Bagong Areglo Para sa mga Libreriya kan Kingdom Hall
Dakol nang taon sagkod ngonyan, an mga kongregasyon sa bilog na kinaban nakinabang sa paggamit kan saindang libreriya kan Kingdom Hall, na dati inaapod na libreriya kan Teokratikong Paadalan sa Pagmiministro. Kan nakaagi, ipinamugtak na kaipuhan na an kada kongregasyon magkaigwa nin sadiring libreriya kaiyan. Minsan siring, huling dakol nang Kingdom Hall ngonyan an ginagamit nin labi sa sarong kongregasyon, na an nagkapira kaiyan kongregasyon na iba an lenguahe, garo baga pinakamarahay na magkaigwa nin saro sanang kompletong libreriya kan Kingdom Hall para sa kada grupo nin lenguahe sa kada Kingdom Hall. Sa mga Kingdom Hall na igwa nin labi sa sarong auditoryum, an kada auditoryum maninigong magkaigwa nin libreriya para sa kada grupo nin lenguahe na nagtitiripon dian.
Linalaoman na an areglong ini makakatabang na makaekonomiya sa espasyo asin gastos. Dugang pa, an pagsararo kan mga libreriya nin duwa o labi pang kongregasyon posibleng marhay na maresulta sa mas marahay na libreriya. Sa pagsararo kaini, an dobleng kopya nin mga libro puedeng isaray asin sa huri gamiton kun magtogdok nin bagong mga Kingdom Hall. Kun an Kingdom Hall igwa nin komputer na may Watchtower Library sa CD-ROM, manonompongan nin nagkapira na kapakipakinabang na marhay an kasangkapan na ini.
Sa kada libreriya kan Kingdom Hall, sarong tugang na lalaki, mas marahay kun saro sa mga paraataman kan Teokratikong Paadalan sa Pagmiministro, an maglilingkod bilang laybraryan. Maninigo na progresibo niang dugangan nin angay na mga publikasyon an koleksion, na maayos na linalagan nin tanda an likod kan tutob kan kada saro tangani na ipaheling na iyan para sa libreriya kan Kingdom Hall. Kisuerra sarong beses sa sarong taon, maninigo niang siyasaton an libreriya kun kompleto asin seguradohon na nasa marahay na kamugtakan an mga publikasyon. An mga publikasyon sa mga libreriyang ini dai maninigong iluwas sa Kingdom Hall.
Padagos na pinahahalagahan na marhay kan gabos na asosyado sa kongregasyon an libreriya kan Kingdom Hall. Ipaheling logod niato na personalmente niatong pinahahalagahan an probisyon na ini paagi sa pag-iingat kaiyan asin paagi sa paggamit kaiyan sa paghanap kan “mismong kaaraman nin Dios.”—Tal. 2:5.