Pag-aatubang kan Maogmang Bareta—Paagi sa Pagtabang sa Lambang Saro na Makapoon nin mga Pag-adal sa Biblia
1 An gabos na namomoot ki Jehova nagmamawot na kuyugon an pagboot ni Jesus na gumibo nin mga disipulo. (Mat. 28:19, 20) Kun mawot nindong makapoon nin pag-adal sa Biblia, hagadon an paggiya ni Jehova asin aprobetsaran an praktikal na tabang na itinatao paagi sa kongregasyon.—Mat. 7:7, 8.
2 An saindong konduktor sa Pag-adal sa Libro kan Kongregasyon igwa nin espesyal na interes sa gibohon na pag-adal sa Biblia sa saindong grupo. Domolok sa saiya asin ipahayag an saindong pagmawot na magkondukta nin pag-adal. Puwede niang iareglo na sarong may eksperyensiang parahayag an umiba saindo nin dikit na panahon. An katuyohan iyo an (1) tanganing tabangan kamo na makapoon asin magkondukta nin progresibong pag-adal sa Biblia asin (2) tanganing makapoon nin iba pang pag-adal sa ngapit.
PAKANOOD PAAGI SA HALIMBAWA
3 Kaipuhan na magkaigwa kamo nin marahay na rekord kan nanompongan na interes asin dumalaw liwat sa pinakaamay na panahon na posible. An parahayag na nagtatabang saindo puwedeng ipaheling saindo kun paano gigibohon ini. Kamong duwa maninigong magkaibang mag-andam sa pagsagibo kan mga pagdalaw liwat na ini sa katuyohan na makapoon nin mga pag-adal. An mga sesyon sa pag-ensayo magpapaheling saindo kun paano pukawon giraray an interes kun nagbabalik liwat.
4 Magmasid kun ano an ginigibo kan saindong kairiba kun sia nagbabalik liwat. Mangnohon kun paano nia iniiba an kagharong sa pag-orolay. Inaaram daw nia an saboot kan kagharong paagi sa paggamit nin naggigiyang mga hapot o sa paghagad nin komento dapit sa sarong kasuratan? Pakatapos kan pagdalaw, repasohon an saindong nanodan. Dangan magmaigot na iaplikar an mga bagay na ini sa mga pagdalaw liwat sa ngapit.
5 Basta naponan na an pag-adal, magplano nin mga paagi tanganing kamong duwa makikabtang digdi. Tibaad magbasa kamo nin piniling mga kasuratan asin ipaliwanag an mga ini. Pakatapos na maghale sa pag-adal, maghagad nin mga suhestion sa saindong kairiba, siring sa kun noarin maghapot nin dugang na mga hapot, kun paano pukawon an interes kan inaadalan para sa masunod na pag-adal, asin kun paano maggiya kan interes sa organisasyon.
KUN MAGKAIGWA NIN MGA PAGBABAGO SA TERITORYO
6 Kun may naorganisar na bagong mga kongregasyon o nagkaigwa nin mga pagbabago nin teritoryo, tibaad kaipuhan na ibalyo an inaadalan sa Biblia sa ibang parahayag. Puwede nindong iareglo na sarong parahayag hale sa ibang kongregasyon an umiba saindo sa pag-adal sa dikit na panahon. Pakatapos nin pirang semana, puwede nang poonan kan parahayag na iyan an pagkondukta kaini. Mantang an pagbalyo sa iba nin pag-adal saro pang kabtang kan gibohon na paggibo nin disipulo, maoogma kamong gibohon an pinakamarahay para sa inaadalan.—Fil. 2:4.
7 Totoo nanggad na yinuyugyog ni Jehova an mga nasyon asin pinapano an saiyang harong nin kawiliwiling mga bagay. (Hag. 2:7) Paagi sa pagtabang sa lambang saro, tibaad kadakol pa sato an magkakaigwa nin kaogmahan sa pagkondukta nin regular na pag-adal sa Biblia sa harong.