Magkondukta nin mga Pag-adal sa Biblia sa Librong Mabuhay Sagkod Lamang
1 Mapadapit sa librong Mabuhay Sagkod Lamang, an sarong babae nagsabi: “Segunda sa Biblia mismo, nanompongan ko an librong ini na iyo an pinakatama asin nakapahihirong literatura na nabasa ko kasuarin man!” Kita gabos minaoyon na an librong ini saro sa pinakamagayon na ipinublikar kasuarin man tanganing tabangan an mga tawo na masabotan an Biblia asin dagkahon sinda na magin aktibong mga paraomaw ki Jehova.
2 Kan 1982, kan iluwas an librong Mabuhay Sagkod Lamang, 60,098 parahayag an nagkokondukta nin 26,056 na pag-adal sa Biblia sa Pilipinas. Kan Nobyembre, 1992, an 111,665 parahayag nagkondukta nin 95,357 pag-adal sa Biblia. Sa ngonyan, 62 milyones na kopya kan librong ini an inimprenta sa 115 tataramon. May dakulang epekto nanggad an librong ini sa satong pambilog na kinaban na gibohon!
3 Magbugtak nin mga Pasohan: An pambihirang pag-oswag na ini bunga kan bendisyon ni Jehova asin kan kaigotan kan saiyang banwaan na tabangan an mga tawo paagi sa nagliligtas-buhay na mensahe kan Biblia. (Roma 10:13-15; 1 Tim. 2:4) Kita nakasasabot kan pagkaapurado kan panahon asin kan pangangaipo para sa kahigosan sa paghahayag kan Kahadean nin Dios.
4 Mantang nag-aabante an organisasyon, kumusta kita bilang indibiduwal? Determinado daw kitang makikabtang nin lubos sa paggibo nin disipulo? Tanganing magibo ini, kita maninigong magbugtak nin personal na mga pasohan. Magigin orog daw kitang mahigos sa pag-ataman nin interes? Taano ta dai magbugtak nin pasohan na makapoon nin bagong pag-adal sa Biblia durante sa bulan nin Abril?
5 Siisay an Puwedeng Magkondukta nin Pag-adal sa Biblia?: An kadaklan na mga parahayag na may dakol na pinaghalean nagkamit kan kagayagayahan nin pagkondukta nin pag-adal sa Biblia sa librong Mabuhay Sagkod Lamang. Huli sa simpleng estilo kaini, maski an mas bagohan na mga parahayag makapakikakabtang sa gibohon na ini. Dugang pa, an kadaklan sa sato inadalan na ini nin personal, kaya pamilyar na kita sa laog kaini. An sarong parahayag na mayo nin inaadalan sa Biblia bago ginamit an librong Mabuhay Sagkod Lamang nagsurat: “Igwa ako nin tolong inaadalan asin ikaapat na puwede nang ponan. Dai ako makapasalamat saindo nin igo sa paggibong pasil konduktahan an mga pag-adal sa Biblia.”
6 An mga hoben man nagkokondukta nin mga pag-adal sa librong Mabuhay Sagkod Lamang. An sarong solteritong tugang iwinawalat an libro sa saiyang tukawan sa eskuwelahan. Ini nagbukas nin dalan para sa nagkapirang pag-adal sa Biblia. An nagkapirang aki nakikiolay sa mga magurang na saindang nakakamidbid sa paglilingkod sa harong-harong na itogot na adalan sa Biblia an saindang mga aki. An satong mga aki nungka na akion pang gayo na magtaram manongod sa panuga ni Jehova na buhay na daing sagkod sa paraiso digdi sa daga.
7 Hoben man o gurang, an saro sa pinakanangongorog na kagayagayahan sa ministeryo na puwedeng makamtan nin siisay man iyo an pagkondukta nin pag-adal sa Biblia sa harong. Kaya logod an lambang saro sa sato mamibi para sa tabang ni Jehova asin aprobetsaran an lambang oportunidad na ipahayag an satong paglaom sa publiko. Gamiton an librong Mabuhay Sagkod Lamang na tabangan an iba na makanood kun paano sinda magkakaigwa nin kabtang sa pag-omaw sa satong Dios, si Jehova.—Sal. 148:12, 13.