Nagtatao daw Kamo nin Rason Para sa Saindong Paglaom?
1 Kasuarin pa sana sarong tugang an hinapot, “Nagtutubod daw kamo na yaon kamo sa solamenteng tunay na relihiyon?” Sia nagsimbag: “Siyempre iyo. Ta kun dai kutana, nag-entra na ako sa iba.” Dangan maboot niang ipinaliwanag kun ano an mga paniniwala kan mga Saksi ni Jehova patin an Makakasuratan na basihan kaiyan. Sinunod nia an sadol na “sumimbag sa lambang naghahagad saindo nin rason para sa saindong paglaom, alagad ginigibo iyan sa mahoyong boot asin hararom na paggalang.”—1 Ped. 3:15.
2 Aroaldaw, igwa nin mga oportunidad na magtao nin rason para sa satong paglaom. Sa trabaho, an mga katrabaho tibaad magngalas kun taano kamo ta dai nakikiiba sa saindang nakararaot na mga orolay. Sa eskuwelahan, an mga maestro asin mga estudyante tibaad maghapot kun taano ta dai kamo nagseselebrar kan mga piyesta opisyal. An mga kataraed tibaad maghapot kun taano ta kamo perming nagduduman sa mga pagtiripon. Kun nag-aandam kamo na sumimbag nin patienot, tibaad matabangan nindo an mga sinserong naghahapot tanganing maglingkod ki Jehova kaiba niato.
PAG-ABOT SA PUSO KAN MGA NAGDADANGOG
3 Sa pakikipag-olay sa mga tawo, kaipuhan kitang mag-establisar nin sarong puntong pinagkakaoyonan. Totoo iyan minsan sa paglilingkod sa langtad o sa pakikipag-olay nin impormal. An sarong ekselenteng halimbawa sa Biblia iyo an nakatala sa Gibo 17:22-31. Mangnohon kun paano si Pablo nag-establisar nin sarong puntong pinagkakaoyonan sa kapinonan asin pinagdanay iyan sa kabilogan kan saiyang pakikipag-olay.—Helinga an School Guidebook, pahina 156-8, parapo 15-24.
4 Sa Hulyo, an brochure na Government makatatabang sa satuya na mag-establisar nin sarong puntong pinagkakaoyonan. Kita napapaatubang sa mga problema na kapareho kan sa mga kagharong. Kaibahan kaini an paghadit sa kaligtasan kan satong mga aki asin sa saindang ngapit, an kakulangan nin tunay na katoninongan, an nag-oorog na krimen, asin an pag-abuso sa droga. Gamiton an mga puntong ini tanganing ipaheling na kaipuhan niato an pagbabago hale sa mga gobyerno nin tawo pasiring sa Kahadean nin Dios, huli ta maliwanag na dai kaya kan mga tawo na resolberan an seryosong mga problemang ini.
5 An bagong Topikong Mapag-oolayan inandam na angay sa satong alok sa Hulyo asin samong isinusuherir na gamiton nindo ini nin epektibo. Pagkatapos na ipaheling na kaipuhan niato an pagbabago nin gobyerno, an Daniel 2:44 puwedeng gamiton tanganing ipaheling kun ano an masalihid sa pamamahala nin tawo sa haraning ngapit. Ipaliwanag na ini magigin pambilog na daga, na an gabos na gobyerno apektado. Sa puntong ini, tibaad booton nindo na bukasan an brochure sa pahina 26 asin ipaheling an ilustrasyon kan gapo na linalaglag an politikal na imahen. Pagkatapos ipaheling kun paano an Kahadean nin Dios maresolber kan ralaban, gutom asin takot siring kan ihinula sa Miqueas 4:3, 4, na minabalyo sa pahina 27 asin 29 kan brochure tanganing iilustrar ini. Dangan ialok an brochure sa kontribusyon na ₱4.20.
SA MGA PAGDALAW LIWAT
6 Sa saindong pagbalik tanganing pataluboon an interes, pahiwason an puntong pinagkaoyonan na saindong naestablisar na kan dati sa kagharong. Magdangog sa saiyang mga opinyon. Makipagrasonan sa saiya. Bayaan sia na may pag-antisipar na an mga pagsongko sa ngapit magtatao nin dugang na impormasyon na magpapatalubo kan saiyang paglaom.
7 Kun may nabubukasan na paagi na kita makatao nin rason manongod sa satong paglaom, mawot niato na aprobetsaran ini. Minsan pa aki o gurang, kaipuhan na kita makatao nin malinaw, nakadadagkang rason manongod sa paglaom niato.