Imbitado Kamo sa 1989 “Diosnon na Debosyon” na Pandistritong Kombension!
1 An mga tataramon na “diosnon na debosyon” nangangahulogan na pagtataong onra, pagsamba, asin paglilingkod sa Dios, na may kaimbodan sa saiyang unibersal na soberaniya. An pangenot na halimbawa sa diosnon na debosyon iyo si Jesu-Cristo. Sia an sarong lalaki na nagpaheling nin diosnon na debosyon sa sangkap na paagi sa ibong nin makuring mga kamugtakan sagkod sa saiyang kagadanan. (1 Tim. 3:16; Heb. 7:26) Bilang mga parasunod ni Cristo, kaipuhan kitang maigot na magpatood tanganing makapagpaheling nin diosnon na debosyon. Nangangaipo ini nin pakatagal sa mga pagtumang siring kan ginibo ni Jesus. (2 Tim. 3:12) An pagpatood na diosnon na debosyon an satuyang pag-aaboton “may panuga sa buhay ngonyan,” siring baga kan espirituwal na salud, satispaksion, kaogmahan, asin katuyohan sa pamumuhay. Nagtatao man ini sa sato nin panuga sa buhay na “madatong.” (1 Tim. 4:7, 8) Kun siring, an siring na pagpatood bakong para sa satong materyalistikong pakinabang. Imbes, bilang resulta kaini, kontento na kita sa pangenot na mga probisyon mantang naglilingkod kita ki Jehova.—1 Tim. 6:6-8.
2 Paagi sa progresibong pagpatood asin disiplina, ginibo kita ni Jehova na sarong pambihirang banwaan, nagkakasararo sa sarong nangongorog na organisasyon mantang anion kita sa bakong diosnon na kapag-arakian na ini. An satong diosnon na debosyon tunay asin mayo nin pagsaginsagin na ilinadawan ni Pablo kan sabihon nia na sa mga huring aldaw, an mga tawo magkakaigwa nin porma nin diosnon na debosyon alagad nagpapainda sa kapangyarihan kaini. (2 Tim. 3:1, 5) Logod an satong nakikipagtabangan na espiritu sa gabos na panahon magpaheling nin diosnon na debosyon, asin logod kita perming magpatotoo na tunay sa kapangyarihan kaini.—1 Cor. 14:40.
3 Mawot daw nindong makanood nin mga paagi na magpapakosog kan saindong diosnon na debosyon tanganing magdanay na maimbod ki Jehova sa masakit na mga panahon sa enotan? An dakol na gayong makatatabang na sadol asin panpakosog manongod sa bagay na ini iaatubang sa “Diosnon na Debosyon” na Pandistritong mga Kombension na isinaplano sa paghinanapos kan taon na ini. Magkakaigwa nin total na 34 kombension para sa Pilipinas, an pinakadakulang bilang na. Magplano na ngonyan na mag-atender asin makikabtang sa marahay na espirituwal na kaginhawahan na iaatubang.
4 MAG-ABOT NIN AMAY: An mga Saksi ni Jehova midbid na gayo huli sa saindang pagigin mapananarigan asin pagigin nasa oras. (Luc. 16:10) Mahalaga ini kun nag-aatender nin kombension. Maninigo kitang mag-abot nin amay lambang aldaw asin nakatukaw na bago an pagpopoon kan programa. Naghahagad ini na magkaigwa nin igong panahon tanganing iareglo an pagparada kan satong lunadan, pagkua nin angay na mga tukawan para sa satong pamilya, asin sa pagkukua nin mga tiket para sa pagkakan sa kombension.
5 An panahon nin kombension nagtatao nin marahay na oportunidad tanganing magkaigwa nin marahayrahay na pakikiiba. Alagad an pagsongko sa mga katood na matanga na an banggi puwedeng makaolang sa satong mga paghingoa na mag-abot na nasa oras sa masunod na aldaw. Dakol na gayong kahaditan an magigin resulta huli sa pagpoon nin huri asin sa siring kaipuhan na maghidale kun aga. Tanganing malikayan ini, nanompongan nin nagkapirang pamilya na kapakipakinabang na magbugtak nin rasonableng panahon para sa pagtorog. Paagi sa istriktong pagsunod sa iskedyul, mas posibleng magkaigwa sinda nin marahay na pagtorog kun banggi asin andam para sa amay na pagpoon sa masunod na aldaw. Nalilikayan kaini an pag-abot mantang nagpapadagos na an programa, na nakaiistorbo asin puwedeng magin nakauuyam sa mga nakatukaw na. An satong pagigin makonsiderasyon sa bagay na ini puwedeng magin pagpaheling kan satong pagtaong onra asin paggalang ki Jehova, asin nagtatao nin patotoo nin tunay na diosnon na debosyon.
