Mag-andam Na Ngonyan Para sa Orog na Aktibidad na Maabot
1 Sa tig-anihan, an mga kalabot mas sibot kisa dati. Asin sa panahon nin pag-apreta, an mga tawo orog na nagmamaigot kisa dati. Nabubuhay kita sa panahon nin tig-anihan asin pag-apreta. Kadakol kan gigibohon. Andam daw kamong gibohon an gabos na kaipuhan?—Mat. 9:37, 38; 13:39; Luc. 13:24; 1 Tim. 4:10.
AN MEMORIAL
2 An panahon nin Memorial iyo an pinakamahalagang panahon sa taon para sa banwaan ni Jehova. Ngonyan na taon an Memorial gigibohon sa Martes na banggi, Abril 10. Naggigibo daw kamo nin mga areglo tanganing mayo nin makaolang sa saindo asin sa saindong pamilya sa pag-atender? Nagtatao daw kamo nin imbitasyon sa mga paryentes asin katood? Kumusta an mga interesado sa saindong teritoryo, an saindong mga inaadalan sa Biblia, asin dating mga inaadalan sa Biblia?—Luc. 22:19; Kap. 22:17.
3 An kamagurangan parateng nag-aareglo nin lubos na paglinig sa Kingdom Hall bago an Memorial tanganing maandam an gabos. Nagibo na daw an mga areglo para sa espiker sa Memorial, mga emblema asin mga serbidor kaiyan, saka ekstrang tukawan asin bastanteng attendant para sa espesyal na okasyon na ini?
OROG NA PAKIKIKABTANG SA PAGLILINGKOD SA LANGTAD
4 Ipinagigirumdom sato kan Memorial an atang ni Jesus para sa sato. Kaya iyan angay nanggad na panahon na horophoropon kun paano dudugangan an satong aktibidad sa ministeryo sa langtad. Saro ining paagi nin pagpahayag kan satong pag-apresyar sa dai na kutana maninigong kabootan ni Jehova paagi sa saiyang Aki.
5 Makapaglilingkod daw kamo bilang auxiliary payunir sa Marso, Abril asin Mayo? Sa Marso magkakaigwa kita nin kampanya na ibalangibog an mapuwersang mensahe na yaon sa librong Revelation, asin segurado na an gabos magmamawot na maghingoa sa aktibidad na ini. Sa Abril iaalok niato an suskripsion sa Watchtower, asin magkakaigwa kita nin espesyal na mga artikulo, arog baga kan “Who Will Lead Mankind to Peace?” (Abril 1) asin “World Peace—What Will It Really Mean?” (Abril 15). Itatampok kan Awake! an “Is There Life in Outer Space?” (Abril 8) asin “What Prospects for Longer Life?” (Abril 22). Huli sa ekselenteng materyales na ini maninigo kitang mapakosog na gamiton an limang Sabado sa Marso sa pagwaras nin magasin asin iareglo an bilog na bulan sa ministeryo sa Abril!
6 Kaipuhan an dagdag na paghihingoa tanganing magkaigwa nin orog na pakikikabtang sa ministeryo sa langtad. Dawa kun dai kamo puwedeng magpayunir, maninigo na magbugtak nin personal na pasohan sa oras para sa Marso, Abril asin Mayo. Ikakaareglo daw nindo an orog na panahon sa ministeryo paagi sa pag-ina sa personal na mga gibo asin pag-aling-aling? Gibohon an paghihingoa. Hagadon ki Jehova na pakosogon asin bendisyonan kamo. An mga may pisikal na limitasyon tibaad marisa na sa tabang nin iba, sinda puwede man na magkaigwa nin orog na pakikikabtang sa kampanyang ini.
7 Para sa sato gabos, an Marso asin Abril maninigong magin sibot-sibot na panahon sa paglilingkod ki Jehova. An kamagurangan maghihingoa na organisaron nin igo an gabos. An kaipuhan na mga publikasyon maninigong pedidohon bago pa. Seguradohon na igwa nin ekstrang mga magasin na magagamit, nangorogna an mga luwas na Abril asin Mayo. Sa Abril, marahay na siyasaton sa Abril 8 kun siisay an dai pa nakakaluwas sa paglilingkod, tanganing an maygurang na mga parahayag makatao nin tabang sa sainda asin mapangyari na an pinakadakol na mahihimo makapakikabtang sa aktibidad sa Abril. Iareglo an teritoryo asin pagtiripon bago maglingkod, pati an paghuhulit sa banggi. Mantang odok kitang namimibi sa bendisyon ni Jehova, gamiton niato nin madonong an panahon sa ikaoomaw sa saiya.