Magmadonong—Iaplikar an mga Bagay na Saindong Nanonodan
1 Pasohan nin kadaklan na tawo na magkaigwa nin maogma, matoninong na buhay. An rinibong libro asin artikulo nagtatao nin hatol sa kun paano magkakaigwa nin mapangganang pag-agoman, kun paano padadakulaon an mga aki, kun paano mag-aasenso sa pinansial, kun paano magkakaigwa nin asin mapagdadanay an marahay na salud, asin dakol pang ibang tema mapadapit sa pagtabang sa mga tawo na magin maogma. Minsan ngani may makukuang kadikit na praktikal na kadonongan sa kinabanon na mga babasahon, an kadaklan na tawo sa kinaban bako nanggad na maogma asin matoninong. Taano daw?
2 An simbag manonompongan sa Biblia sa Talinhaga 1:7, na nagsasabi: “An pagkatakot ki Jehova iyo an kapinonan nin kaaraman. An kadonongan asin disiplina iyo an binasangbasang nin mga lolong.” An saro dai makakalaom na magkaigwa nin katoninongan asin kaogmahan kun dai nia minimidbid asin iginagalang an Burabod nin tunay na kaaraman asin kadonongan, si Jehova Dios.
3 An kinaban dukha sa espirituwal—grabe an gutom. Sa dai mapaniwalaan, an mamondong kamugtakan na ini nin mga bagay sadiring gibo nin tawo, ta an abundang espirituwal na kakanon itinatao sa gabos sa bilog na daga, asin iyan libre. (Tal. 1:20, 21; Kap. 22:17) Huli ta an mga tawo sa kinaban isinisikwal an kadonongan hale ki Jehova, sinda nagpapadagos na magkapkap sa espirituwal na kadikloman. (Tal. 1:22-32) Sa ibong na kampi, bilang banwaan ni Jehova, na naggagalang sa saiyang mga ley asin nagkukuyog sa saiyang mga pagboot, kita basog sa espirituwal asin maogma. (Isa. 65:13, 14) Siring man, an pagkamoot na abunda sa organisasyon nin Dios nagpapamidbid sa sato bilang tunay na mga disipulo ni Cristo. (Juan 13:35) Iyo, an lakop sa kinaban na kasararoan nin magturugang kan mga Saksi ni Jehova nagtatao nin buhay na patotoo na an pagkuyog sa mga katokdoan kan Biblia iyo an dalan na madonong na sundon.
4 Pero, an iba na asosyado sa organisasyon ni Jehova tibaad dai nakakaeksperyensia kan kaogmahan na puwedeng mapasainda. Tibaad madanyaran pa ngani ninda an kaogmahan nin ibang nasa palibot ninda huli sa mga bagay na saindang sinasabi asin ginigibo. Paano ini puwedeng mangyari? Iyan huli sana ta dai ninda iinaaplikar an kadonongan nin Dios sa saindang buhay. Tibaad sinda nag-aatender sa mga pagtiripon kan kongregasyon, pansirkitong asamblea, asin pandistritong mga kombension. Tibaad nasusubaybayan ninda an sinasabi kan mga publikasyon kan Sosyedad, alagad an saindang pamumuhay asin an pakikiiba ninda sa iba, pati sa mga kapwa Kristiano, dai nagpapaheling nin pag-aplikar kan katotoohan na saindang nanodan. Ano an kaipuhan na gibohon? An siring na mga tawo kaipuhan na magkonsentrar sa ‘pagtanom sa espiritu’ tanganing matawan ninda nin tunay na kaogmahan an saindang buhay asin makakontribuwir sa kaogmahan kan mga nasa palibot ninda.—Gal. 6:7, 8.
KUN ANO AN DAPAT NA IAPLIKAR
5 Kun kita bilang indibiduwal magin pabaya, dai magbantay, asin padara ki Satanas, sa kinaban, o sa satong bakong sangkap na laman, mawawara sato an kagayagayahan nin pagkaigwa nin dayupot na relasyon ki Jehova. Ngonyan, orog kisa kasuarin pa man, kaipuhan na mag-alisto na iaplikar an mga nanonodan niato sa satong mga pagtiripon sa kongregasyon asin sa mga asamblea saka sa iba pang probisyon kan organisasyon. An kinaban na nabubuhayan niato sarong peligrosong lugar na daing pondo sa pagliliwat. Kaipuhan na kita alistong iaplikar an hatol na mamomoton na itinatao ni Jehova paagi sa “maimbod asin madonong na oripon,” na minimidbid iyan bilang kakanon sa igong panahon.—Mat. 24:45-47.
