Padagos na Mamunga na May Pakatagal
1 Kan sumurat sa kongregasyon sa Colosas, mayo pang 30 taon pagkagadan asin pagkabuhay liwat ni Jesu-Cristo, nasabi na ni apostol Pablo na an katotoohan kan maogmang bareta namumunga asin nagdadakol sa bilog na kinaban. (Col. 1:5, 6) Sa mas dakulang sokol ngonyan, an mga Saksi ni Jehova literal nang naabot an “kaporoporohi nin daga” kan maogmang bareta kan Kahadean. (Gibo 1:8; Juan 14:12) Kaidtong 1989 taon nin paglilingkod, nagkaigwa nin 5.6-porsientong pag-oswag sa promedyong bilang nin mga parahayag kan Kahadean sa bilog na kinaban, asin naabot niato an bagong peak na 3,787,188 parahayag sa 212 nasyon!
2 Sa mga nasyon na prohibido an paghuhulit manongod sa Kahadean nin Dios asin bakong kompleto an mga report, may irineport na mas dakula pang pag-oswag na 7.6 porsiento! Sa ibong kan kadakol na problema sa mga nasyon na iyan, an mga parahayag nagpapadagos na ‘magbunga na may pakatagal.’ (Luc. 8:15) Sa nagkapirang nasyon nainaan na an sakit, pero an masakit na mga kamugtakan dai pa man giraray naliliwat sa ibang nasyon.
3 Sa mga nasyon na mas dakula an libertad na otobon an mga aktibidad nin paghuhulit kan Kahadean, laen man na mga problema an inaatubang niato. Nanonompongan niato an grabeng kadaihan nin interes asin pagigin indiperente, nangorogna sa mga lugar na may materyal na prosperidad. An mga lingkod ni Jehova dapat na mag-ingat na dai arogon an siring na mga kaisipan. Habo niato na agawon nin materyal na intereses, kaalingan, dibersion, asin iba pang istorbo an satong teokratikong mga aktibidad. Ta kun dai puwede kitang magin indiperente asin dai na makaapresyar kan pangangaipo na padagos na mamunga na may pakatagal.—Luc. 21:34-36.
KAIPUHAN AN PAKATAGAL ASIN PAGHIHINGOA
4 An pakatagal kaipuhan baga man kita napapaatubang sa pagtumang sa maogmang bareta o may kadikit na libertad na otobon an satong Kristianong mga paninimbagan. Sa nagkapirang nasyon, an satong mga tugang dakol nang taon na nagtatrabaho sa irarom nin masakit na mga kamugtakan. An saindang pakatagal sa irarom nin siring na kasakitan nagbunga nin pagkainooyonan, asin ngonyan sinda nag-aani nin mayaman na mga bendisyon. (Roma 5:3-5; Gal. 6:9) Ano man na mga kasakitan an mapaatubang sato, boot niatong magpadagos na magtagal. An patotoo sa Kahadean kaipuhan na ikatao, asin kita gabos kaipuhan na padagos na magpaheling kan satong integridad. Paagi sa satong pagtagal, maseseguro niato an satong kalag, o buhay.—Mar. 13:10; Luc. 21:19.
5 Ikapaheheling niato na dai niato binabasangbasang an espirituwal na mga bagay paagi sa maigot na paghihingoa niato sa paglilingkod ki Jehova, na dai napapagal sa paghuhulit. Sa nagkapirang nasyon na mas masakit an transportasyon, na kulang an materyal na mga pangangaipo, asin may mga problema sa ekonomiya, daing pondo an paghuhulit kan maogmang bareta. Sa nagkapira sa mga nasyon na iyan, an mga parahayag sa kongregasyon regular na nagpopromedyo nin 14 sagkod 17 oras sa paglilingkod sa langtad kada bulan. An saindang mga payunir padagos man na nagdadakol. Iyan nagpapangyari sa sato na may dakol na materyal na kasangkapan na umontok asin mag-isip-isip. Madudugangan pa daw niato an satong regular na pakikikabtang sa pinakamahalagang paghuhulit kan Kahadean asin paggibo nin mga disipulo?
MAKAGIGIBO PA DAW KITA NIN OROG?