6 TOLONG ALDAW NA KOMBENSION: An “Diosnon na Debosyon” na Pandistritong Kombension malawig nin tolong aldaw. An maingat na gayo na piniling impormasyon na mahalaga sa satong espirituwal na salud iaatubang sa lambang sesyon. An manlaenlaen na tema may koneksion sa diosnon na debosyon hahamanon sa mga pahayag, demonstrasyon, asin sa modernong aldaw na drama.
7 Magdesisyon na dai palampason minsan saro sanang sesyon. Tibaad maghagad ini nin personal na mga sakripisyo asin pagbago sa saindong iskedyul. Nanompongan nin nagkapira na kaipuhan na gumibo nin espesyal na mga areglo sa saindang amo. Kadakol an pinabayaan minsan an pinansial na mga pakinabang tanganing atenderan an gabos na sesyon. Sierto nanggad na bebendisyonan ni Jehova idtong ginigibo an bagay na ini na tema nin sinserong pamibi asin minabugtak nin odok sa pusong pagmamaigot tanganing makaatender.—Luc. 13:24.
8 MAGDANGOG NA ATENTO: Durante kan programa kan kombension, dai madistorbo kan mga bagay na nangyayari sa palibot nindo, kundi magkonsentrar nin “atento” sa materyal na ipinakikipag-olay hale sa plataporma. An satong diosnon na debosyon maninigong magpahiro sa sato na kuyugon an kahagadan ni Jehova sa Isaias 55:2: “Maghinanyog kamo nin odok sa sako.”
9 Mantang totoo na an pahayag publiko sa Domingo nin hapon ipinag-iimbitar sa bilog na publiko, an kadaklan na materyal na inaatubang sa kombension inandam espesyalmente para sa mga debotado na ki Jehova. An kombension magdadara sa sato na nasa panahon sa presenteng mga pangangaipo asin matabang sa sato na makasabay sa nag-ooswag na organisasyon ni Jehova. An dai pagtatao nin atension maresulta na kita mabayaan. Magdanay na nakasentro an satong isip sa programa tanganing makua an lubos na pakinabang hale sa mayaman na espirituwal na pagkakan.—1 Ped. 2:2.
10 Sa nakaaging mga taon, kadakol na delegado sa kombension an nagkaigwa nin kapakipakinabang na ugale nin pagkukua nin mga nota durante kan programa. Tibaad minansay nin nagkapira an pagkukua nin mga nota na may pagduwaduwa, sa paghonang mayo nin tunay na pakinabang ini. Kun siring kaiyan an saindong tendensia, taano ta dai probaran an pagkukua nin mga nota durante kan “Diosnon na Debosyon” na Kombension? Siring sa totoo sa kadakol na iba pa, tibaad manompongan nindo na marahay na paagi ini tanganing pagdanayon na nakapako an saindong atension sa kun ano an sinasabi asin ini nagpoprotehir saindo sa pangangatorogan na mata o togotan na maglagawlagaw an saindong isip.
11 An mga nota dai nangangaipo na mahiwas an sakop. Parate na an sarong prase o duwa igo na para sa sarong pangenot na punto. Nanompongan nin kamagurangan na kapakipakinabang na magkaigwa nin malinig an pakaareglar na mga nota para sa pagkondukta nin makahulogan na repaso kan programa kan kombension sa Pagtiripon sa Paglilingkod. Puwede man nindang iiba an kadakol na punto sa saindang pagtotokdo asin gibohon na pagpapastor pakatapos kan kombension.
12 Kita gabos maninigong magtao nin atension kun paano kita naghihinanyog, huli ta nangangahulogan ini kan satong kaogmahan asin kan sato mismong buhay. Mantang nag-aatender sa “Diosnon na Debosyon” na Pandistritong Kombension, maninigong isipon niato an sadol ni Jehova sa Talinhaga 8:33-35: “Maghinanyog kamo sa disiplina asin magin madonong, asin dai kamo magpabaya. Maogma an tawo na naghihinanyog sa sako paagi sa pagpupuka sa sakong mga tata aroaldaw, paagi sa pagbabantay sa mga poste kan sakong mga trangkahan. Huli ta an nakakakua sa sako tunay na makakakua nin buhay, asin magkakamit nin marahay na boot hale ki Jehova.”
