Pagpanigo sa Saindong Espirituwal na Pangangaipo
1 Si Jesus nagsabi: “Maogma idtong mga nakamamate kan saindang espirituwal na pangangaipo.” (Mat. 5:3) Taano ta napakahalaga na makamate kan satong espirituwal na pangangaipo? Paano niato ikapaheheling na namamatean niato iyan?
2 An saro dai puwedeng perming pabayaan an saiyang pisikal na mga pangangaipo asin maglaom na gumibo nin marahay na trabaho aroaldaw. Totoo an iyo man sanang prinsipyo kun pababayaan niato an pagkakan sa espirituwal.—Mat. 4:4; Juan 17:3.
AN MGA PAGTIRIPON NAKATATABANG NA MAPANIGOAN AN MGA PANGANGAIPO
3 Sa satong mga pagtiripon, “an maimbod asin madonong na oripon” nagtatao nin marahay na espirituwal na kakanon tanganing mapanigoan an satong pangangaipo. (Mat. 24:45-47) An kada pagtiripon may espisipikong katuyohan, asin mayo nin maninigong pabayaan.
4 Pag-olayan niato sa halipot an tolo sana sa lima niatong pagtiripon. An pangenot na pagtiripon tanganing kita makadungan sa nag-aabanteng katotoohan iyo an pag-adal sa Torrengbantayan. An Teokratikong Paadalan sa Pagmiministro makatatabang sato na magin matibay na mga ministro. An Pag-adal sa Libro kan Kongregasyon nagtatao nin maingat na pag-adal sa laen-laen na tema sa Biblia.
5 Nag-aandam daw kamo para sa mga pagtiripon? An iba tibaad basahon sana nin dali-dali an materyal, na madalian na linilinyahan an simbag sa mga hapot, pero dai binabasa an sitadong mga teksto. Tibaad sinda medyo preparadong magkomento, pero nakukua daw ninda an pinakalubos na espirituwal na sustansia?
TUBUSON AN PANAHON
6 Kun kamo nagtatagama nin oras sa pag-andam para sa mga pagtiripon, dai nindo pagtogotan an telebisyon o iba pang bakong gayong mahalagang aktibidad na makaistorbo. An mga payo nin pamilya, nangorogna, maninigong tumabang sa saindang mga pamilya na magdanay sa sarong regular na programa nin pag-adal sa Biblia, pag-andam para sa mga pagtiripon, asin pakikikabtang sa ministeryo sa langtad. An gabos maninigong ‘tubuson an panahon’ paagi sa pagpaorog sa saindang espirituwal na mga pangangaipo.—Efe. 5:15-17.