Hapot

● Taano ta marahay na magkaigwa nin personal na librariya?

An sarong pundamental na dahelan iyo na an personal na pag-adal mahalaga sa mga Saksi ni Jehova. (Juan 17:3) Kombenyente an magkaigwa nin librariya sa harong para sa pagsiyasat, pagsimbag sa mga hapot, asin pag-andam para sa mga pagtiripon. Dai niato maninigong pagmenuson an halaga nin madaling pakakua nin masasarigan na impormasyon sa Kasuratan.

An saro pang dahelan sa pagkaigwa nin librariya sa harong konektado sa bagay na an kada Kristiano dapat na “magpasan kan saiyang sadiring pasan” na paninimbagan. (Gal. 6:5) Kun minalataw an mga hapot, marahay na magkaigwa kan ugale na gibohon nguna an sadiri niatong pagsiyasat dangan maghapot sa iba kun kaipuhan. Mapatatalubo niato an satong kakayahan sa pagsabot paagi sa pagigin mahigos na mga estudyante kan Tataramon nin Dios asin paggamit sa sarong librariya sa harong.—Heb. 5:11-14.

An ibang aki tinabangan kan saindang mga magurang na gumibo kan sadiri nindang personal na librariya, na nasa isip an mga pangangaipo sa presente asin sa ngapit. Daing duwa-duwa, an marahay na personal na librariya mahalagang rogaring sa sarong Kristianong harong.