Mag-alok nin mga Magasin sa Lambang Oportunidad
1 Sa labi nang 100 na taon, an The Watchtower padagos na nagsusuportar sa katotoohan kan Kahadean. Ginagamit kaini an Tataramon nin Dios bilang minasbad tanganing putulon an relihiyosong sala asin ihayag an falsong mga katokdoan. An magasin na Awake! nanonorog man sa katuyohan kan katotoohan. Para sa matanos an boot na mga tawo, puwede kaining pukawon an saindang interes sa Makakasuratan na materyal na manonompongan sa iba pang publikasyon kan Sosyedad. Ano an magigibo niato tanganing ikawaras an mga magasin na ini sa mas dakol pang tawo?
2 An enot na tangga iyo an aramon an mga laog kan mga magasin. Nangangahulogan ini na basahon an mga magasin pakatapos na akoon an mga ini asin dangan ipakipag-olay an mga artikulo sa iba sa kongregasyon. Makatatabang ini sato tanganing magin positibo asin entusiastiko sa pag-alok kan mga ini sa iba.
3 An masunod na tangga iyo an pagtagama nin panahon lambang semana sa pag-alok kan mga magasin sa iba. Gibohon ining kabtang kan saindong regular na iskedyul. Alisto daw kamo sa iba pang oportunidad na ikawaras an mga magasin?
MAKIPAG-OLAY SA MGA TAWO
4 Kun nasa paglilingkod sa langtad, dumolok sa mga tawo mantang sinda naglalakaw sa tinampo. Makipag-olay sa mga nagtutukaw sa kotse, nagtatrabaho sa saindang natad, o naghahalat nin mga lunadan. Itokdo an sarong espisipikong artikulo asin punto nin interes. Gumamit nin ilustrasyon tanganing pukawon an saindang interes. Makipag-olay sa mga tawo sa makikatood, positibong paagi, asin iatubang an malinaw na mga punto na nanodan nindo sa pagbasa kan mga magasin.
IBA PANG OPORTUNIDAD
5 Probaran man an mga suhestion na ini sa teritoryo nin negosyo. Aprobetsaran an mga oportunidad na an mga negosyante bakong gayong sibot sa mga parabakal. Dakol na parahayag an nakanompong na mas pasil na magwaras nin mga magasin sa teritoryo nin negosyo kisa sa regular na gibohon na pagharongharong.
6 Naprobaran na daw nindong magkaigwa nin ruta sa magasin? Kun makawaras kamo nin mga magasin, ipaaram sa mga tawo na maoogma kamong magbalik pagkaagi nin duwang semana na dara an masunod na mga isyu. Dakol an tibaad maoogmang magkaigwa kan areglong ini nin personal na pagdeliber.
7 Tibaad humanap kamo nin iba pang oportunidad, siring sa pagpatotoo kun banggi, pakipag-olay sa mga paryentes, o kun nagbibiyahe o namamakal. Paagi sa paggamit kan mga suhestion na ini, matatabangan niato an dakol pang iba na magin regular na mga parabasa kan satong mga publikasyon sa Biblia.