Magin Maabilidad sa Saindong Ministeryo
1 Sinasabi na an pagkalaenlaen iyo an rikado nin buhay. Sa parate, an laen na introduksion sa sarong tema ginigibo iyan na mas interesante. Totoo ini sa satong ministeryo. Kun kita bakong maingat, an satong mga pag-atubang puwedeng parareho na sana permi. An pag-orootro sa iyo man sanang mga introduksion makawawara nin gana sa sato asin sa mga kagharong. Kaya magin maabilidad sa saindong ministeryo. Paano ini magigibo?
2 Imbes na magsabing, ‘Marahay na aga. Ipinakikipag-olay niamo sa samong kataraed an maogmang bareta kan Kahadean,’ taano ta dai umisip nin mga paagi na liwaton an saindong introduksion? Sa pahina 9-15 kan librong Reasoning, igwa nin mga introduksion sa 18 manlaenlaen na tema. Asin igwa nin duwa, tolo, o labi pang introduksion sa kadaklan na tema.
3 Kun ginagamit nindo an brochure na “An Dios daw Talagang May Pagmakolog sa Sato?,” an introduksion na ini hale sa kabtang na “Life/Happiness” sa pahina 13 makatatabang:
◼ “Nakikipag-olay kami sa mga tawo na nahahadit dapit sa kuwalidad nin buhay ngonyan. Dakol an nag-iisip-isip, Posible daw an tunay na maogmang buhay? An brochure na ini nagtatao nin nakapakokosog na punto-de-vista.” Buksan an brochure sa pahina 25 asin basahon an mga punto sa parapo 15 asin 16.
4 An pirang parahayag nanompongan na an interesanteng pagdolok magagamit paagi sa mga tract.
An hoben na parahayag puwedeng gumamit kan tract na “Maogma sa Buhay Pampamilya” asin magsabing:
◼ “Igwa po akong halipot na mensahe saindo dapit sa kun paano mapagsasararo nin Dios an mga pamilya sa kaogmahan. Boot kong itao saindo ining tract na may titulong Maogma sa Buhay Pampamilya.” Nasa may edad nang parahayag na kaiba kan hoben kun baga makomento pa sia.
5 Kun an kagharong nagpapaheling nin interes, an may edad nang parahayag puwedeng magsabing:
◼ “Ipinaheheling kan Biblia an tamang kabtang kan agom na lalaki, kan agom na babae, asin kan mga aki sa areglo nin pamilya. Huling an Dios iyo an Kagtugdas kan pamilya, dai daw kamo maoyon na sia an pinakanangongorog na makasasabi kun paano maninigong magpunsionar an pamilya? Boot kong madangog an saindong opinyon sa sadol kan Biblia sa mga miembro nin pamilya.” Dangan basahon an Efeso 5:22, 23, 28-31.
6 Kun iinaatubang nindo an librong Creation, taano ta dai itampok an ngapit na yaon sa Kapahayagan 21:3, 4? Dangan basahon an parapo 13 sa pahina 239 kan libro. Hapoton an kagharong kun nagtutubod sia na ootobon nin Dios an mga panugang ini. An halipot na pag-orolay sa mga hula sa Biblia na nangaotob na, siring sa ipinaheheling sa kapitulo 18 kan libro, maninigong magparigon sa pagtubod kan kagharong sa kakayahan nin Dios na bendisyonan an katawohan.
7 An gabos na parabalangibog kan Kahadean boot na makikabtang sa pagpalakop kan teokratikong intereses, na nagtatanom kan banhi nin katotoohan kun saen mapupuwede asin kinukultibar an ipinaheling na interes. Kun nagibo na an satong kabtang, maogma niatong ikalalaom ki Jehova an ano man na pagtalubo sa ngapit.—1 Cor. 3:6.