Hapot

● Angay daw sa sarong tugang na magkondukta nin serbisyo sa paglobong para sa sarong kinabanon na tawo na midbid na kriminal?

May mga panahon na minalataw an mga hapot manongod sa pagkondukta nin paglobong kun an nagadan, siring sa sarong dai nagtutubod na paryente nin sarong Saksi ni Jehova, na nagkaigwa nin dikit o dai nagkaigwa nin pakikiiba sa mga Saksi ni Jehova. An timbang na pagmansay sa pagkondukta nin serbisyo sa paglobong para sa siring na indibiduwal iinatubang sa The Watchtower kan Hunyo 1, 1977, pahina 346-7.

Kun pakiolayan na magkondukta nin paglobong para sa sarong tawo sa kinaban na minansay bilang sarong midbid na parakasala, maninigo kitang magsayuma huli ta ini magpapaheling sa negatibong paagi ki Jehova asin sa saiyang organisasyon. —Tal. 18:3.

Kumusta kun an dai nagdusay na tawo nagkasala kan nakaagi? Igwa nin kalaenan sa pag-oltanan nin saro na nagpadagos na namuhay sa kasalan asin an saro na nagkaigwa nin bakong marahay na buhay kan nakaagi alagad nagbabago na sa espirituwal na paagi asin nagmamaigot na magsolog nin bagong pagkatawo. (Rom. 12: 2; Efe. 4: 17, 20-24) An indibiduwal tibaad dai pa nagin sarong nagdusay asin bautisadong Kristiano na namumuhay nin matanos asin nalinigan na. (1 Cor. 6: 9-11; Kap. 7: 9, 10) Alagad tibaad naggigibo na sia nin mga paagi tanganing bagohon an saiyang buhay, asin puwede ining konsideraron kun igwa nin kahagadan na magsagibo nin paglobong sa saiya. Kun hinohona kan kamagurangan na dai mapupurisaw kaini an katoninongan asin pagkasararo kan kongregasyon ni magdadara nin pagtuyaw sa banwaan ni Jehova, dai magkakaigwa nin reklamo sa pagtatao nin pahayag nin sarong magurang kun itinotogot kan saiyang konsensia na gibohon nia an siring. —1 Cor. 10: 23, 24, 29, 32, 33.