13 PAMIBI ASIN PAGKANTA: An saro sa pinakamagayon na adorno kan satong diosnon na debosyon iyo an pagkakanta nin mga pag-omaw ki Jehova Dios. An pagkakanta nin mga kanta maheheling na nagin regular na kabtang kan tunay na Kristianismo kan enot na siglo. (1 Cor. 14:15) Naoogma man si Jehova kun an saiyang banwaan minadolok sa saiya sa odok sa pusong pamibi. An pandistritong mga kombension nagtatao sa sato nin pambihirang oportunidad na magin kasaro kan rinibo kan satong mga tugang sa pag-oomaw ki Jehova kapuwa sa pagkanta asin pamibi. Minsan siring, an nagkapira nagpaheling nin kakulangan nin paggalang para sa mahalagang mga kabtang na ini kan satong pagsamba. Paano? Paagi sa dai kinakaipuhan na pag-abot sa kombension durante o pakatapos kan pambukas na pagkanta asin pamibi. Sa katapusan kan programa, an nagkapira naghahale na sa saindang mga tukawan durante kan pagkanta asin bago kan pamibi. Taano? Sa bihirang okasyon may marahay na mga rason para kaini. Minsan siring, tibaad ginigibo iyan kan nagkapira tanganing amay nindang mapaandar an saindang mga lunadan. An iba amay na binayaan an saindang mga tukawan tanganing maenot sa linya para sa mga luwas na literatura o para sa pagkakan. Maninigong magkaigwa nin pag-iingat na sa pagmawot nin personal na kaginhawahan, dai niato tinotogotan an ako ngunang kaisipan o bakong diosnon na mga ugale siring kan kapasloan asin kaimotan na makaolang sa satong espirituwal na pag-oswag. Bilang banwaan na may diosnon na debosyon, magmaigot kita na magpaheling nin paggalang sa siring na haralangkaw na kabtang kan satong pagsamba, na iyan iyo, an satong pamimibi asin pagkakanta ki Jehova.
14 AN SATONG KRISTIANONG MGA UGALE: Sa nakaaging mga taon, an satong Kristianong mga ugale asin hitsura nagtao sa sato nin marahay na reputasyon bilang mga Saksi ni Jehova. Ini huli ta tama sanang minamansay niato an satong mga kombension bilang espirituwal na mga kapiyestahan, bakong sosyal na pag-aling-aling. Kaoyon kaini, pinagmamaigotan niato na ipaheling an espirituwal na kamugtakan nin isip asin minagawe kita bilang mga ministro.
15 Mangnohon ining marahay na eksperyensia na nakua nin sarong pamilyang Saksi mantang nagkakakan sa sarong restawran sa sarong siudad nin kombension kan nakaaging taon. An tugang na lalaki nagsurat: “Sarong lalaki asin an saiyang agom nasa sarong lamesa kasunod kan sa samuya. Kan natapos na sindang magkakan, nagdolok an lalaki asin nagsabi na mawot niang komendaran kami huli sa samong aregladong gayo asin malinig na hitsura. Sinabihan kan sakong agom an lalaki na nag-aatender kami sa Kombension kan Watchtower sa puro kan semanang ini. Sinabi niang sierto nia na siring man nanggad kami. Naheling nia an kadakol kan satong mga tugang na lalaki asin babae sa palibot kan motel mantang sia asin an saiyang agom nag-oontok duman, asin an gabos nagpapaheling nin arogan na paggawe asin paggubing. Sinabi niang sa iglesyang saiyang inaatenderan, an mga hobenes dai naggugubing o naggagawe na siring kan satong mga hobenes. Sakong inaapresyar kun gurano kahalaga na padakulaon an satong kaakian poon sa amay na edad tanganing magin marahay na Kristianong halimbawa sa gabos na panahon. An kaomawan maninigong itao sa marigon na sadol asin paggiya hale sa organisasyon ni Jehova na magpaheling nin marahay na halimbawa.”
