Tabangan an mga Nag-aatender sa Pagtiripon
1 Si David nagpahayag nin odok sa pusong kamawotan kan sia magsabi: “Sa tahaw kan nagkakasararong mga kadaklan oomawon ko si Jehova.” (Sal. 26:12) Sinabi ni David na an nagkakasararong mga kadaklan mga parasamba ki Jehova. Igwa man daw kita kan kaparehong odok sa pusong kamawotan? Ikapaheheling niato na iyo paagi sa regular na pag-atender sa mga pagtiripon asin pagdagka sa iba na gumibo kaiyan.—Heb. 10:24, 25.
2 Posible na sa saindong kongregasyon may mga indibiduwal na nag-aatender sa mga pagtiripon pero bako pang mga parahayag kan maogmang bareta. An pinakabagong mga bilang nin nag-aatender sa mga pagtiripon sa nasyon na ini nagpapaheling na may kalabihan na labing 15,000 na nag-aatender sa pahayag-publiko kisa bilang nin asosyadong mga parahayag. Ano daw an magigibo niato na matabangan an mga ini na makuwalipikar na makikabtang sa ministeryo? An iba mga aki nin mga Saksi ni Jehova, pero an dakol bagong interesado. Makatatabang daw kita sa sainda? An iba tibaad mga tawo na dai pa nag-aadal. Mantang kinakaolay nindo sinda sa pagtiripon, tibaad manompongan nindo na an iba maoogma na kamo makipag-adal sa sainda sa Biblia.
3 An pagkamoot kan mga tugang sa mga bagohan naririsa. Arog kan sabi nin sarong barobata pakaatender sa enot niang pagtiripon: “Napangalas ako na sinda gabos nagkakamiridbidan asin na an tiriponan buhay sa makikatood na erestoryahan.” Huli kaini minawot nia na magpadagos sa pag-atender.
MGA PAAGING MAKATABANG
4 An pagkamoot niato sa iba ikapaheheling paagi sa pakikipag-olay sa sainda bago asin pagkatapos kan pagtiripon. An siring na dakulang interes ipinaheling ni Pablo sa Roma kapitulo 16, na dian sia nangumusta sa mga indibiduwal, na nagpaparisa na midbid nia sinda asin may pagmakolog sa sainda. (Roma 16:1-16) An saiyang mga komento nagpaparisa na sia nagtao nin panahon asin interes na mamidbid sinda. Nasabotan nia an saindang mga problema asin natabangan sinda sa espirituwal. An pagduman sa pagtiripon nin amay nagtatao nin marahay na oportunidad na mamidbid an iba asin mapakosog sinda. Taano ta dai probaran na perming umabot nin 15 sagkod 20 minutos bago magpoon an pagtiripon asin dai nguna maghale pagkatapos tanganing orog kamong makapakikabtang sa pagpakosog sa iba?
5 Mapakokosog niato an mga bagong umatender sa pagtiripon paagi sa pagtotokdo sa sainda kun paano mag-aandam para sa pagtiripon, magkomento, asin umayon sa Teokratikong Paadalan sa Pagmiministro kun kuwalipikado na sinda. An pirang praktikal na suhestion sa bagohan makatatao nin dakulang tabang sa pagpakosog saiya na gibohon ini.—Helingon an School Guidebook, leksion 4, 7, asin 18.
6 Bilang kabtang kan nagkakasararong mga kadaklan ni Jehova, kita nagtatalubo sa espirituwal, asin mas makosog na bogkos nin pagkasararo an ibinubunga. (Gal. 6:10) Kun siring, ipagpadagos niato an satong mamomoton na mga paghihingoa na tabangan an mga bagohan na omawon asin tawan nin onra si Jehova.