Buhay na Daing Katapusan—An Satong Pasohan
1 Rinibong tawo an tinokdoan ni Jesus asin nakaheling kan mga tandang ginibo nia. Dakulang pribilehiyo nanggad an saindang nakamtan! Sa sarong okasyon pinakakan nia an 5,000 lalaki, dai kabilang an mga babae asin mga aki, nin abundang suplay nin tinapay asin sira. Mantang kinonsiderar ni Jesus an pisikal na mga pangangaipo kan mga tawo, pangenot nang ikinahadit nia an saindang espirituwal na mga pangangaipo. Kaya, kan suminunod na aldaw sinabihan nia an kadaklan: “Magpagal kamo, bakong para sa kakanon na matutunawon, kundi para sa kakanon na nagdadanay sagkod sa buhay na dai nin katapusan.”—Juan 6:27.
2 Bilang tunay na mga Kristiano, mawot niatong sunudon an sadol ni Jesus asin magpagal para sa daing katapusan na espirituwal na mga pakinabang. Nangangahulogan ini na pagdanayon niato an materyal na mga pasohan sa saindang lugar asin an satong pangenot na pasohan iyo an paggibo kan kabotan nin Dios. Sa siring, inaarog niato si Jesus asin nagmamaigot na tabangan an iba na apresyaron an espirituwal na mga bagay, na ginigibong pasohan an buhay na daing katapusan.
AN GIBOHON SA ENERO ASIN PEBRERO
3 Sa Enero asin Pebrero mag-aalok kita kan lumang mga publikasyon, depende sa kun ano an makukua sa manlaenlaen na rehiyon. Idtong nasa mga lugar na naggagamit nin Ingles, Iloko o Tagalog mag-aalok kan librong Worldwide Security sa kontribusyon na ₱14.00. An mga naggagamit nin Cebuano mag-aalok arin man sa librong True Peace and Security o Happiness sa kontribusyon na ₱14.00. An mga kongregasyon na Hiligaynon, Pangasinan asin Samar-Leyte mag-aalok kan librong Good News to Make You Happy, sa espesyal na halagang ₱2.50. An mga kongregasyon na Bicol mag-aalok kan librong Truth sa espesyal na hababang halaga na ₱7.00. Dinadagka niamo an gabos na lubos na suportaran an espesyal na kampanyang ini. Kun igwa pa kamo nin ibang librong newsprint sa saindong istak, puwede ining ialok sa kontribusyon na ₱2.50 sa publiko durante kan duwang bulan na ini.
4 Tanganing magin epektibo sa pakikihiras kan maogmang bareta sa iba, kaipuhan na mag-andam kitang marhay. Pamilyar daw kita sa bagong Topikong Mapag-oolayan, asin igwa daw kitang espisipikong mga puntong masasambit hale sa literatura? Sa paggibo kan satong asignasyon sa semanal na babasahon sa Biblia asin sa pagkonsiderar kan teksto lambang aldaw, mag-ooswag an satong espirituwalidad, asin magkakaigwa kita nin kadakol na marahay na bagay na masasabi sa satong ministeryo.—Ikomparar an Jeremias 20:9.
5 Uya an isinusuherir na mga punto hale sa manlaenlaen na libro na tibaad mawot nindong gamiton pakatapos kan saindong Topikong Mapag-oolayan: Sa librong Worldwide Security, gamiton an ilustrasyon sa pahina 172 asin 173; sa librong True Peace and Security, gamiton an tsart sa pahina 78 asin 79; sa librong Happiness, an Kapitulo 15 igwa nin marahay na mga punto, magpoon sa pahina 140 sagkod sa pahina 150; sa librong Good News to Make You Happy, gamiton an tsart sa pahina 148 asin 149; sa librong Truth, gamiton an mga punto sa pahina 94 asin 95.
6 Kun dai nagkua nin literatura an kagharong, puwede kitang magwalat nin tract o handbill tanganing pukawon an interes kan tawo sa espirituwal na mga bagay. O puwede kitang magpalataw nin hapot sa Biblia asin isuherir sa kagharong na horophoropon ini para sa ngapit na pag-orolay kun kita magsongko liwat. Puwede kamong pumili nin saro sa kadakol na hapot na ipinakikipag-olay sa librong Reasoning para sa katuyohan na ini.
7 Totoo, an satong pasohan iyo an maimbod na paglilingkod ki Jehova sa paglaom sa buhay na daing katapusan. Logod magpaheling kita nin apresasyon para sa espirituwal na mga bagay paagi kan satong gibohon mantang sinasadol niato an iba sa pagkamoot asin marahay na mga gibo.—Heb. 10:24.