16 Nakamomondo, an nagkapirang nag-aatender sa mga kombension nagin bakong maninigong impormal sa saindang kaisipan, paggubing, pagtaram, asin paggawe. Kun naheheling an siring magsalang sa lokal na kongregasyon o durante kan kombension, idtong mga igwa nin espirituwal na mga kuwalipikasyon maninigong magtao nin mamomoton na sadol sa pagmansay na ibangon liwat. (Gal. 6:1; Efe. 4:11, 12) An satong diosnon na debosyon maninigong magpahiro sa sato na magin maigot na pangaptan an satong marahay na reputasyon asin sa pagpapadanay kan halangkaw na mga pamantayan nin paggawe sa gabos na panahon.
17 Sa kombension, isipon niato na an satong motibo iyo an diosnon na debosyon. Kaya, an satong isip maninigong lubos na mayo sa materyalistikong mga paghihingoa durante kan tolong aldaw. Pagdanayon niato an satong isip sa espirituwal na mga bagay, bakong sa negosyo o mga planong pagkakakuwartahan. Liwat boot niamong ipagirumdom sa gabos na mayong ipapabakal na personal na mga bagay an totogotan sa laog kan lugar nin kombension, asin mga bagay kan Sosyedad sana an totogotan sa bookroom o ibang departamento kan kombension.
18 Sa parehong rason, an mga departamento kan refreshment sisirradohan durante kan bilog na sesyon kan kombension, kaya maninigo na kuanon na an kaipuhan nindo sa pag-oltanan nin mga sesyon. Sa paaging ini, an gabos makakakonsentrar sa espirituwal na mga probisyon hale sa plataporma, kairiba na idtong mga naglilingkod sa mga departamento kan refreshment.
19 Sa nagkapirang kombension, pakahale kan mga nag-atender, kadakol na ati an nawalat sa mga tukawan. Kadakol na pidasong papel, patos nin dulse, botelya asin iba pang lalagan, an nawalat sa mga tukawan. Nagpapaheling daw ini nin diosnon na debosyon? Nagpapaheling daw ini nin konsiderasyon sa mga asignadong maglinig paghale niato? Mantang dai niato babayaan an mga ati na nakawarak sa satong mga Kingdom Hall, maninigong siertohon niatong puruton an ano man na bagay na maheling niatong nakawarak sa palibot asin iapon ini sa tamang mga lalagan, o minsan ngani ipuli niato ini asin iapon duman kun kaipuhan.
20 PARA SA MGA MAGURANG: An hoben na mga aki asin mga hobenes espesyalmenteng imbitadong mag-atender sa “Diosnon na Debosyon” na Pandistritong Kombension. Dakol na gayong impormasyon an iaatubang na partikularmenteng magpapakosog sa sainda. Marahayon nanggad na maheling an diosnon na debosyon kan mga hobenes na nakanood na magtao nin bilog na atension sa gabos na Kristianong pagtiripon asin interesadong gayo sa programa kan kombension! (Sal. 148:12, 13) Alagad depende nanggad ini sa halimbawa asin pangangataman kan mga magurang. Kadakol na hobenes an pinatood na marhay na magkua nin mga nota. Kun bilang sarong magurang dai pa nindo natotokdoan an saindong mga aki kun paano kumua nin nota, taano ta dai gamiton an natatadang panahon bago an saindong kombension tanganing gibohon iyan? Minsan an hoben pang gayo puwedeng pakosogon na isurat an mga sitadong teksto asin konektadong pangenot na mga tataramon na nadangog nindang ipinahayag kan mga nagpahayag. An nagkapirang magurang nag-areglong repasohon an pangenot na mga punto hale sa programa kan aldaw pakatapos na pumuli sa saindang mga dadagusan o mantang nagbibiyahe papuli.
21 Siyempre pa, an natural na kaisipan kan mga aki iyo an magin makinawat. Kulang sinda nin eksperyensia sa buhay asin bako pa sindang maygurang. Kun siring, kaipuhan sindang tokdoan kun noarin magtao nin atension asin kun paano sinda magawe sa mga pagtiripon. Naghahagad ini nin marahay na pangangataman kan saindang mga magurang. An nagkapirang magurang pabaya sa bagay na ini. May mga panahon, na minsan siring an mga magurang tibaad nagpapaheling nin tamang pagtaong onra ki Jehova durante kan pamibi, an saindang mga aki nagkakawat asin nakaiistorbo sa iba. An mga magurang maninigong aram kun ano an ginigibo kan saindang mga aki durante kan mga pamibi. Ano an ginigibo ninda kun minahale sinda sa saindang mga tukawan durante kan programa? An mga aki daw binabayaan na dai napangangatamanan durante o pakatapos kan programa kan kombension?
