Mga Hapot Hale sa mga Parabasa

◼ Mantang aram nin mga Saksi ni Jehova na an gadan daing pag-aram, taano ta sa paghona ninda mahalaga pa man giraray an pakikilobong sa mga kapagtubod?

An tamang kaaraman hale sa Biblia manongod sa kamugtakan kan gadan nagpoprotehir sa mga Saksi ni Jehova tumang sa salang mga kaisipan asin ibinubungang bakong madonong na gawe sa mga lobong. Iyan nagtatao man sainda nin dahelan na umatender sa Kristianong mga lobong.

Malinaw na ipinaheheling kan Tataramon nin Dios na kun nagagadan an tawo, sia dai nagdadanay na buhay bilang inmortal na kalag. (Eclesiastes 9:5) Pagkagadan, an bangkay minabuwelta sa kabokabo, magsalang paagi sa natural na pagkalapa o paagi sa pagsolo. An gadan dai na nabubuhay; sia mabubuhay liwat sana kun buhayon sia liwat nin Dios sa ngapit.—Juan 5:28, 29; Gibo 24:15.

Kaya, an mga Saksi ni Jehova dai nagsusunod sa mga kaugalean sa lobong na basado sa paniniwala na an gadan may inmortal na kalag, na nabubuhay sa ibang lugar. Dai sinda nakikiiba sa mga pagbilar, na may makokosog na pagkanta o pag-agrutong tanganing takuton an “mga espiritu,” ni sa magdamlag na pagbantay o labi-labing pagmondo tanganing rangahon an gadan.

Pero, dai ini nangangahulogan na an banwaan nin Dios dai nagmomondo. An kagadanan nin sarong paryente o dayupot na katood makamomondo, minsan sa tunay na mga parasamba na may tamang kaaraman manongod sa gadan. Halimbawa, kan sa paghona ni Jacob ginadan si Jose nin mabangis na hayop, an patriarka “ipinagmondo an saiyang aki sa dakol na aldaw.” Mababasa niato na “an gabos niang mga aking lalaki asin babae nagdatong tanganing rangahon sia.” (Genesis 37:33-35) Kan magadan an maimbod na si Jacob, “pinagbotan ni Jose an saiyang mga oripon, an mga doktor, na embalsamaron an saiyang ama,” asin “an mga taga-Egipto padagos na pinagtangisan sia nin pitong polong aldaw.” Minsan ngani an pamilya ni Jacob dai nangangapot sa falsong mga opinyon kan mga Egipcio manongod sa gadan, malinaw na sinda napahiro kan pagkagadan ni Jacob. “An bilog na pamilya ni Jose asin an saiyang mga tugang” boot na si Jacob ikalobong nin tanos, asin pati an mga tagaluwas nakarisa na sinda nagmomondo.—Genesis 50:1-11.

Masisitar an dakol pang ibang halimbawa sa Biblia na dian an mga lingkod ni Jehova talagang napahiro kan pagkagadan nin sarong kapagtubod o paryente kaya nagmondo nin tama man.a Kan si Jesus kaiba kan nagmomondong mga paryentes ni Lazaro, si Jesus bakong garo daing pagmate o nagpapaheling nin dai maninigong pagkaogma. Minsan ngani may pagsarig sa kapangyarihan kan pagkabuhay liwat, si Jesus naghibi. (Juan 11:33-35) Kan magadan mismo si Jesus, an saiyang mga disipulo nagmondo, minsan ngani sinabihan nia sinda na sia gagadanon asin bubuhayon liwat.—Mateo 16:20; Juan 16:17-20; 20:11.

An mga lingkod nin Dios ngonyan puwede asin talagang nakakamate kan kamondoan na dara nin kagadanan. Pero, an saindang pakasabot sa Biblia nakatatabang na mapogolan o matimbang an saindang pagmondo, kaoyon kan 1 Tesalonica 4:13, 14: “Mga tugang, habo mi na kamo daing pakaaram manongod sa mga natotorog sa kagadanan; tanganing dai kamo magmondo siring kan iba na dai nin paglaom. Huli ta kun kita minatubod na si Jesus nagadan asin nabuhay liwat, siring man an mga natorog sa kagadanan paagi ki Jesus dadarahon nin Dios sa kaibanan nia.”

Kun siring, ano an pag-atender sa Kristianong lobong (o memorial na pahayag manongod sa sarong may pagtubod)? May sono sa Bibliang mga dahelan kun taano ta para sa mga Saksi kapakipakinabang na magkaigwa kan asin umatender sa mga siring.