6 An mas dakol na oras sa paglilingkod sa langtad tibaad mangaipo na liwaton niato nin kadikit an satong iskedyul. Kun nagsasarong oras kita sa ministeryo sa langtad kun Domingo, puwede daw niatong palawigon an oras na iyan paagi sa paggamit pa nin sarong oras sa pagdalaw liwat o pangangadal sa Biblia? O kun kita may inaadalan sa Biblia, puwede daw niatong iiba an mga sarong oras na pagharongharong o pirang pagdalaw liwat bago an pag-adal? Sa Sabado pakatapos nin duwang oras sa pagwaras nin magasin, tibaad puwede niatong ihatod an magasin sa satong ruta sa magasin o pagmaigotan na gumibo nin pirang pagdalaw liwat. An mga nasa siudad tibaad marisang kombenyente na gumamit nin kadikit na oras sa paghuhulit sa tinampo. Sa mga paaging ini o sa iba pa, tibaad madugangan niato an satong pakikikabtang sa paglilingkod sa langtad. Segurado man na madudugangan an marahay na mga resulta.
7 An mas dakol na oras sa paglilingkod sa langtad na nandadalaw liwat siertong magbubunga nin mas dakol na pag-adal sa Biblia. Pag-abot nin panahon ini mangangahulogan nin mas dakol na tawo na napapasa katotoohan asin tinatabangan kitang mahaman an paghuhulit kan Kahadean.—Mat. 28:19, 20.
KAIPUHAN AN PAMIBI
8 Tangani kitang padagos na mamunga na may pakatagal, kaipuhan na hagadon niato an bendisyon ni Jehova asin pagiya sa saiyang espiritu. Kaipuhan na ipamibi niato ki Jehova an satong ministeryo. Kun namimibi ki Jehova manongod sa satong aktibidad sa langtad, napapagirumdom kita na kita saiyang mga katabang. (1 Cor. 3:9) Sa tabang ni Jehova, makatatagal kita sa satong ministeryo dawa kun dai tolos niato naheheling an resulta. Sa nagkapirang lugar, nakamtan sana an pag-oswag pakalihis nin dakol na taon nin maimbod na pagtagal kan mga parabalangibog kan Kahadean. Mantang tinatanaw niato an ngapit, kaipuhan na perming hagadon an paggiya asin tabang nin Dios tanganing dai kita pumondo kundi lubos na mahaman an satong ministeryo. (2 Tim. 4:5) Kadakol pa kan ibinubunga kan paghuhulit kan Kahadean asin paggibo nin mga disipulo.
9 Idinoon ni Jesus an pangangaipo na kita perming mamibi. (Luc. 18:1) Si Pablo nagsadol: “Mamibi nin daing ontok.” (1 Tes. 5:17) May napakahalagang mga dahelan na kita magmaigot sa pamibi ngonyan. Kadakol na paninimbagan an kalabot sa pag-ataman sa nagdadakulang aripompon taon-taon. Boot niato na tabangan an iba na mamunga na may pakatagal. Kaipuhan na tawan nin atension an laen-laen na mga pangangaipo nin indibiduwal na mga parahayag asin kan organisasyon bilang kabilogan. Mantang naheheling niato an pangangaipo nin mga donasyon tanganing masustentohan an gibohon asin magin posible an padagos na pagpublikar nin mga babasahon na basado sa Biblia, boot niatong mamibi na padagos na pahiroon ni Jehova an mga matatakton sa Dios na magin matinao sa bagay na ini.—2 Cor. 9:8-11.
10 Mantang nabubukasan an mga kabtang kan pankinaban na langtad para sa orog na teokratikong pagkultibar kisa kasuarin pa man, nagigin mas makahulogan an Makakasuratan na hatol sa Colosas 4:2: “Magmaigot kamo sa pagpamibi, na nagdadanay na puka dian na may pagpasalamat.” An satong mga pamibi maninigong para sa satong mga tugang sa gabos na lugar na sinda logod magpadagos na mamunga, na tinatabangan an ibang arog-karnero na yaon sa mga teritoryong mas masakit an paghuhulit kan mga nakaagi.
MAGIN MAPAGPASALAMAT
11 Kanigoan an pagpasalamat niato sa abundang espirituwal na mga probisyon na ikinaoogmang gayo niato! Boot niatong pasalamatan si Jehova para kaini, asin ipinamimibi man niato an padagos niang pagbendisyon sa gibo kan maimbod na oripon asin kan Namamahalang Grupo kaiyan. Inaapresyar nanggad an saindang mapakumbaba, daing kapagalan na mga paghihingoa para sa sato asin para sa mga arog-karnero sa bilog na kinaban.
