Pagtabang sa Iba na Mag-apresyar sa Espirituwal na mga Bagay
1 Nakaoogma nanggad na okasyon an Memorial! Taon-taon ipinagigirumdom sato an halaga kan atang ni Jesus para sa gabos na tawo. An espesyal na selebrasyon na ini nagtatao nin oportunidad na tabangan an mga bagohan na orog na maapresyar an espirituwal na mga bagay na itinao nin Dios paagi sa saiyang Aki. (Mar. 9:7) Paano niato matatabangan an mga nag-atender sa Memorial na regular na makiasosyar sa kongregasyon?
2 Daing duwa-duwa na an mayoriya sa mga nag-aatender sa Memorial minimidbid na sinda may espirituwal na pangangaipo na kaipuhan na mapanigoan. (Mat. 5:3) Ano an magigibo niato tanganing mapahiro sinda na asikasohon an pangangaipong ini?
3 An saro iyo na songkoon sinda sa pinakamadaling panahon. Magpaheling nin personal na interes asin mag-opresir na tabangan sindang umoswag sa espirituwal. An dakol na nag-aatender sa Memorial mayo nin personal na pag-adal sa Biblia. Tabangan sindang makasabot na tanganing lubos na makinabang sa atang ni Cristo asin kamtan an pag-oyon ni Jehova, kaipuhan an regular na pag-adal. Pagmaigotan na gumibo nin areglo para kaini sa oras na kombenyente sa sainda.
4 Kun kamo masongko sa semana pakalihis kan Memorial asin pagmaigotan nindo na makapag-areglo nin pag-adal sa Biblia, kadungan kaiyan puwede nindo sindang imbitaran sa espesyal na pahayag sa Abril 2, “Madia, Kamong mga Napapaha sa Katotoohan!” Mag-opresir na ibanan sinda sa Kingdom Hall.
MANGAGDA NA MAGHULIT
5 Kumusta man an mga nag-aadal asin regular na nag-aatender sa mga pagtiripon? Nagsuherir na daw kamo na probaran nindang maghulit sa mga katood, paryentes, katrabaho, asin iba pa sa impormal na paagi? Ini matabang sainda na umoswag sa espirituwal. Magpapaheling sinda nin pag-apresyar sa atang ni Jesus asin sa mga katotoohan na saindang nanonodan.
6 An inaadalan sa Biblia tibaad mag-alangan na makipag-olay sa iba, na iniisip na dai sinda maghihinanyog. Tabangan sindang makarealisar na an kada saro mahalaga sa Dios, na nakakabasa kan puso asin nakaaaram kun an saro andam nang umako kan maogmang bareta. Ipaliwanag saiya na kabotan nin Dios “na an gabos na klase nin tawo makaligtas asin makaabot sa tamang kaaraman kan katotoohan.” (1 Tim. 2:4; Gibo 17:26, 27) Kun an saindong inaadalan matatabangan na masabotan ini, maheheling nia kun taano ta maninigo siang magmaigot na ipakipag-olay sa gabos an katotoohan basta sia may oportunidad.—Gal. 6:6.
7 An mga kuwalipikado maninigong imbitaran na makikabtang sa ministeryo sa langtad sa Abril. (Mat. 9:37, 38; om p. 97-9) Inooyonan ni Jehova an mga boot na maglingkod sa saiya dawa kun limitado an saindang kakayahan. Paagi sa pag-otob sa pagboot na maghulit, kukuyogon niato an hatol ni Pablo: “Sa paggibo sa kaibanan nia, nakikimaherak man kami sa saindo na dai nindo akoon an dai na kutana maninigong pagkaherak nin Dios pakatapos basangbasangon sana iyan.”—2 Cor. 6:1.
8 Dai niato aram kun pira pa an mag-aapresyar sa pribilehiyo na maglingkod ki Jehova. Alagad nakasisierto kita na sa pagpapadagos na tabangan an iba na apresyaron an espirituwal na mga bagay kita mag-aako nin makangangalas na mga bendisyon, asin siring man sinda.—2 Cor. 6:2.