Kun Taano ta Maninigo Kamong Magmawot na Magkaigwa nin Inaadalan sa Biblia
1 An saro sa pinakamaogmang eksperyensia nin Kristiano tabangan an iba na magin disipulo ni Cristo. (Mat. 28:19, 20; 1 Cor. 3:6, 9) Para sa mga tinatabangan niato, iyan puwedeng mangahulogan nin buhay na daing katapusan.
2 Nagkakaigwa nin dayupot na gayong relasyon an paratokdo asin an tinotokdoan. An espirituwal na pagtalubo kan inaadalan tunay na ginigikanan nin dakulang kagayagayahan. (1 Tes. 2:11, 19, 20) Kun siring, maninigong magin pasohan nin kada Kristiano na magkaigwa nin kisuerra sarong inaadalan sa Biblia sa luwas kan saiyang pamilya. Siyempre, paninimbagan kan kada payo nin pamilya na regular na adalan sa Biblia an saiyang pamilya. Kun daing pagtubod an ama, an ina an makikipag-adal kan Biblia sa mga aki.
MAMIBI NA MAGKAIGWA LOGOD NIN INAADALAN
3 An regular na pamibi ki Jehova na magkaigwa nin inaadalan sa Biblia nagpapaheling kan satong odok na pagmawot na magkaigwa kaiyan. Ipinaheheling kaiyan na nasasabotan niato an nakatayang isyu sa buhay asin kagadanan. (Ezeq. 33:7-9, 14-16) Makasisierto kita sa bendisyon ni Jehova sa satong maimbod na mga paghihingoa.—1 Juan 5:14, 15.
4 Tanganing magin epektibo sa paggibo nin mga disipulo, kaipuhan na kita mag-andam nin marhay. Sa maabot na mga bulan, ipaaabot mi saindo an mga suhestion hale sa nagbibiyaheng mga paraataman asin iba pa na nagin mapanggana. An serye nin mga artikulo magtatao nin praktikal na mga ideya kun paano poponan asin pangengenotan an mabungang mga pag-adal sa Biblia.
MAABOT NA MGA ARTIKULO
5 Ano an pira sa mga ideyang ini na satong pag-oolayan sa maabot na mga isyu kan An Satong Ministeryo sa Kahadean? Pag-oolayan niato kun paano an manlaenlaen na tugang nakapoon nin pag-adal sa Biblia asin kun anong mga paagi nin pagtotokdo an ginamit ninda tanganing maabot an puso kan saindang mga inaadalan. Ihihiras mi man an mga suhestion sa pagpakosog sa apresasyon para sa organisasyon asin sa paglilingkod sa langtad. Magkakaigwa man nin mga suhestion sa kun paano paooswagon an saindong pampamilyang pag-adal tanganing an saindong mga aki makapatalubo nin mas dayupot na relasyon ki Jehova.
6 Sa laog kan nakaaging apat na taon nin paglilingkod, 959,834 katawo an nabautismohan sa bilog na kinaban, asin an 31,383 kaini sa mga kongregasyon digdi sa Pilipinas. An mayoriya sa mga tawong ini nakaabot sa punto nin pagdusay asin bautismo sa tabang nin saro na nakikipag-adal sainda sa Biblia. An bilang nin mga nag-atender sa Memorial asin sa satong mga pandistritong kombension nagpaparisa na dakol pa an puwedeng tabangan na umoswag pasiring sa bautismo. Paagi sa pagpapadagos kan satong paghihingoa na makapoon asin pangenotan an pag-adal sa Biblia kaiba an siring na mga tawo, tibaad matabangan niato an dakol pa na magin mga disipulo asin sa katapustapusi magkamit nin buhay na daing katapusan. (1 Tim. 6:12, 19) Kaya kun mayo kamo nin pag-adal sa Biblia sa presente, gigibohon daw nindong personal na pasohan na makapoon asin pangenotan an saro sa 1991 taon nin paglilingkod?