22 Tunay nanggad, an diosnon na debosyon maninigong magpahiro sa mga magurang na magtao nin dayupot na pangangataman sa saindang mga aki sa gabos na panahon mantang pinadadakula sinda “sa disiplina asin pagtatanos nin isip ni Jehova.”—Efe. 6:4.
23 INAAPRESYAR AN SAINDONG LUBOS NA KOOPERASYON: Dakulang pagpaplano asin gibohon an nagibo na tanganing siertohon na may makukuang igong tukawan, literatura, pagkakan asin iba pang probisyon para sa gabos na nag-aatender nin kombension. Tanganing siertohon an pagigin epektibo kan mga areglong ini, an lambang kongregasyon espisipikong inasignar sa sarong partikular na kombension. Mahalaga an saindong lubos na kooperasyon tanganing likayan an pagsusurusuan. Siyempre pa, tibaad may mga kamugtakan na kaipuhan para sa dikit na mag-atender nin kombension sa ibang lugar. Minsan siring, an kadaklan maninigong mag-atender nin kombension sa saindang asignadong lugar.—1 Cor. 13:5; Fil. 2:4.
24 Hinahagad an saindong lubos na kooperasyon sa pagreserba nin mga tukawan. Tabi girumdomon na AN MGA TUKAWAN PUWEDENG IRESERBA SANA PARA SA SAINDONG PAMILYA ASIN SA SIISAY MAN NA TIBAAD KAIBA NINDO SA PAGBIYAHE SA SAINDONG LUNADAN. Tabi dai magreserba nin mga tukawan para sa iba. Kun minsan, an mga ekstrang tukawan ireneserba na mayo nin partikular na matukaw. Ini bakong mamomoton asin nakariribaraw sa mga attendant asin sa iba na naghahanap nin makukuang mga tukawan. Kaoyon kan sadol sa Biblia, maninigo niatong dugangan an satong diosnon na debosyon nin pagkamoot sa mga tugang asin makikooperar nin lubos sa inoyonan na areglo para sa pagreserba nin mga tukawan.—2 Ped. 1:5-8.
25 Isinuherir na an marahay na paghatol maninigong gamiton sa pagdadara nin personal na mga bagay sa lugar kan kombension. An nagkapira nagdara nin darakulang cooler o iba pang darakulang bagay na dai puwedeng ibugtak sa irarom kan saindang mga tukawan. Ibinubugtak an mga ini sa agihan o mga tukawan. Nagresulta ini sa pag-agaw nin tukawan kan iba. Kaipuhan kitang magpaheling nin konsiderasyon sa siring na mga bagay.
26 An paggamit nin mga video camera asin audio recording equipment itinotogot sa lugar nin kombension. Alagad, an mga naggagamit kan siring na kasangkapan maninigong mag-ingat na likayan na makaistorbo o makaolang sa iba. An siring na kasangkapan dai maninigong ibugtak sa mga agihan o pinto. Dai maninigong ikonektar an siring na mga kasangkapan sa public address system o mga saksakan nin koryente. Dai totogotan an mga floodlight. An mga nakaiistorbo o dai nag-iintindi sa arin man na susunudon sa itaas maninigong dai nin pagduwaduwang ikorehir an bagay kun inapod ini sa saindang atension. An mga attendant asin iba pang nangangataman magigin alisto na ikorehir an ano man na pagbalga sa mga susunudon na ini, asin maninigo sindang mag-ako nin lubos na kooperasyon kan mga naggagamit nin siring na mga kasangkapan.
27 AN SATONG DIOSNON NA DEBOSYON mag-aatubang sa makuring mga pagbalo sa haraning ngapit. “Sa katotoohan, an gabos na nagmamawot na mamuhay sa kabanalan kaibahan ni Cristo Jesus paglalamagon man.” (2 Tim 3:12) Makapagpapasalamat nanggad kita ki Jehova huli sa espirituwal na mga probisyon siring kan “Diosnon na Debosyon” na Pandistritong mga Kombension, kun saen patotoodon nia kita asin “totokdoan kita na isikwal an kabikoan asin kinabanon na mga horot asin mamuhay na may marahay na isip asin katanosan asin diosnon na debosyon sa ibong kaining presenteng sistema nin mga bagay.”—Tito 2:12.
