Tabangan an mga Hobenes na Makinabang sa Kombension
1 An imbitasyon para sa “Diosnon na Debosyon” na Pandistritong Kombension ipinaaabot sa lambang parasamba ki Jehova, kairiba na an mga hobenes. Iyo, minsan an “saradit” linalaoman na mag-atender.—Deut. 31:12.
2 Maninigong tokdoan kan mga magurang an saindang mga aki na an kombension para sa sainda man asin na an paghihinanyog sa programa kabtang kan saindang pagsamba. Bako perming pasil para sa mga hobenes na magtukaw na toninong asin maghinanyog durante kan mga sesyon. Siring man, an nagkapirang pahayag tibaad masakit nindang masabotan. Kaya mahalaga an danay na atension asin paghingoa sa kabtang kan mga magurang.
3 Nakakapakosog na maobserbaran an interes na ipinaheling kan mga hobenes sa pag-atender sa kombension. Minsan siring na an entusiasmo tibaad maggikan sa oportunidad na magbiyahe, sa kaogmahan sa kadaklan, asin iba pa, minsan an saradit na gayong kaakian puwedeng tabangan na apresyaron an kombension asin makinabang sa espirituwal na paagi.
KUN PAANO PUWEDENG MAKATABANG AN MGA MAGURANG
4 Bago mag-atender nin kombension, taano ta dai magtukaw kairiba kan saindong mga aki asin repasohon an impormasyon sa librong Insight sa temang “Godly Devotion”? Makatatabang ini sa gabos sa laog kan pamilya na makinabang sa programa kan kombension.
5 Kadakol na magurang an sinangkapan an saindang mga aki nin sadiri nindang Biblia, librong kantahan asin iba pang literatura. Pakosogon an mga aki na kumua nin mga nota, asin dangan repasohon an mga ini sa bilog na pamilya sa banggi. Pinakamarahay na dai magdara nin mga kawatan o mga librong kinokoloran sa kombension.
MAGTAONG ATENSION SA DISIPLINA ASIN HITSURA
6 Tinogotan nin nagkapirang magurang an saindang mga aki na istorbohon an iba durante kan programa. Minsan durante kan mga pamibi, nagkakawat an nagkapirang aki asin nakaiistorbo sa iba. Hapoton an saindong sadiri: ‘Ano an ginigibo kan sakong mga aki durante kan mga pamibi? Maninigo daw na togotan sindang maghale sa saindang mga tukawan durante kan programa?’ Minsan siring na igwa nin mga asignasyon sa kombension an mga magurang, maninigo sindang maghingoa na magtukaw kairiba kan saindang mga aki durante kan mga sesyon tanganing pangatamanan sinda. Kaipuhan man kan mga aki an pangangataman kan saindang mga magurang durante kan mga panahon nin pag-aling-aling kun mayo sa lugar nin asamblea.
7 Paano naggugubing an satong mga hobenes para sa mga kombension? Kun nagsusulot sinda nin bakong pormal na mga gubing asin mga sapatos na pangkawat, makatatabang daw ini sainda na masabotan an pagigin seryoso kan okasyon? Sa ibong na lado, an mga aki na naggugubing nin angay para sa Kristianong mga pagtiripon nagpapaheling nin dignidad kan okasyon.
8 An seryosong kamugtakan kan isip puwede man na mapakosog paagi sa pag-areglo na an mga aki magkaigwa nin gibohon pakatapos kan mga sesyon. An mga aki na dai pang 16 na taon an edad puwedeng magtrabaho kairiba nin magurang sa paggiya kan Volunteer Service Department.
9 Tibaad paagi sa paghorophorop kan mga suhestion na ini, an mga magurang siring man an iba puwedeng magin alisto na tabangan an mga hobenes na makakua nin orog na dakulang pakinabang sa kombension.