Ano an Paniniwala kan Mga Saksi ni Jehova Manungod sa Lamay Saka Lubong?
An samuyang pagmansay asin paggawi may koneksiyon sa lamay saka lubong nakabasar sa mga katukduan kan Bibliya, kaiba na an minasunod:
Normal sanang magmundo pag nagadanan nin mahal sa buhay. Nagmundo an mga disipulo ni Jesus kan magadan an saindang mga mahal sa buhay. (Juan 11:33-35, 38; Gibo 8:2; 9:39) Kaya, dai mi ibinibilang an lamay saka lubong na panahon para sa maribok na kaurugmahan. (Eclesiastes 3:1, 4; 7:1-4) Imbes, ibinibilang mi iyan na panahon para magpahiling nin empatiya.—Roma 12:15.
Mayong pag-aram an mga gadan. Ano man an samuyang pinaghalian o kultura, linilikayan mi an mga kostumbre o kaugalian na basado sa bakong maka-Kasuratan na paniniwala na an mga gadan may pag-aram asin na kaya kan mga ini na impluwensiyahan an mga buhay. (Eclesiastes 9:5, 6, 10) Kaiba diyan an magdamlag na pagbantay sa gadan bago an lubong, magarbong seremonya sa paglubong saka anibersaryo kan kagadanan, pag-atang para sa mga gadan, pakikipag-ulay saka paghagad nin tabang sa mga gadan, asin mga ritwal pag nabalo. Linilikayan niyamo an gabos na kostumbre asin kaugalian na iyan bilang pagsunod sa pagbuot kan Bibliya: “Isuway nindo an saindong sadiri, . . . asin ipundo nindo an pagdutdot kan maating bagay.”—2 Corinto 6:17.
May paglaom para sa mga gadan. Itinutukdo kan Bibliya na magkakaigwa nin pagkabuhay liwat asin mawawara na an kagadanan. (Gibo 24:15; Kapahayagan 21:4) An paglaom na ini nakakatabang sa samuya na malikayan an mga kaugalian para sa grabeng pagmundo, kun paanong natabangan kaiyan an inot na mga Kristiyano.—1 Tesalonica 4:13.
Nagsasadol an Bibliya na dai magin mapagpasikat. (Talinhaga 11:2) Dai kami naniniwala na an lamay saka lubong sarong oportunidad para sa “pagpasikat” nin saro kan saiyang estado sa buhay. (1 Juan 2:16) Dai kami nagkakaigwa nin magarbong mga lubong o lamay na an pinakakatuyuhan iyo na malibang an mga tawo o ipasikat an sobra kamahal na mga kabaong saka pagbado na nakakaagaw nin atensiyon.
Dai mi ipinipirit sa iba an samuyang mga paniniwala manungod sa lamay saka lubong. Sa bagay na ini, sinusunod mi an prinsipyo kan Bibliya: “An lambang saro sa sato maninimbag sa Diyos para sa saiyang sadiri.” (Roma 14:12) Pero, kun may pagkakataon kami, hinihinguwa ming ipaliwanag an samong paniniwala “na may mahuyong buot asin hararom na paggalang.”—1 Pedro 3:15.
Paano ginigibo kan mga Saksi an diskurso manungod sa gadan?
Lokasyon: Kun magdesisyon an pamilya na magkaigwa nin diskurso manungod sa gadan, puwede iyan na gibuhon sain man na lugar na gusto kan pamilya, arog kan sa Kingdom Hall, sa punerarya, sa harong, sa krematoryo, o sa lugar kan paglulubungan.
Diskurso manungod sa gadan: Igwa nin sarong diskurso para rangahon an mga nagadanan paagi sa pagpaliwanag kun ano an sinasabi kan Bibliya manungod sa kagadanan saka sa paglaom na pagkabuhay liwat. (Juan 11:25; Roma 5:12; 2 Pedro 3:13) Puwedeng sambiton sa diskursong iyan an marahay na mga kuwalidad kan nagadan, pati na an magagayon na mga leksiyon sa saiyang maimbod na halimbawa.—2 Samuel 1:17-27.
Sarong kanta na basado sa Kasuratan an puwedeng kantahon. (Colosas 3:16) Tinatapos an diskurso paagi sa sarong nakakarangang pamibi.—Filipos 4:6, 7.
Bayad o pangungulekta: Mayo nin bayad an ano man na relihiyosong serbisyo niyamo, kaiba an diskurso manungod sa gadan, saka dai man kami nangungulekta sa samong mga pagtiripon.—Mateo 10:8.
Kun sairisay an puwedeng mag-atender: Puwedeng mag-atender sa Kingdom Hall para sa diskurso manungod sa gadan maski an mga bakong Saksi. Arog kan iba ming mga pagtiripon, an siring na diskurso bukas para sa publiko.
Nagduduman man daw an mga Saksi sa mga lamay saka lubong na pinapanginutan kan ibang relihiyon?
An lambang Saksi an madesisyon kaiyan, depende sa saiyang konsiyensiyang sinanay sa Bibliya. (1 Timoteo 1:19) Pero, dai kami nagpapartisipar sa mga relihiyosong seremonya na sa hiling mi bakong kauyon kan Bibliya.—2 Corinto 6:14-17.