Pag-aatubang kan Maogmang Bareta—Na Ginagamit an Marahay na mga Paagi sa Pagtotokdo
1 An pagtotokdo mahalagang pasohan para sa mga Kristiano. (Mat. 28:19, 20) Ini regular na ginibo kan mga apostol. (Gibo 5:42; 18:11; 20:20) Boot niatong arogon an marahay na halimbawa kan mga paratokdong ini kan maogmang bareta.—1 Cor. 11:1.
2 An duwang marahayon na paagi sa pagtotokdo na ginamit ni Jesus asin kan saiyang mga apostol iyo ini: (1) an paggamit nin mga hapot, asin (2) pagdodoon nin espisipikong mga punto kun binabasa an teksto. Paano daw niato magagamit an mga paaging ini sa pagharongharong asin paggibo nin mga pag-adal sa Biblia?
SA PAGHARONGHARONG
3 Marahay na hagadon an opinyon kan kagharong tanganing an satong pag-aatubang ikaangay sa saiyang partikular na mga pangangaipo. An angay na mga hapot makatatabang digdi. An totoo, an mga hapot na nag-aagda sa kagharong na magkomento ginibo an iba na mas andam na maghinanyog sa satong sasabihon.
4 Alagad paano niato maaaraman kun ano an ihahapot? Marahay na isipon nin pirang minuto kun anong klase an mga tawo sa satong teritoryo, kun ano an saindang mga opinyon asin an mga bagay na pinaghahaditan ninda. Dangan umisip nin mga hapot na ikahahapot tanganing madagka sindang makipag-olay.—Helingon an School Guidebook, pahina 51-2.
5 Mahalaga man an paagi niato nin pagbasa sa teksto sa pagharongharong. Boot niatong magirumdoman kan nagdadangog an espisipikong punto na itinotokdo niato. Tanganing magibo ini, kaipuhan na gumamit kita nin tamang pagdodoon asin idoon an espisipikong mga termino. Ini magigibo paagi sa pagbasa sa mayor na mga termino na may orog na init o kosog nin boses, o paagi sa pag-apod kan atension sa masunod niatong babasahon. Saro pa, pakabasaha kan teksto, tibaad boot niatong otrohon an mayor na mga termino tanganing orog na ikadoon an punto.—Helingon an School Guidebook, pahina 126-7.
SA MGA INAADALAN SA BIBLIA
6 An paggamit nin mga hapot kaipuhan sa mga pag-adal sa Biblia. Iyan puwedeng makapagpaisip sa nag-aadal asin makatabang saiya na magkaigwa nin mas malinaw na pakasabot. Kaya, an dagdag na mga hapot na mayo sa libro puwedeng ihapot. Sa pahina 51 kan School Guidebook may nakatatabang na mga suhestion na marerepaso nindo paminsanminsan.
7 Kaipuhan an marahay na paggamit sa Biblia. Minsan ngani an ibang teksto tibaad kinotar sa libro, kun beses tibaad kapakipakinabang na pabasahon nin direkta sa Biblia an nag-aadal. Siertohon na an pangenot na mga termino ikadoon nin tama tanganing masabotan kan nag-aadal kun taano ta kinotar an teksto asin an aplikasyon kaiyan.
8 An satuya logod na epektibong paggamit sa mga hapot asin tamang pagdodoon sa pagbasa sa mga teksto makatabang sato na makapagtokdo nin epektibo asin gumibo nin mga disipulo.—Mat. 28:19.