Pag-aatubang kan Maogmang Bareta—Paagi sa Suskripsion
1 “ ‘Uya! May mga aldaw na maabot,’ sabi kan Soberanong Kagurangnan na Jehova, ‘asin mapadara ako nin gutom sa daga, . . . sa pagdangog kan mga tataramon ni Jehova.’ ” (Amos 8:11) An mga tataramon na ini naootob ngonyan. An mga tawo sa gabos na lugar nagugutom sa katotoohan hale sa Tataramon nin Dios.
2 Ikatatao kan banwaan ni Jehova an pangangaipong ini. Sa laog nin labing sanggatos na taon ginamit niato an The Watchtower tanganing makatabang na mapanigoan an espirituwal na gutom na iyan. Sa nakaaging 68 taon an Awake! nagtatabang man sa mga sinsero na magkamit nin tamang kaaraman sa katotoohan.
3 Daing duwa-duwa na kamo naogma asin nakinabang sa dakol na marahay na mga artikulo na nagluwas sa mga magasin na ini sa nag-aging mga taon. Taano ta dai tabangan an iba na makinabang man? Paano niato iyan magigibo?
4 Sa Abril asin Mayo iaalok niato an suskripsion partikularmente sa The Watchtower. Minsan siring, tibaad gusto nin iba an Awake! asin magigin angay man kun beses na mag-alok nin suskripsion sa magasin na ini. May marahay na mga eksperyensia sa pagkua nin suskripsion. Halimbawa an sarong tugang sa Macao nakakua nin 82 na bagong suskripsion sa sarong bulan asin 200 kan suminunod na bulan. Minsan pa tibaad dai kita magkaigwa nin siring na kapangganahan, an positibong kaisipan tunay na makatatabang sa pakakua nin suskripsion.
5 An positibong kaisipan na ini napakahalaga. An sarong paraataman sa sirkito nagsurat: “Ini nagkaigwa nin marahay na epekto sa samo gabos. Huli sa pagigin positibo manongod sa pagkua nin suskripsion ordinaryo na para sa samong grupo na magpuli hale sa paglilingkod na may nakuang kisuerra apat o limang suskripsion.”
6 May inandam na masiram na espirituwal na pagkakan para sa sato an “maimbod asin madonong na oripon”! Sa pagtampok kan temang “The Bible and Family Life,” an The Watchtower kan Abril 1, 1988 manongod sa temang “Why So Many Runaway Children?” asin igwa man nin marahay na artikulo manongod sa “Strengthening the Family Bonds.” An Awake! kan Abril 8, 1988 itinatampok an temang “Are We in the Last Days?” Ini ekselenteng mga tema na magugustohan nin gabos na klaseng tawo sa satong teritoryo asin makadadagka sainda na sumuskriber sa mga magasin.
7 Minsan ngani naggagrabe an espirituwal na gutom, maogma niatong naeeksperyensiahan an kaotoban kan Isaias 65:13: “Uya! An sakong mga lingkod makarakan.” Abunda kita sa pagkakan! Mantang abunda an espirituwal na kakanon, taano ta dai iyan ihiras sa iba? Magin positibo sa pag-alok nin suskripsion sa gabos na oportunidad sa Abril asin Mayo!