Magin Andam na Marhay Para sa Pagtotokdo
1. Taano ta maninigo kitang magkonsentrar sa pagtabang sa inaadalan sa Biblia na makapatalubo nin pagpahalaga?
1 Kun nagkokondukta kita nin pag-adal sa Biblia, dapat na andam kitang marhay tanganing mapahiro niato an inaadalan sa Biblia na maglingkod ki Jehova. Hingoahon na magin epektibo an satong mga paghihingoa paagi sa pagtabang sa saiya na makapatalubo nin pagpahalaga sa katotoohan sa Biblia. Ini man magmomotibar sa inaadalan sa Biblia. (Deut. 6:5; Tal. 4:23; 1 Cor. 9:26) Paano man nanggad niato magigibo ini?
2. Ano an papel kan pamibi sa marahay na pag-andam?
2 Pag-andam na May Pagpamibi: Huling si Jehova an nagpapatubo kan banhi nin katotoohan sa puso kan inaadalan sa Biblia, angay na ponan niato an pag-andam para sa pag-adal paagi sa espesipikong pamibi para sa inaadalan asin sa partikular na mga pangangaipo nia. (1 Cor. 3:6; Sant. 1:5) An siring na pamibi puede man na makatabang sa sato na determinaran kun paano kita orog pang makakatabang na mapano an puso nia nin “tamang kaaraman” dapit sa kabotan ni Jehova.—Col. 1:9, 10.
3. Paano kita puedeng mag-andam na isinasaisip an inaadalan sa Biblia?
3 Isaisip an Inaadalan sa Biblia: Aram ni Jesus na kaiba sa epektibong pagtotokdo an pagsaisip sa mga nagdadangog. Sa kisiera duwang pangyayari, hinapot si Jesus nin magkaparehong hapot: “Paagi sa paggibo nin ano na ako magmamana nin buhay na daing katapusan?” Sa duwang pagsimbag nia, magkalaen an ginamit niang paagi. (Luc. 10:25-28; 18:18-20) Maninigo niatong isaisip an inaadalan sa Biblia mantang kita nag-aandam. Arin sa sitadong mga teksto an babasahon sa panahon kan pag-adal? Gurano kadakol an pagmamaigotan niatong ipakipag-adal sa saiya? Anong mga punto sa leksion an tibaad masakitan siang saboton o akoon? Kun maaantisipar niato an nagkapira sa mga tibaad ihapot nia, magigin mas andam kita na sumimbag nin epektibo.
4. Ano an kaiba sa marahay na pag-andam?
4 Repasohon an Pag-aadalan: Dawa kun an pag-aadalan dakol na beses na niatong napag-adalan, iyan an enot na beses na gagamiton niato iyan sa sarong partikular na inaadalan sa Biblia. Kun gusto niatong maabot an saiyang puso, mahalaga nanggad an marahay na pag-andam para sa kada pag-adal. Nangangahulogan ini na ginigibo niato kun ano an dinadagka niatong gibohon kan satong inaadalan sa Biblia. Repasohon an pag-aadalan, kaiba an sitadong mga teksto, na isinasaisip an inaadalan sa Biblia, asin puede gayod na kuritan an mayor na mga punto.—Roma 2:21, 22.
5. Paano niato maaarog si Jehova?
5 Interesadong marhay si Jehova sa pag-oswag nin lambang inaadalan sa Biblia. (2 Ped. 3:9) Paagi sa pagtao nin panahon tanganing mag-andam sa kada pag-adal sa Biblia, ipinapaheling niato an kaparehong mamomoton na interes.