Pagtabang sa mga Parahayag na Iregular
1 Si Jesus nagsabi: “An lambang nagdadangog kan sakong mga tataramon na ini asin naggigibo kaiyan ikababaing sa madonong, na nagtogdok kan saiyang harong sa gapo.” (Mat. 7:24) Ini nangangahulogan nin pagbunga nin marahay na mga gibo, kaiba an paghuhulit kan maogmang bareta. An siring na pagkuyog nagtatao nin garo-gapong pundasyon na dai ikaaanod sa mga bagyo nin kasakitan.
2 An iba sa sato mga parahayag na iregular, asin ini ikinahahadit na gayo niato. Ano an puwedeng magin dahelan na an saro pabayaan na umagi an sarong bilog na bulan na dai man lamang nakikakabtang sa paghuhulit asin paggibo nin mga disipulo?
3 An iba tibaad nagkahelang nin grabe, asin an iba tibaad idinigson an paglilingkod sa langtad sagkod sa paghinanapos kan bulan, iyo sana iyan ta sinda nagkaigwa nin dai linalaoman na mga problema na nakaolang sa sainda sa pakikikabtang. An iba tibaad kulang nin pagpahalaga sa ministeryo bilang kayamanan nin paglilingkod na maninigong ipaorog. (2 Cor. 4:7) An pangigipit nin agom na daing pagtubod tibaad sarong bagay na nakapaluluya. An dai pakapagpadanay sa marahay na ugale sa pag-adal asin sa pagigin regular sa pag-atender sa pagtiripon nakaapektar sa iba, kaya nawaran sinda kan saindang pakamate nin pag-apreta. (2 Ped. 3: 11, 12) May nakaapektar sa saindang puso. Kaya dai sinda napahihirong magtaram gikan sa kapanoan kaiyan. (Mat. 12:34) Ano man an dahelan, boot niatong tabangan sinda.
AN MAGIGIBO KAN KAMAGURANGAN
4 An kamagurangan maninigong maghingoa na aramon an mga kamugtakan asin pangangaipo kan gabos sa kongregasyon tanganing matabangan sinda. Sa saindang pagtiripon maninigong risahon kan kamagurangan kun siisay an mga iregular asin aramon kun siisay an makatatabang sa sainda asin kun paano. Maninigong risahon kan sekretaryo an ano man na tendensia pasiring sa pagigin iregular sa paglilingkod sa langtad kun sinusuratan an Congregation’s Publisher Record card.
AN MAGIGIBO KAN MGA NANGENGENOT SA PAG-ADAL SA LIBRO
5 Kada bulan maninigong tawan kan sekretaryo an mga nangengenot sa Pag-adal sa Libro nin lista kan mga dai nakareport, tanganing ikatao an listong tabang. (Helingon an An Satong Ministeryo sa Kahadean para sa Hulyo, 1984, pahina 3.) An nangengenot sa pag-adal maninigong maboot na kaolayon an mga iregular tanganing maseguro kun ano an tibaad nakaoolang sa sainda asin kun paano sia makatatabang. (Tal. 27:23) Pakaarama kan saiyang kamugtakan, maninigong iareglo kan nangengenot na ibanan sia nin personal o nin ibang maygurang na parahayag o payunir. Tibaad makatabang man an pagtao nin praktikal na mga suhestion sa paggibo nin iskedyul na angay sa saindang kamugtakan. Makapagpaplano daw sindang regular na makikabtang sa enot na Domingo o ikaduwa saka ikaapat na Sabado kan bulan?
6 Kun minasongko sa mga grupo nin pag-adal sa libro, puwedeng iareglo kan paraataman sa paglilingkod na songkoon an mga iregular kaiba an nangengenot sa pag-adal. Kaya an duwang maygurang na tugang puwedeng magtabang sa pagtao nin hatol dangan tabangan an mga ini na makatogdok nin garo-gapong pundasyon nin pagkuyog sa pagboot ni Cristo na maghulit asin gumibo nin mga disipulo. Sa siring tibaad sinda mapahiro na ibugtak an paghuhulit sa itaas kan listahan ninda nin mga ipaoorog. (Roma 10:10) Maghingoa kita sa paaging ini tanganing ikapaheling an satong pagkamoot para sa “mga may relasyon sa sato sa pagtubod.” —Gal. 6:10.