropono pinag-aadalan an talinga nin mga insekto, asin an mga nagdidisenyo nin kamera pinag-aadalan an mata nin mga insekto. Ano an naiisip mo pag nahihiling mo an mga bagay sa daga? Naglataw na lang daw an mga iyan, may naglalang, o iba pa?” Pagkatapos magdangog na marhay, puwede tang sabihon: “Pag may nanunudan an mga inhenyero sa disenyo kan talinga asin mata, tibaad maihapot ta kun kiisay sinda nakakanuod. Nagkainteres ako sa isinurat nin sarong parasurat kan suanoy na panahon: ‘Dai daw makakadangog an Saro na naggibo kan talinga? Dai daw makakahiling an Saro na nagporma kan mata? . . . Siya baga an Saro na nagtatao nin kaaraman sa mga tawo!’ Kaagid man kaiyan an nagin kongklusyon nin nagkapirang siyentista.” (Sal. 94:9, 10, NW) Dangan puwede niyatong ipahiling an sarong video hali sa jw.org^® sa “Mga Interbyu at Karanasan” sa serye na “Komento sa Pinagmulan ng Buhay.” (Hilingon sa PUBLIKASYON > VIDEO.) O puwede ta sindang tawan kan brosyur na Linalang daw an Buhay? o kan brosyur na The Origin of Life—Five Questions Worth Asking.

10. Paano niyato puwedeng punan an pakikipag-ulay sa saro na habong pag-ulayan an dapit sa Diyos?

¹⁰ Kadaklan sa mga tawo gustong-gusto nin mas marahay na puturo. Alagad, dakul an natatakot na an daga malalaglag o dai na maiistaran. Sinabi nin sarong nagbibiyaheng paraataman sa Norway na an mga tawong habong makipag-ulay dapit sa Diyos sa parati gustong pag-ulayan an dapit sa mga nangyayari sa kinaban. Pagkatapos kumustahon an mga tawo, sinasabi niya: “Sa hiling mo, magkakaigwa pa daw kita nin mas marahay na puturo? Siisay daw an makakatao kaiyan sa sato—mga pulitiko, mga siyentista, o may iba pa?” Pagkatapos magdangog na marhay, binabasa o kinokotar niya an sarong teksto na nagsasambit dapit sa mas marahay na puturo. Nagkakainteres an nagkapira sa panuga kan Bibliya na an daga magdadanay sagkod lamang asin na an marahay na mga tawo an maistar diyan nin daing sagkod.—Sal. 37:29; Par. 1:4.

11. Taano ta dapat niyatong purbaran an manlain-lain na pamamaagi, asin paano ta maaarog an halimbawa ni Pablo na sinambit sa Roma 1:14-16?

¹¹ Mas marahay kun magamit kita nin manlain-lain na pamamaagi sa mga nakakaulay niyato. Taano man? Huling magkakalain an lambang indibidwal. An pinagkakainteresan nin saro tibaad habong pag-ulayan kan iba. May mga gustong pag-ulayan an Diyos o an Bibliya, mantang an iba man mas gustong ibang tema nguna an pag-ulayan. Ano man an sitwasyon, dapat niyatong aprobetsaran an oportunidad na makaulay an gabos na klase nin tawo. (Basahon an Roma 1:14-16.) Siyempre, isinasaisip niyato na si Jehova an nagpapatalubo kan katotoohan sa puso kan mga namumuot sa katanusan.—1 Cor. 3:6, 7.

KUN PAANO IHIHIRAS AN KATOTOOHAN SA MGA TAGA ASIA

12. Ano an puwede niyatong gibuhon para tabangan an mga tawo sa mga nasyon sa Asia na dai pa lamang napag-isipan kun baga igwa nin Kaglalang?

¹² Sa bilog na kinaban, dakul na parahayag an nakakanumpong nin mga tawo na hali sa mga nasyon sa Asia, kaiba an nagkapirang hali sa mga lugar na may restriksiyon an gobyerno sa mga aktibidad nin relihiyon. Sa nagkapirang nasyon sa Asia, dakul na tawo an dai pa lamang napag-isipan kun baga igwa nin Kaglalang. An iba gustong makaaram asin nag-aako nin direktang alok nin pag-adal sa Bibliya, pero an iba sa primero dai interesado sa bagong mga ideya. Ano an magigibo ta tanganing tabangan sinda? Narisa kan pirang eksperyensiyadong parahayag na marahay na pamamaagi na magpuon sa kaswal na pag-uulay, magpahiling nin personal na interes, dangan pag angay sa kamugtakan, isinasaysay ninda kun paano nagin mas marahay an saindang buhay kan inaaplikar na ninda an espesipikong mga prinsipyo sa Bibliya.

