Paggayagaya sa Teokratikong Pag-iribaiba
1 An mga Saksi ni Jehova nag-aarapodan sa lambang saro na “brother” asin “sister.” Ini nagpapaheling kan dayupot na relasyon na kaipuhan na magdanay sa tahaw kan gabos na mga lingkod ni Jehova.
2 An terminong “brother” literal na nangangahulugan na “aki kan iyo man sanang magurang.” Namamatean daw nindo an siring na bogkos nin mainit na relasyon sa espirituwal sa gabos na nagdusay na mga lingkod ni Jehova? Paano niato orog pang mapatatalubo an pagkamoot sa tugang sa satuyang Kristianong mga kairiba?
SA MGA PAGTIRIPON
3 Inapresyar kan mga disipulo ni Jesus an kahalagahan nin iribang pagtiripon. (Gibo 2:42, 46; 20:7, 8) Kita man nagpapahalaga sa mainit na pag-iribaibang Kristiano. (Roma 16:3, 5) Alagad, an sato daw na mga pagtaram sa mga pagtiripon nagpapaheling na kita totoong nagmamakolog sa espirituwal na kamugtakan kan satuyang mga tugang? Paagi kan satuyang mga komento sa mga pagtiripon, kita makapagpapaheling nin pagkamoot asin dai nin kapasloan na interes sa kapakanan nin iba, na pinakokosog an satong mga tugang na magin maigot sa paglilingkod asin magin halimbawa sa paghiro.—Heb. 10:24, 25.
4 Kadakol kan mga oportunidad para sa teokratikong pag-iribaiba bago asin pagkatapos kan mga pagtiripon. Kaipuhan na gamiton niato ini tanganing magpahiwas paagi sa pagtaratara sa mga bagohan asin pakikimidbidan sa pinakadakol na kaya niato. An pakikihiras nin mga eksperiensia makakadugang sa pagpapakosog sa iba.—1 Tes. 5:11, 15.
KAPAKIPAKINABANG NA ASOSASYON
5 An saro dai makalalakaw na kaiba nin Dios mantang nakikiasosyar sa mga nasa marumpot asin may helang na sosyedad na minatogot kan gabos na ikinaoongis nin Dios. An Biblia nagpapatanid: “An maraot na pag-iriba nakararaot sa marahay na mga ugale.” (1 Cor. 15:33) An iba tibaad may kiling na mag-imbitar nin kinabanon na mga kamidbid asin daing pagtubod na mga paryentes sa sosyal na mga pagtiripon, sa paghonahona na makakapagpakosog ini sa sainda na akoon an katotoohan. Alagad, ini daw madonong asin kaoyon kan mga Kasuratan?
6 Sinadolan na kita na magin maingat sa satuyang pakikiiba sa mga tawo kan mga nasyon asin dai nagtutubod. (Helinga an Disyembre 1, 1988 Torrengbantayan, pahina 13-14; sa Ingles, Nobyembre 15, 1988, pahina 15-16.) Taano ta magkaigwa pa kita nin dai kinakaipuhan na sosyal na pakikiibaiba sa mga tawong nagpapadagos sa kinabanon na mga gawe asin dai nagigin mga parasamba ki Jehova? (2 Cor. 6:14, 15) An iba na nagin pabaya sa espirituwal tibaad maghanap kaidtong namomogol sa kinabanon na kaisipan asin mga gawe imbes na hanapon an asosasyon kan maygurang na mga Kristiano na makatatabang sa sainda na magin makosog sa pagtubod. Dai ninda narerealisar na an pag-atender sa sosyal na mga pagtiripon kaiba nin mayong prinsipyong kinabanon na mga tawo puwedeng magpaluya kan saindang pagtubod asin magraraot sa sainda.—Ikomparar an 2 Tesalonica 3:14, 15.
7 An satuyang mga katood asin mga kairibaiba puwedeng magkaigwa nin hararom na epekto sa satuya. Kaya, gurano kadonong na hanapon an pakikiiba sa diosnon na mga tawo na nagpapadanay nin dayupot na relasyon ki Jehova asin matabang sa satuya na magpadagos sa paglakaw sa katotoohan!