Padagos na Magtokdo na Daing Ontok
1 Dai kita pinapagkakarkulo kan Biblia kun anong klase an teritoryo kan enot na mga disipulong Kristiano. Dai nahaloy pagkagadan ni Jesus, pinatanidan sinda kan mga autoridad na “dai na nanggad magtaram o magtokdo” manongod ki Jesus. (Gibo 4:18) Taano? An sarong dahelan iyo an pambihirang kapangganahan ninda. Rinibo an nagtuturubod, arog kan ibinabareta kan Gibo 4:4: “An kadaklan sa mga naghinanyog sa pahayag nagturubod, asin an kabilangan kan mga lalaki nagin mga limang ribo.”
2 Huli ta kita man padagos na nagtotokdo na daing ontok, ginatos na ribo, iyo, minilyon an minatubod sa satong aldaw. Ngonyan na Abril kita may pribilehiyo na ialok an suskripsion sa Torrengbantayan. Daing duwa-duwa na An Torrengbantayan may mahalagang kabtang sa pagpamate sa mga tawo kan saindang espirituwal na pangangaipo. Ini nagbunga nin kaogmahan para sa dakol, ta nakanood sindang gibohon an kabotan ni Jehova.—Ikomparar an Mateo 5:3.
ABOTON AN GABOS
3 Minsan pa tibaad parateng mahulitan an satong teritoryo, tibaad posible pang makaolay an nagkapira na kakadikit kan nagin oportunidad na madangog an maogmang bareta. Paano man? Sa teritoryo na dai naaabot nin pagharongharong, taano ta dai aprobetsaran an suhestion na itinao sa satong pandistritong kombension na makikabtang sa paghuhulit paagi sa telepono, o gumibo nin surat? O gumibo nin espesyal na paghihingoa na kaolayon an payo nin pamilya kun naghuhulit. Paagi sa pagkaigwa nin marahay na mga house-to-house record, tibaad mahanap niato an ibang miembro kan pamilya, arog baga nin lola, sobrino o pinsan na nag-eeskuwela, o kunyada na nagtatrabaho sa laog kan semana. An ekstrang paghihingoa na kaolayon an kada miembro nin pamilya tibaad mabalosan nin marhay.
4 Kadakol kan marahay na mga paagi na makakua nin suskripsion sa laog kan bulan. An saro iyo an pag-agda sa satong mga inaadalan sa Biblia asin iba pang interesado na sumuskriber. Tibaad an sarong inaadalan niato sa Biblia nagsususkriber na sa sarong magasin. Taano ta dai isuherir na resibihon nia an duwa? An mga pamilya puwedeng dagkahon na kumua nin suskripsion sa Torrengbantayan para sa kada miembro kan pamilya tanganing makapag-andam sinda para sa pag-adal sa Torrengbantayan. An saro pang suhestion magkaigwa nin mga ruta sa magasin dangan ialok an suskripsion sa mga nagpapaheling nin pambihirang interes. Maninigo man niatong alokan nin pag-adal sa Biblia an mga nagpapaheling nin tunay na interes.
PAHIWASON AN SAINDONG MINISTERYO
5 Rinibo an naglilingkod bilang auxiliary payunir ngonyan na Abril. Saro daw kamo sa sainda? Kun iyo, ikapaplano daw nindong paaboton sa Mayo asin Hunyo an saindong pagpapayunir? Puwede daw na makikabtang sa pagpapayunir an bilog na pamilya sa Mayo? Kun dai makapagpapayunir an bilog na pamilya, puwede daw kamong magtarabangan tanganing an saro o labi pang miembro kan pamilya makagibo kaiyan? Kun dai, posible daw na kisuerra gumamit nin mas dakol na oras sa ministeryo sa pag-alok kan mga magasin na Torrengbantayan asin Magmata!, na may espesyal na mga tema sa Abril asin Mayo?
6 Inaapresyar niato an espirituwal na mga pakinabang asin bendisyon na inako niato paagi sa mga pahina kan An Torrengbantayan. Aram niato na an mga may sadiosan na puso sa satong teritoryo makikinabang man nin igo sa pagbasa nin regular sa mga magasin. Sa bulan nin Abril, asin dagos sa Mayo, ipagpadagos niato an satong pagtotokdo paagi sa marahay na mga instrumentong itinao sato ni Jehova. Paagi kaiyan, kita mag-aani kan bendisyon ni Jehova asin magigin bendisyon man sa iba.—Gal. 6:9.