Tokdoan an mga Inaadalan Kun Paano Gagamiton an Biblia
1 “Kan akoon nindo an tataramon nin Dios, na nadangog nindo sa samo, iyan inako nindo, bakong siring sa mga tataramon nin tawo, kundi, siring sa iyo man nanggad, siring sa tataramon nin Dios.” (1 Tes. 2:13) Bilang tunay na mga Kristiano, boot niato na pabayaan na magtaram an Biblia. Kun siring, kun nangengenot sa pag-adal sa Biblia, tabangan an saindong inaadalan na masabotan na an nanonodan nia mga kaisipan ni Jehova, bakong mga kaisipan nin tawo. Paagi sa pagtotokdo sa mga inaadalan na gamiton nin marahay an Biblia, maparirigon nindo sa sainda an pagkompiar sa Kasuratan, na marigon na pundasyon para sa pagtubod, asin an kakayahan na ipangatanosan an saindang mga tinutubod gikan sa Biblia.—2 Tim. 3:16; 1 Ped. 3:15.
GAMITON AN BIBLIA
2 Poon sa kapinonan, ipaheling sa inaadalan an pahina sa Biblia na naglilista kan gabos na libro sa Biblia asin itokdo saiya kun paano nia mahahanap an kada saro. Dakol na teksto an kinokotar sa mga publikasyon kan Sosyedad, asin an iba sitado alagad dai kotado. Sa primero, tibaad marahay na hanapon asin basahon iyan gabos sa Biblia, sa siring idinodoon na iyan pag-adal sa Biblia. Ini magkakaipo nin ekstrang panahon, pero matatabangan kaiyan an inaadalan na magin pamilyar sa saiyang Biblia. Mapatatalubo man kaiyan an saiyang pagsarig na an sinasabi sa mga publikasyon basado sa Biblia.
3 Kun naghahapot an inaadalan, tabangan siang manompongan an simbag sa Biblia paagi sa pagbasa sa angay na mga teksto. Sa paaging ini maaaraman nia na an inaako nia simbag nin Dios sa saiyang mga hapot. (Juan 17:17) Tabangan an inaadalan na mangatanosan sa mga teksto asin lubos na masabotan an simbag kan Biblia. Sa katapusan nin pag-adal, tibaad boot nindong repasohon an duwa o tolong pangenot na teksto paagi sa paghagad sa inaadalan na basahon iyan asin ipaliwanag sa sadiri niang tataramon. Ini magpapangyari saiya na ipangatanosan an saiyang pagtubod gikan sa Biblia.—Gibo 17:1-3.
4 Dagkahon an inaadalan na hanapon asin mangatanosan sa mga sitadong teksto sa saiyang pag-andam kan leksion sa saiyang personal na pag-adal, pag-adal sa Torrengbantayan, asin iba pang pagtiripon. Sa siring, magigin siang andam na gamiton an saiyang Biblia sa pagtiripon asin tumao nin komentong basado sa Kasuratan sa materyal na pinag-aadalan. Itokdo man saiya kun paano makukua an mga teksto manongod sa dakol na laen-laen na tema paagi sa indese kan New World Translation. Kun an teksto binasa asin siniyasat nin personal, minararom na gayo an pagkatanom kan katotoohan na itinotokdo.
5 An pagtokdo sa mga inaadalan kun paano gagamiton an Biblia magkakaigwa nin nagdadanay na mga pakinabang. Mamimidbid kan inaadalan na an katokdoan na saiyang inaako gikan sa Dios. Iyo, “an tataramon nin Dios buhay” asin mapuwersa. (Heb. 4:12) Boot niatong tabangan an iba na magin eksperto sa ‘paggamit sa tataramon kan katotoohan sa tamang paagi.’—2 Tim. 2:15.