[Kahon sa pahina 6]
Mga Pagirumdom sa Pandistritong Kombension
DADAGUSAN: Mapadara kami nin suplay kan mga pormang Room Request sa kada kongregasyon. An mga nangangaipo nin dadagusan maninigong llenaran an saro sa mga pormang ini asin itao iyan sa nagkokoordinar kan kombension sa saindong kongregasyon. Ririsahon nia asin pipirmahan iyan, dangan ipadadara iyan sa Watch Tower Convention sa saro sa mga direksion na nasa ibaba.
Disyembre 22-24, 1989
Ilagan, Isabela: c/o Isidro Balmaceda, Baculod, Ilagan, 3300 Isabela.
Vigan, Ilocos Sur: c/o Gerardo Alegre, 110 Bonifacio Street, Vigan, 2700 Ilocos Sur.
Binalonan, Pangasinan: c/o Santiago Partido, Assembly Hall of Jehovah’s Witnesses, Binalonan, 2436 Pangasinan.
Mangaldan, Pangasinan: c/o Benjamin Caberto, Sr., 97 Salay, Mangaldan, 2432 Pangasinan.
Quezon City (1): P. O. Box 2044, 1099 Manila.
Mabalacat, Pampanga: c/o Generoso D. Canlas, 142 MacArthur Highway, Dau, Mabalacat, 2010 Pampanga.
Lucena City: c/o Emilio Pascua, Employees Subdivision, Gate 1, 4301 Lucena City.
Iriga City: c/o Leonardo de Villa, 38 Waling-waling Street, San Miguel, 4431 Iriga City.
Iloilo City: 65 Escarilla Subdivision, Mandurriao, 5000 Iloilo City.
Cebu City: c/o Parcon’s Machine Shop, Bagumbayan Street, 6000 Cebu City.
Tacloban City: 185 M. H. del Pilar Street, 6500 Tacloban City.
Dumaguete City: c/o Alexander Echon, 110-A Springville, Tubod, 6200 Dumaguete City.
Butuan City: Kingdom Hall, Capitol Avenue, 8600 Butuan City.
Tagum, Davao del Norte: Kingdom Hall, 1036 Rizal Street, Tagum, 8100 Davao del Norte.
Tandag, Surigao del Sur: Kingdom Hall, Dawis, Tandag, 8300 Surigao del Sur.
Oroquieta City: c/o Eustaquio Lumasag, Capitol Site, 7207 Oroquieta City.
Tantangan, South Cotabato: c/o Liberato Supnet, New Cuyapo, Tantangan, 9510 South Cotabato.
Disyembre 29-31, 1989
Tuguegarao, Cagayan: c/o Nolia’s Beauty Parlor, 77 Gonzaga Street, Tuguegarao, 3500 Cagayan.
Bayombong, Nueva Vizcaya: c/o Trinidad V. Bunuan, Market Site, Diversion Road, Bayombong, 3700 Nueva Vizcaya.
Agoo, La Union: c/o Noel Rivera, Bubblebee Burgerland, Agoo, 2504 La Union.
Alaminos, Pangasinan: c/o Bonifacio Rancudo, 20 Don Carlos Garcia Street, Alaminos, 2404 Pangasinan.
Tarlac, Tarlac: c/o Gregorio Ibarra, Aguso, Tarlac, 2300 Tarlac.
Quezon City (2): P. O. Box 2044, 1099 Manila.
Marikina, Metro Manila: Kingdom Hall, 273 Molave Street, Concepcion, 1800 Marikina, Metro Manila.
Balanga, Bataan: c/o Cecilio Fabunan, Lot 3, Cupang, Balanga, 2100 Bataan.
Puerto Princesa City: Kingdom Hall, Malvar Street, 5300 Puerto Princesa City.
Bacolod City: c/o Serafin Sabordo, 68 Mabini Street, 6100 Bacolod City.
Tagbilaran City: c/o Felix Acma, 44 R. Palma Street, 6300 Tagbilaran City.
Maasin, Southern Leyte: c/o Conrado Balaga, Rosario Village, Asuncion, Maasin, 6600 Southern Leyte.
General Santos City: Kingdom Hall, 8 Siniguelas Street, 9500 General Santos City.
Davao City: Kingdom Hall, Corner Lopez Jaena and F. Torres Streets, 8000 Davao City.
Cagayan de Oro City: c/o Nicolas Reymundo, Jr., 52 Vamenta Blvd., Carmen, 9000 Cagayan de Oro City.
