An Tataramon nin Dios Mapuwersa
1 Taano an Biblia ta nagkaigwa nin siring kamapuwersang impluwensia sa buhay nin minilyon na tawo? An sarong dahelan iyo na iyan igwa nin paggiya hale sa Kaglalang sa tawo. (Sal. 19:7-11; 119:105) An mga kagsurat sa Biblia inadmitir na an Kasuratan dai nagibo sa sadiri nindang mga paghihingoa, kundi giniyahan sinda kan banal na espiritu.—2 Sam. 23:2; 2 Ped. 1:20, 21.
2 Kun pinag-aadalan niato asin iinaaplikar an mga tataramon na isinurat sa paggiya kan banal na espiritu, iyan nagkakaigwa nin puwersa sa satong buhay. Ini maheheling sa dakulang pagbakle na ginibo nin dakol na tawo sa saindang buhay tanganing makaoyon sa Tataramon nin Dios.
PUWERSA SA SATONG BUHAY
3 May puwersa daw sa saindong buhay an Tataramon nin Dios? Maninigo na kita “masibot na gayo sa tataramon” asin nagmamawot na tabangan an iba na orog na makanood manongod dian. (Gibo 18:5) Si Pablo nagsurat: “Kan akoon nindo an tataramon nin Dios, . . . iyan inako nindo, bakong siring sa mga tataramon nin tawo, kundi, siring sa iyo man nanggad, siring sa tataramon nin Dios, na naggigibo man saindo na nagtuturubod.” (1 Tes. 2:13) Tanganing an Tataramon nin Dios magkaigwa nin puwersa sa satong buhay kaipuhan na maaraman niato an itinotokdo kaiyan asin iaplikar iyan. (Heb. 4:12) Dangan mamomotibar kita kapareho ni Pablo na gamiton an satong panahon asin kosog sa pagtabang sa iba na orog na makanood manongod sa Biblia.
BAGONG TOPIKONG MAPAG-OOLAYAN
4 An satong bagong Topikong Mapag-oolayan, “Taano ta Maninigong Pag-adalan an Biblia?” nakatatabang na darahon an atension sa halaga kan Biblia sa buhay nin mga tawo. May duwang dahelan na itinatao kun taano ta maninigo niatong pag-adalan iyan: (1) Iyan Tataramon nin Dios, asin (2) iyan nagtatao nin kaaraman na minagiya pasiring sa buhay na daing katapusan. Dinadagka mi an gabos na praktison an bagong Topikong ini asin gamiton iyan sa langtad ngonyan na Oktubre.
5 Kun nag-aalok kan Oktubre 8 Awake!, puwede niatong ipaheling kun paano an Tataramon nin Dios nagpapaliwanag kun taano ta tinotogotan nin Dios an karatan asin kun taano ta may nangyayaring maraot sa marahay na mga tawo. Dangan, kaoyon sa Juan 17:3, puwede niatong buksan sa ikatolong artikulo kan serye asin ipaheling kun paano katuyohan ni Jehova na tapuson an gabos na kasakitan asin nanunuga sia nin buhay na daing katapusan sa mga nagkukua nin kaaraman manongod sa saiya. Nasisierto mi na maririsa nindo na an bagong Topikong ini madaling ikabagay sa ano man na temang itinatampok nindo kun nag-aalok kan suskripsion sa Awake! sa bulan na ini.
PUMOON NIN MGA PAG-ADAL SA BIBLIA
6 Bako sanang pagwaras nin babasahon an mahalaga. Boot niatong tabangan an mga interesado na regular na mag-adal sa Biblia. Nasa isip ini, pagmaigotan na iintrodusir an pag-adal sa enot na pagdalaw, na ginagamit an magasin na iinaalok nindo o an pulyetong “Look!” Ipaaram sa kagharong na nagmamakolog kamo sa saindang espirituwal na kapakanan asin boot nindong tabangan sinda na makanood nin orog manongod sa Tataramon nin Dios.
7 Solamente paagi sa pakanood sa katotoohan manongod sa Tataramon nin Dios na an mga tawong sinsero mapahihirong kumuyog sa paggiya kaiyan, na minagiya pasiring sa buhay na daing katapusan. (Tal. 2:1, 20, 21) Kun gigibohon niato an satong kabtang, maheheling niato an pagtalubo kan impluwensia kan Tataramon nin Dios sa satong teritoryo mantang an mga bagohan nagigin makinuyog sa pagtubod.—Gibo 6:7.