Girumdoma na kan garo baga nawara ki Jacob an saiyang aki, “an gabos niang mga aking lalaki asin babae nagdatong tanganing rangahon sia.” (Genesis 37:35) Sa dakol na nasyon pinagkatodan nang an mga paryentes magtiripon para sa lobong. Iyan nagtatao nin okasyon para sa iba, na tibaad dai man na gayo nagin siring kadayupot asin kun siring daing gayo apektado an emosyon, na magtao nin mga kapahayagan nin pakikidamay asin pagranga. Pagkagadan ni Lazaro “an dakol sa mga Judio nagduruman ki Marta asin ki Maria sa pagranga sa sainda dapit kan saindang tugang na lalaki.” (Juan 11:19) Kalabot man digdi an mga Kristiano na boot na ‘makaranga sa mga nasa ano man na kasakitan.’—2 Corinto 1:4.

An mga paraataman na Kristiano, dawa tibaad sibot-sibot sinda, maninigong mangenot sa pagtao nin karangahan sa aripompon. Ginigirumdom ninda na an saindang arogan na si Jesus, an Marahay na Pastor, isinugo ‘sa pagpaomay sa mga nasasakitan an puso asin sa pagranga sa gabos na nagmomondo.’ (Isaias 61:1, 2; Juan 10:14) Si Jesus dai sana nagtao nin siring na karangahan kun kombenyente. Andam siang magsakripisyo tanganing makaibanan kan nabayaan na mga paryentes ni Lazaro—tanganing makidamay sa saindang kamondoan.—Juan 11:11, 17, 33.

Minsan an mga Kristiano na tibaad daing gayo nin masabi sa mga nagadanan sa sarong lobong may marahay na magigibo paagi sana sa saindang presensia. An nagmomondong mga miembro kan pamilya tibaad magkamit nin dakulang karangahan sa madinamayon na presensia nin dakol—hoben asin gurang—hale sa Kristianong kongregasyon. Girumdoma an reaksion nin pirang Judio kan si Jesus umabot sa nagmomondong mga tugang ni Lazaro: “Helinga, kun gurano an pagkamoot nia saiya!” (Juan 11:36) An daing pagtubod na mga paryentes, pagtaraed, o kairiba sa negosyo na nakikilobong sa sarong Kristiano napahanga sa presensia nin dakol na Saksi asin sa siring orog na nagin andam na umako kan iinaatubang na mga katotoohan sa Biblia.

An gawe nin mga Saksing nakikilobong maninigo na angay sa situwasyon. Minsan ngani aram na dai nagsasakit an gadan, asin may pagsarig na may pagkabuhay liwat na naghahalat sa mga maimbod, isinasapuso ninda an hatol na: ‘May panahon nin pagtangis asin panahon nin pagngisi, panahon nin panambitan asin panahon nin pagtarok.’ (Eclesiastes 3:4) An lobong o serbisyo sa paglobong bakong panahon para sa makosog, sorobahan na orolay. Iyan okasyon para sa pakikidamay, na oyon sa hatol na: “Makipag-ogma kamo sa mga tawong nag-oogma; makitangis kamo sa mga tawong nagtatangis.”—Roma 12:15.

May saro pang dahelan kun taano an mga Saksi ni Jehova ta nakikilobong. An Tataramon nin Dios nagsasabi: “Orog karahay an pagduman sa harong nin pagmondo kisa pagduman sa harong nin punsion, huli ta iyan an katapusan nin gabos na tawo; asin an sarong nabubuhay maninigong isapuso iyan. . . . An puso kan mga madonong yaon sa harong nin pagmondo, alagad an puso kan mga mangmang yaon sa harong nin pag-ogma.”—Eclesiastes 7:2-4.

Minsan ngani an mga Saksi ni Jehova may dahelan na maglaom, an mga tataramon na iyan ipinasabong asin ibinugtak sa Biblia para sa satong kapakinabangan. An lobong ikababaing sa “harong nin pagmondo.” Sa satong pag-atender, an satong isip puwedeng haleon sa normal na mga kahaditan o aktibidad asin isentro sa kahalipotan nin buhay. Baga man paagi sa helang o “pagkanorongod,” an kagadanan puwedeng umabot sa siisay man sa sato asin bigla kitang paraon, ta “an tawo man dai nakaaaram kan saiyang panahon.” (Eclesiastes 9:11, 12) An mga magurang na ipinag-iba an saindang mga aki sa Kristianong lobong tibaad manompongan na ini puwedeng gumiya sa pag-oolay manongod sa pagigin tunay nin kagadanan, pangangaipo para sa pantubos, asin kadonongan nin paglilingkod sa “Dios na nagbabangon kan mga gadan.”—2 Corinto 1:9; Eclesiastes 12:1, 13.

Dai ibinibilang nin mga Saksi ni Jehova na sakramento an lobong, pero minimidbid ninda na an mamondong mga pangyayaring ini nagtatao nin okasyon para sa pagtao nin karangahan. Sa pag-atender dian, an mga Kristiano makatatao nin patotoo sa pagkamoot asin paggalang ninda sa saindang kapwa Kristiano. Asin tibaad mapahiro sindang orog na isipon an kahulogan nin buhay, an kun paano ninda maninigong gamiton an saindang buhay sa atubangan nin Dios.

[Mga Nota sa Ibaba]