Tabangan an mga May Sadiosan na Puso na Makadulag sa Dakulang Babilonya
1 An makosog na patanid na nasusurat sa Kapahayagan 18:4 orog na nagin apretado huli sa satong panahon. Malinaw na sia ipinamidbid asin ibinuyagyag bilang an pankinaban na imperyo nin falsong relihiyon na ginagamit ni Satanas tanganing makipaglaban tumang sa banhi kan “babae” nin Dios.
2 An pagdadanay sa saiya ginigibo an saro na may kabtang sa saiyang mga kasalan. Minsan siring, labi pa sa pagbaya sana sa falsong relihiyon an kaipuhan. An mga minadulag sa Babilonya dapat na mag-adal sa Tataramon nin Dios, umiba sa pagbalangibog kan maogmang bareta, asin magin nagdusay saka nabautismohan na mga lingkod nin Dios.
3 An gabos daw na nag-atender sa Memorial nakakamate kan kasibotan na lumuwas sa Babilonya asin magin biyong nagdusay na mga lingkod ni Jehova? Kaipuhan na tabangan niato an siisay man na nag-uurong-sulong na manindogan para ki Jehova. (Sant. 1:8; 4:8) Gumibo nin espesyal na paghihingoa na ipasakamot sainda an epektibong mga luwas sa Mayo kan Watchtower. Tabangan sindang masabotan na mantang halipot na an natatadang panahon, may apretadong pangangaipo na sinda manindogan na ngonyan.—Mat. 12:30.
TABANGAN AN MGA BAGOHAN
4 An Mayo marahay na panahon na tabangan an mga bagohan na marealisar na an pakikikabtang sa ministeryo sa langtad marahayon na paagi na ipaheling na sinda may tamang pagpapahalaga sa tataramon asin mga panuga nin Dios. Iyo, iyan kaipuhan na paagi na ikapaheling kun gurano niato inaapresyar an ginibo para sa sato ni Jehova asin kan saiyang Aki, si Jesus!
5 Pinangengenotan daw nindo an mga pag-adal sa Biblia sa katuyohan na andamon an mga inaadalan para sa ministeryo sa langtad? Kaipuhan ninda nin progresibong tabang asin pagpakosog tanganing magkaigwa nin pag-apresyar sa Kristianong paninimbagan na ini. Ipaliwanag sa saindong mga inaadalan an halaga nin paglilingkod sa langtad, asin ipaheling kun paano iyan ginigibo. Manonompongan nindo na an brochure na Nag-ootob sa Kabotan nin Dios nakatatabang digdi.
PAKAABOT SA MGA KAHAGADAN
6 Kun an inaadalan sa Biblia may dakula nang pag-oswag asin nagpapaheling nin pagmawot na tumabang sa pag-otob sa Mateo 24:14, kapakipakinabang na repasohon an sinasabi sa pahina 98 asin 99 kan librong Our Ministry. Maninigo na sia makuwalipikar bilang saro na “ginagamit an tataramon kan katotoohan sa tamang paagi.” (2 Tim. 2:15) Dai sia pag-agdahon na umiba saindo sa paglilingkod sa langtad sa enot na pangyayari sagkod na dai pa inaautorisaran kan kamagurangan an pakikikabtang nia. Kun sa paghona nindo naaabot nia an Makakasuratan asin organisasyonal na mga kahagadan, ipaaram sa nangengenot na paraataman an saiyang pag-oswag. Kun kaolayon kan mga magurang an saro nindong inaadalan sa Biblia ngonyan na Mayo asin autorisaran ninda an pakikikabtang nia sa paglilingkod sa langtad, tokdoan sia kun paano mag-aalok kan suskripsion sa Watchtower, asin ponan siang tokdoan sa pagharongharong.—Helingon an Torrengbantayan kan Disyembre 1, 1988, pahina 14-15, parapo 7-10 (The Watchtower, Nobyembre 15, 1988, pahina 16-17).
7 An Dakulang Babilonya pasiring sa biyong pagkalaglag! Bago iyan mangyari, kaipuhan na tabangan niato an mga may sadiosan na puso na makadulag sa saiya asin makalaog sa organisasyon ni Jehova. Minilyon na an natabangan na gibohon ini. Kun kabotan ni Jehova, dakol pa an puwedeng matabangan na dumulag sa tahaw kan Babilonya mantang binibendisyonan an satong maigot na paghihingoa na manompongan asin atamanon an mga may sadiosan na puso sa satong teritoryo.—Jer. 50:8.