Zamboanga City: Kingdom Hall, 541 San Jose Road, Baliwasan, 7000 Zamboanga City.
Enero 5-7, 1990
Masbate, Masbate:a c/o Yolando Alburo, 56-K Tara Street, Masbate, 5400 Masbate.
BAUTISMO: An mga kandidato sa bautismo maninigong maghingoa na yaon na sa saindang tukawan sa itinagamang lugar bago pumoon an programa sa Sabadong aga. Maninigong magdara nin mabining pankarigos asin tuwalya an kada saro na nagpaplanong magpabautismo. Pakatapos kan pahayag sa bautismo asin pamibi kan espiker, an tsirman kan sesyon matao nin halipot na instruksion sa mga kandidato sa bautismo dangan mapakanta. Pagpoon sa ultimong berso, gigiyahan kan mga attendant an mga kandidato sa bautismo sa lugar nin pagbautismo o sa mga lunadan na magdadara sa sainda duman, mantang an iba sa mga presente tatapuson an kanta. Mantang an bautismo na simbolo kan pagdusay nin saro dayupot asin personal na bagay sa pag-oltanan kan indibiduwal asin ni Jehova, mayo nin probisyon para sa inaapod na magkaparehang mga bautismo kun saen an duwa o orog pang kandidato sa bautismo magkukurugusan o magkakaraputan nin kamot mantang binabautismohan.
ESPESYAL NA MGA MITING: May gigibohon na pakipagmiting sa gabos na regular asin espesyal payunir saka mga nagbibiyaheng paraataman sa alas 11:15 n.a. sa Biyernes, mantang an pakipagmiting sa gabos na kamagurangan gigibohon sa alas 11:15 n.a. sa Sabado. An mga lugar kan mga miting na ini ipaiisi sa plataporma.
PIONEER IDENTIFICATION: An gabos na regular asin espesyal payunir, saka nagbibiyaheng mga paraataman, kaipuhan na darahon sa kombension an saindang Identification and Assignment card (S-202). An mga nasa lista poon kan Hulyo 1, 1989 o bago kan petsang iyan puwedeng umako nin halagang ₱50.00 na tiket sa kombension basta ipresentar an saindang ID card sa sarong kombension na iyan sana. Ingatan an card na garo kuwarta. Dai iyan masasalidahan sa kombension. An ano man na regalong publikasyon o iba pang literatura sa halaga sa payunir makukua nin mga payunir sa bookroom basta ipaheling an saindang ID card.
PAGBOBOLUNTARYO: An tabang nin mga boluntaryo kaipuhan para sa pulidong pag-andar kan pandistritong kombension. Minsan kun puwede kamong magtrabaho para sa kabtang sana kan kombension, an saindong paglilingkod pasasalamatan. Kun puwede kamong makatabang, tabi magreport sa Volunteer Service Department sa pag-abot nindo sa kombension. An kaakian na dai pang 16 anyos an edad puwede man na makakontribuwer sa kapangganahan kan kombension, alagad hinahagad na sinda magtrabaho kairiba nin magurang o iba pang responsableng adulto.
LAPEL CARDS: Tabi isulot an espesyalmenteng denisenyo na lapel card sa kombension asin mantang nagbibiyahe paduman asin hale sa lugar kan kombension. Parateng ginigibo kaining posible sa sato na magtao nin marahay na patotoo mantang nagbibiyahe. An lapel cards maninigong kuanon paagi sa kongregasyon, mantang an mga ini dai makukua sa mga kombension. An lapel cards 15¢ an saro asin an celluloid holders ₱1.00 an saro. (Pasabot sa sekretaryo: An lapel card maninigong pedidohon sa Special Order Blank for Forms. Kun ini dai nagibo, magpadara na ngonyan kan regular na S-14 na pedido para kaini.)
PATANID: Saen man kamo umatender, bantayan an saindong mga dara-dara sa gabos na oras. Kun kamo may kotse, seguradohon na iyan barat asin dai magwalat nin ano man na mahalaga sa napaparadang kotse. Siring man, mag-ingat kamo sa mga parahabon asin mandurukot na perming yaon sa darakulang katiriponan. Kabale digdi an dai pagwalat nin ano man na may halaga sa tukawan na mayo nin nagbabantay. Tabi mag-ingat.
[Nota sa Ibaba]
a Pagbabago ini hale sa nakaaging paisi sa Setyembre na An Satong Ministeryo sa Kahadean.