6 Sa presenteng programa para sa satong espesyal na aldaw nin asamblea, kadakol na marahay na impormasyon an itinatao sa kun paano marigon na maninindogan bilang sarong aripompon. May itinataong praktikal na mga suhestion sa kun paano lalabanan an nagpapaluyang mga impluwensia, arog baga nin mga kamugtakan na nagpapaluya nin boot, an kinabanon na espiritu nin independensia, asin mga pan-istorbong nakauubos nin panahon. Ginigibo daw niato an marahay na hatol na lubos na manarig ki Jehova asin sa saiyang mga dalan, midbidon asin magpasakop sa teokratikong autoridad, magin mapakumbaba asin hababa an boot, asin tuboson an panahon para sa teokratikong mga gibo? (Miq. 6:8; Efe. 5:15, 16; Heb. 6:10; 13:17) Nagtitinabangan daw an mga magpapamilya na makapaoyon sa Kristianong pamumuhay? An pagpili niato nin aling-alingan, an satong mga ugale, asin an satong mga gibo sa aroaldaw maninigong apektado kan hatol na inaako niato hale sa Kasuratan. Kun mayo nin maigot na paghihingoa na iaplikar an mga nanonodan, kakadikit o mayo nin espirituwal na pag-oswag, asin madadanyaran an satong katoninongan sa isip asin kaogmahan.—Fil. 4:7-9; Sant. 1:22-25.
7 Kaipuhan an durungan na paghihingoa sa personal asin pampamilyang pag-adal. Ikatotokdo kita kan Watch Tower Publications Index sa detalyadong impormasyon manongod sa pag-aplikar kan mga prinsipyo sa Biblia. An librong Young People Ask ekselenteng pantabang na magagamit nin mga magurang sa pagtabang sa saindang mga aki na maatubang an komplikadong kinaban ni Satanas ngonyan. Paagi sa paggamit sa siring na materyales, makukua niato an punto-de-vista ni Jehova asin magigiyahan nin matanos na mga prinsipyo. An dai paggibo kaini magigin garo pagkaigwa nin bolong para sa sarong helang pero dai iyan tinotomar, dawa aram niato na maoomayan kaiyan an helang niato. An regular na personal asin pampamilyang pag-adal mapatalubo sa satong pagtubod asin matao sato kan kosog na magtagal. Sa panahon nin pagbalo, an satong pagtubod dai maluluyos, na dahelan na kita tumalikod.—Mat. 13:6; Luc. 8:13; Heb. 2:1.
8 An kamagurangan asin ministeryal na mga lingkod dapat na magtao nin halimbawa sa pangengenot sa saindang pamilya. Kaiba digdi an pagtabang sa saindang agom asin mga aki na iaplikar an mga nanonodan ninda sa Tataramon asin organisasyon nin Dios tanganing makapagdanay na makosog sa espirituwal. Sa paaging ini, an pamilya sa kabilogan magigin arogan sa Kristianong pamumuhay asin makapakokosog sa iba sa laog asin luwas kan kongregasyon.—Efe. 6:4; 1 Tim. 3:4, 12, 13.
KUN SIISAY AN TATABANGAN
9 Kabilang sa mga nag-aatender sa Memorial kada taon an dakol na nagkakaipo nin dugang pang pagpakosog na iaplikar an saindang nanonodan asin aktibong makiasosyar sa organisasyon. An mamomoton na konsiderasyon puwedeng ipaheling sa satong mga inaadalan sa Biblia paagi sa pagtokdo sa sainda kun paano iaaplikar an mga prinsipyo kan Biblia sa saindang buhay asin kun paano ootobon an matanos na mga pagboot nin Dios. Maninigo kitang magpaheling nin pagmakolog sa mga nag-ooswag pasiring sa pagigin satong mga tugang na lalaki asin babae sa pagtubod.
10 An siisay man na nagin iregular o inaktibo maninigong tabangan na masabotan an pangangaipo na makikabtang sa regular na aktibidad sa organisasyon. Kaipuhan na mabawi ninda an katoninongan asin kaogmahan na dati nasa sainda kan mas lubos sindang naglilingkod ki Jehova. (Juan 13:17) Paagi sa maboot na pagtabang sainda na palaadon liwat an saindang pag-apresyar sa katotoohan asin “magdolot sa Dios nin atang nin pag-omaw,” ikaaaplikar ninda an mga nanonodan ninda asin makapagdadanay sa dalan na pasiring sa buhay.—Heb. 13:15; Helingon an An Satong Paglilingkod sa Kahadean, Agosto 1979, pahina 3, asin Abril 1977, pahina 3.
11 An gabos sa banwaan nin Dios kaipuhan na makidungan sa marikas an dalagan na organisasyon ni Jehova. Dai niato ikatotogot na kita maholog sa pagkakontento na sa sadiri. Kaipuhan na permi niatong papagdanayon an satong espirituwalidad, na sinusubaybayan an pinakabagong impormasyon na itinatao paagi sa organisasyon nin Dios asin iinaaplikar tolos iyan. Ini nagkakaipo nin maigot na paghihingoa asin kun beses nin personal na sakripisyo. Alagad ta dai hinahagad sato ni Jehova an dai niato kaya. Sia an satong Kaglalang, asin aram nia kun ano an pinakamarahay para sa sato. Kun siring patunayan niato na kita madonong paagi sa padagos na pagpatokdo ki Jehova asin pag-aplikar kan mga nanonodan niato. Ini magtatao nin kaomawan sa saiya asin magbubunga nin daing katapusan na pakinabang para sa sato.—Isa. 48:17; 54:13.