Pagpoon nin mga Pag-adal sa Biblia Paagi sa Librong Mabuhay Sagkod Lamang
1 An pagkamoot sa mga tawo maninigong magpahiro sato na magin alisto sa pagdalaw liwat sa mga nagugutom asin napapaha sa katotoohan. (Mat. 5:6) Maninigo niatong kultibaron an ano man na silyab nin interes na puwedeng manompongan niato, kun habo niatong maparong iyan. An pag-andam iyo an liyabe sa kapangganahan.
2 Maninigo na an pasohan niato makapoon nin mga pag-adal sa Biblia. (Mat. 28:20) An enot na mga kopya kan librong Mabuhay Sagkod Lamang iiniba an introduksion na mga komentong ini: “Tunay nanggad na ini sarong ekselenteng libro na magagamit sa pakipag-adal sa gabos, hoben o gurang, ano man an saindang grado nin edukasyon.” An paagi kaiyan ginigibong mas pasil an pagkondukta nin mga pag-adal, na pinangyayari pati an mas bagohan na mga parahayag na magkaigwa nin kabtang.
3 Paano Kita Makakapoon nin mga Pag-adal?: Kun kita bumalik, marahay na pag-olayan an hapot na sinambit kan enot niatong pagdalaw. Tibaad pinag-olayan nindo an kamugtakan kan mga gadan, na iwinalat an hapot na, “Ano an paglaom kan gadan nang mga namomotan niato?” Ipaliwanag na an pagkabuhay liwat sarong paglaom na marigon an pundasyon; isinurat kan Biblia an kadakoldakol na halimbawa nin pagbuhay liwat na nangyari na. Repasohon an mga ilustrasyon sa pahina 167-9. Dangan pag-olayan an sinasabi sa parapo 1 asin 2 sa pahina 166.
4 Puwedeng nakaolay nindo an sarong magurang na nahahadit dapit sa mga problema sa pagpadakula sa mga aki. Puwede kamong magsabi nin arog kaini:
◼ “Gabos na magurang gusto kan pinakamarahay para sa saindang mga aki. Igwa an Biblia nin instruksion na makakatabang sa mga magurang na sanayon an saindang mga aki na magkaigwa nin nakakakontentong buhay. Sa dahelan na iyan, irinirekomendar niamo na iribang pag-adalan kan mga pamilya an Biblia. [Buksan an parapo 23 sa pahina 246.] An nakakamtan na kaaraman makapagtatao nin daing katapusan na mga bendisyon sa bilog na pamilya!” Basahon an Juan 17:3. Alokan na madalaw liwat asin ipaheling sa pamilya kun paano poponan an saindang pag-adal.
5 Kun kamo sarong hoben o mas bagohan na parahayag asin ipinakipag-olay nindo an paglaom sa Paraiso kan enot nindong pagsongko, bukas an libro sa pahina 3, magsabi sanang:
◼ “Nanunuga an Biblia na makakalaom an mga naggigibo kan kabotan nin Dios na mabuhay sa sarong kinaban na arog kaini. Tinabangan ako kan librong ini na manodan an kaipuhan kong gibohon tanganing magkamit kan bendisyon na iyan. Boot kong tabangan kamo na masabotan kun paano man nindo magigibo iyan.” Mag-alok na idemonstrar an satong paagi nin pag-adal.
6 Bilang mga disipulo ni Jesus, igwa kita nin obligasyon na tabangan an mga tawo. (Roma 10:14) Igwa kita nin paninimbagan na kultibaron an interes na nanonompongan niato. (Mat. 9:37, 38) Kun ootobon niato sa tamang paagi an asignasyon na ini, an gabos makakapakikabtang sa mga bendisyon na ibubunga.—1 Tim. 4:16.