Pagkondukta nin mga Pag-adal sa Biblia sa Harong
1 Paano an pagkondukta nin epektibong pag-adal sa Biblia sa harong? Paano pag-oolayan an mga teksto? Siisay an mabasa kan mga parapo? Paano niato matatabangan an estudyante na isapuso an katotoohan? Anong mga peligro an kaipuhan na likayan?
2 Kun Paano an Pagkondukta nin Pag-adal: Sa pankagabsan na pagtaram, an pag-adal sa Biblia sa harong sinusunod an paagi kan Pag-adal sa Torrengbantayan. Enot, binabasa an parapo. Dangan an nagkokondukta kan pag-adal naghahapot kan hapot na nasa parapong iyan asin tinotogotan an estudyante na sumimbag. Kun nag-aalangan an estudyante, maninigong maghapot an nagkokondukta nin naggigiyang mga hapot tanganing matabangan an estudyante na mangatanosan manongod sa tema asin makaabot sa tamang konklusyon.
3 Pag-olayan kun paanong an mga teksto minaaplikar sa materyal. Ipaheling sa estudyante an kinotar na mga teksto, asin mangatanosan saiya kun paano iyan minaaplikar. Kun sinisitar an mga teksto alagad dai kinotar, marahay na buksan iyan sa Biblia. Dangan ipabasa iyan sa estudyante asin komentohan kun paano iyan minasuportar sa sinasabi sa parapo.
4 Tabangan an Estudyante na Isapuso an Katotoohan: Pakosogon an mga estudyante na mag-andam nin marhay para sa pag-adal. Idoon na an pagbasa mahalaga sa pakanood. An nagkapirang nagkokondukta ipinababasa sa estudyante an gabos na parapo. An iba nakikisarosalida sa estudyante sa pagbasa kaiyan. Maninigong gumamit nin marahay na paghusgar, na isinasaisip an espirituwal na pag-oswag kan estudyante.
5 An mekanikal na pag-adal sa leksion na mayo nin praktikal na aplikasyon tibaad makatabang sa estudyante na umako nin kaaraman, pero pinaniniwalaan daw nia an saiyang nanonodan? Tanganing ikasapuso nia an katotoohan, hapoton sia kun paano an materyal nakakaapektar sa saiya personalmente. Paano nia magagamit an saiyang nanodan? Gumamit nin nagsisiyasat na mga hapot tanganing maabot an puso kan estudyante.
6 Likayan an mga Peligro: Igwa nin mga peligro na dapat likayan kun nagkokondukta nin pag-adal sa Biblia. Kun minalataw an mga tema na bakong konektado sa materyal na pinag-oolayan, parateng pinakamarahay na pag-olayan iyan sa konklusyon kan pag-adal o sa ibang okasyon. Siring man, mahalaga na hagadon sa estudyante na tumao nin mga simbag sa sadiring mga tataramon imbes na basahon iyan sa libro. Tatabangan kamo kaini bilang an nagkokondukta na madeterminaran kun baga nasasabotan kan estudyante an materyal.
7 Taano ta dai gibohon na pasohan nindo na makapagkondukta nin kisuerra sarong pag-adal sa Biblia? Bako iyan depisil gibohon kun magsasarig kamo ki Jehova asin susunodon nindo an pundamental na paagi kan Pag-adal sa Torrengbantayan. An pinakaepektibong paagi na gumibo nin mga disipulo iyo an pagkondukta nin pag-adal sa Biblia sa harong.—Mat. 28:19, 20.