12 Sa pagsabwag kan banhi kan Kahadean, ikinawaras an kadakoldakol na babasahon. (Mat. 13:3-8, 18-23) Pero, nagpapadagos an pagkaipo nin Biblia asin mga babasahon sa Biblia sa langtad. Ipinaririsa kan pankinaban na report na may ginibong dakulang pagkultibar asin pagbaribi sa porma nin mga pagdalaw liwat asin pag-adal sa Biblia. Mantang padagos niatong ginigibo an satong kabtang sa mahahalagang kabtang na ini kan satong ministeryo, pinasasalamatan niato si Jehova para sa saiyang padagos na bendisyon na nagpapatubo sa mga bagay. Tunay nanggad, inaarang niato an bendisyon na iyan.—1 Cor. 3:6, 7.
IBA PANG MGA PANGANGAIPO
13 Huling kita yaon sa kinaban minsan ngani bakong kabtang kaiyan, an mga Kristiano padagos na mapapaatubang sa mga pagbalo asin kasakitan, asin ini maorog pa sa huring mga aldaw na ini. An iba ngonyan nagtitios na nin paglamag o iba pang kasakitan. An iba kaipuhan na gibohon an saindang Kristianong mga aktibidad sa mga dagang may guerra. An satong mga tugang nag-agi nin mga kalamidad arog baga nin mga linog asin bagyo. Kun ini nangyayari, maninigo niatong ipamibi an satong mga tugang sa mga lugar na iyan. (Ikomparar an Gibo 12:5; 2 Corinto 1:11.) Kun beses kaipuhan na dolokon o suratan an haralangkaw na opisyales manongod sa mga pagprohibir sa satong gibohon, paglamag sa satong mga tugang, o iba pang bagay na nakakaapektar sa intereses kan Kahadean. Sa irarom nin siring na mga kamugtakan, ginigibo niato an personal niatong makakaya, asin ipinamimibi niato an mga tawong ini na logod magkaigwa sinda nin marahay na boot sa satong mga kapwa lingkod.—1 Tim. 2:1, 2.
14 Kadakol kan mga problema na itinatao sa mga pamilyang nabubuhay sa maraot na kinaban ni Satanas. (2 Cor. 4:4) An mga mag-agom tibaad mapaatubang sa magagabat na problema. Maninigo sindang sadolon na mamibi para sa banal na paggiya, asin kita man puwedeng mamibi para sa sainda. (1 Cor. 7:5; 1 Ped. 3:7) An mga payo nin pamilya maninigong makasabot na hihinanyogon ni Jehova an sinsero nindang mga pamibi para sa paggiya sa marahay na pangengenot sa saindang pamilya. (Hok. 13:8; Fil. 4:6, 7) An hoben asin gurang kapwa napapaatubang sa masakit na mga situwasyon. Puwedeng ini sa eskuwelahan, sa sekular na trabaho, kun nagbibiyahe, o sa iba pang kamugtakan. An pamibi nakatatabang sato na mapaglabanan an espiritu kan maraot na kinaban na ini asin padagos na mamunga mantang padagos niatong ginigibo an ikinaoogma kan pagheling nin Dios.—Mat. 6:13; Efe. 6:13-18; 1 Juan 3:22.
15 Si Jehova an dakulang Paradangog sa pamibi. (Sal. 65:2) Sa gabos na panahon kaipuhan na itao niato sa saiya an satong mga kahaditan. (Sal. 55:22) Igwa kita nin mga oportunidad na ipaheling an satong pagmakolog paagi sa pamimibi para sa gabos na intereses kan Kahadean asin sa kapakanan kan satong mga tugang sa gabos na lugar. Kun hinohorophorop an gibohon kan mga nangengenot sa kongregasyon asin nagpapalakaw sa programa nin pagpapahiwas sa bilog na kinaban, kun inaasikaso an mga may helang sa espirituwal, o kun inaasikaso an iba pang problema sadit man o dakula, kita gabos maninigong iatubang ki Jehova an siring na mga bagay sa pamibi. (1 Tes. 5:25; Sant. 5:14-16) Iyo, an satong mga kahaditan maninigong itao ki Jehova na bilog an pagsarig na ano man an hagadon niato kaoyon sa saiyang kabotan, dadangogon nia kita. (1 Ped. 5:7; 1 Juan 5:14) Magin logod kitang maigot sa paglilingkod sa Kahadean asin padagos na maglaom ki Jehova na tabangan kitang magbunga na may pakatagal.