13. Ano an puwedeng ipakipag-ulay sa mga tawo para magkainteres sinda sa Bibliya? (Hilingon an ritrato sa cover.)

¹³ Dakul na tawo an inot na nagkakainteres sa madunong na mga sadol kan Bibliya na nakakatabang sa pang-aroaldaw na buhay. (Par. 7:12) Sa New York, sarong sister na nagdadalaw sa mga nagtataram nin Chinese Mandarin an nagsabi: “Hinihinguwa kong magpahiling nin interes sa mga tawo asin magdangog sa sainda. Pag naaraman kong bagong lipat sinda hali sa ibang nasyon, hinahapot ko sinda: ‘Kumusta man an pag-adjust mo? May nakua ka nang trabaho? Okey man an pagtratar saimo kan mga taga digdi?’” Kun minsan, nagigin oportunidad ini na maipakipag-ulay an sarong katukduan sa Bibliya. Pag angay sa kamugtakan, idinadagdag niya: “Ano sa hiling mo an kaipuhan tanganing magkaigwa nin marahay na relasyon sa iba? Puwede ko daw ipahiling sa saimo an sarong talinhaga sa Bibliya? Sinasabi kaiyan: ‘Pag may nagpuon nin iriwal, garo iyan may nagbukas nin sagop; kaya humali ka na bago pa magkaigwa nin ribok.’ Sa hiling mo, makakatabang daw an sadol na ini tanganing magin marahay an pakikiiba-iba ta sa iba?” (Tal. 17:14, NW) An arog kaiyan na pakikipag-ulay makakatabang sa sato na madeterminaran kun sairisay an puwede niyatong dalawon liwat.

14. Paano tinatabangan nin sarong brother sa Far East an mga tawong nagsasabi na dai sinda nagtutubod sa Diyos?

¹⁴ Paano man an mga nagsasabi na dai sinda nagtutubod sa Diyos? Sarong brother na haloy nang naghuhulit sa mga tawong mayong relihiyon sa Far East an nagsabi: “Sa parati, pag may nagsabi digdi na, ‘Dai ako nagtutubod sa Diyos,’ an buot niyang sabihon dai siya nagtutubod sa mga diyos na sinasamba kan kadaklan sa lugar ninda. Kaya sa parati, inuuyunan ko siya na kadaklan sa mga diyos gibo sana nin tawo asin bakong totoo. Parati kong binabasa an Jeremias 16:20: ‘Makakagibo daw an tawo nin sadiri niyang mga diyos? Dai! Kun gumibo siya, an mga iyan dai puwedeng magin totoong mga diyos.’ (BPVd) Dangan hinahapot ko sinda: ‘Paano ta daw maaaraman an pagkakalain kan totoong diyos asin kan mga diyos na gibo sana nin tawo?’ Dinadangog kong marhay an simbag ninda, dangan binabasa ko an Isaias 41:23: ‘Sabihi kami kun ano pa an mangyayari, dangan maaaraman mi na kamo mga diyos!’ (BPV) Tapos, ipinapahiling ko sa sainda an sarong halimbawa kun paano ihinula ni Jehova an mangyayari sa maabot.”

15. Ano an manunudan niyato sa halimbawa nin sarong brother sa East Asia?

¹⁵ Ginagamit nin sarong brother sa East Asia an minasunod na pamamaagi pag nagdadalaw liwat. Sinabi niya: “Ipinapahiling ko sa sainda an mga halimbawa nin madunong na mga sadol kan Bibliya na nakakatabang sa pang-aroaldaw na buhay, mga propesiya sa Bibliya na nautob na, asin mga ley na nagkokontrol sa uniberso. Dangan ipinapahiling ko sa sainda kun paano an gabos na puntong ini nagpaparisa na igwa nin buháy asin madunong na Kaglalang. Pag nag-uyon an saro na posibleng igwa nin Diyos, ipinapahiling ko na sa saiya an sinasabi kan Bibliya dapit ki Jehova.”

16. Sigun sa Hebreo 11:6, taano ta kaipuhan kan mga tinutukduan sa Bibliya na magkaigwa nin pagtubod sa Diyos asin sa Bibliya, asin paano ta sinda matatabangan na magkaigwa kaiyan?

¹⁶ Pag nagkokondukta kita nin pag-adal sa Bibliya sa mga tawong nagdakula na mayong relihiyon, dapat na padagos niyatong pakusugon an saindang pagtubod na nag-eeksister an Diyos. (Basahon an Hebreo 11:6.) Asin kaipuhan niyatong tabangan sinda na magkaigwa nin pagtubod sa Bibliya. Para magibo ini, tibaad kaipuhan niyatong utruhon sa sainda nin dakul na beses an pirang punto. Sa kada sesyon nin pag-adal, tibaad kaipuhan pag-ulayan an ebidensiya na an Bibliya Tataramon nin Diyos. Puwedeng kaiba digdi an halipot na pag-uulay dapit sa mga propesiya sa Bibliya na nautob na, sa pagigin eksakto kan Bibliya pag-abot sa siyensiya saka kasaysayan, o sa madunong na mga sadol kan Bibliya na nakakatabang sa pang-aroaldaw na buhay.

17. Ano an puwedeng magin epekto sa mga tawo kan pagkamuot na ipinapahiling ta sa sainda?

¹⁷ Tinatabangan niyato an mga tawo na magin disipulo ni Cristo paagi sa pagpahiling nin pagkamuot sa sainda, may relihiyon man sinda o mayo. (1 Cor. 13:1) Mantang tinutukduan ta sinda, pasuhan niyato na ipahiling sainda na namumutan kita nin Diyos asin na gusto niyang kamutan ta man siya. Kada taon, rinibong tawo na dati daing gayo o bakong interesado sa relihiyon an nababawtismuhan huling nanudan nindang kamutan an Diyos. Kaya magin positibo, saka magpahiling nin personal na interes asin pagkamuot sa gabos na klase nin tawo. Magdangog sa sainda. Hinguwahon na masabutan sinda. Paagi sa saimong halimbawa, tukduan sinda na magin disipulo ni Cristo.