“Sa Harong ni Jehova Magduruman Kita”
1 Galagang naghimate si David sa imbitasyon na: “Sa harong ni Jehova magduruman kita.” (Sal. 122:1) An “harong” ni Jehova, na irinepresentar kan templo, iyo an lugar nin pagtiripon para sa mga igwa nin pagmawot na sumamba sa tunay na Dios. Iyan an santuaryo nin katiwasayan asin katoninongan. Ngonyan, an Kristianong kongregasyon sa bilog na kinaban “harong” nin Dios, “harigi asin tukod kan katotoohan.” (1 Tim. 3:15) An gabos na probisyon para sa kaligtasan itinatao paagi sa pinakapaagihan na ini. Sa dahelan na iyan, “an gabos na nasyon maturukad pasiring dian” kun mawot nindang magkamit kan mga bendisyon na ipinanuga sa pamamahala kan Kahadean nin Dios.—Isa. 2:2.
2 An “harong” na ini binibilog nin labi sa 69,000 na kongregasyon sa 229 nasyon. Bukas an pinto kan mga Kingdom Hall sa bilog na kinaban, na may labi sa apat na milyon na maigot na trabahador na nagpapaabot kan imbitasyon na: “Madia!” . . . An siisay man na boot kumua kan tubig nin buhay na daing bayad.” (Kap. 22:17) Kadakol kan nakadangog kan mensaheng ini asin naghimate na may pag-apresyar. An iba napahiro na pero dai pa minaduman sa harong ni Jehova paagi sa pakiasosyar kaiba kan Kristianong kongregasyon. An mga siring igwa nin “espirituwal na pangangaipo” na puwedeng mapanigoan nin mga probisyon na makukua sana sa kongregasyon. (Mat. 5:3) Kita nabubuhay sa masakit na mga panahon, na marikas nang nagdadangadang an katapusan kan palakaw na ini. An indiperente asin nag-aalangan na ugale puwedeng magresulta sa kapahamakan. Apurado na an mga tawo maghingoa na “rumani . . . sa Dios” paagi sa orog pang pagrani sa saiyang organisasyon. (Sant. 4:8) Paano daw niato sinda matatabangan?
3 Darahon an Interes Pasiring sa Organisasyon: Poon sa enot niatong pagdalaw sa mga interesado, maninigo niatong darahon an saindang atension sa organisasyon. Mantang tibaad kaya niato mismo na hanapon an mga kasuratan asin ipaliwanag an pundamental na mga doktrina, bakong kita an ginigikanan kan siring na kaaraman. An gabos na bagay na nanodan niato naggikan sa organisasyon, na ipinaagi sa grupong oripon na nagtatao nin “kakanon sa igong panahon.” (Mat. 24:45-47) Sa pagpopoon, kinakaipuhan na marealisar nin mga bagohan na orog pa an kalabot sa dalisay na pagsamba kisa sa sato o minsan sa lokal na kongregasyon; igwa nin organisado, teokratiko, pambilog na kinaban na sosyedad na naghihiro sa irarom kan paggiya ni Jehova.
4 An paggiya na inaako niato naggigikan ki Jehova, na nanuga na gigiyahan asin totokdoan kita. (Sal. 32:8; Isa. 54:13) Pinalalakop an pagtotokdong ini pangenot na paagi sa satong babasahon. Kun matatabangan niato an mga interesado na makapatalubo nin halangkaw na pagpahalaga para sa babasahon, na minimidbid iyan bilang gikanan nin nagliligtas-buhay na instruksion, mas posibleng basahon ninda asin iaplikar an mensahe kaiyan kisa iapon iyan tolos-tolos. Maninigong permi niatong iatubang asin gamiton an babasahon na ini sa paagi na nakapatatalubo nin paggalang para dian. Ini nagtotokdo sa mga bagohan na pahalagahan an organisasyon asin maglaom sa mga probisyon kaiyan.
5 Paaramon an mga interesado na igwa nin sentrong lugar nin pagtiripon sa komunidad kun saen regular na itinatao an pagtotokdo. Itao sainda an adres kan Kingdom Hall asin an mga oras nin pagtiripon. Ipaliwanag an mga pagkakalaen kan satong mga pagtiripon asin kan relihiyosong mga pagtiripon na tibaad inatenderan na ninda kan enot. Imbitado an lambang saro; mayo nin bayad o personal na mga pangongolekta para sa pondo. Mientras na an iinasignar na mga ministro nangengenot sa mga programa, an lambang saro igwa nin oportunidad na makikabtang paagi sa pagtao nin mga komento asin pakikabtang sa mga parte kan programa. Imbitado an mga pamilya; kabale an mga aki sa satong mga pag-orolay sa Biblia. An satong mga ministro dai nagsusulot nin espesyal na panluwas na mga gubing o mga pansulot. Dinekoraran nin simple an Kingdom Hall asin mayo nin mga kandila, estatuwa, o mga idolo. An mga nag-aatender enot sa gabos mga nag-iistar sa lokal na pagtaraed.
6 Padagos na Giyahan an Interes kan mga Inaadalan sa Biblia: An pangenot na katuyohan nin pag-adal sa Biblia iyo na itokdo an katotoohan kan Tataramon nin Dios. Maninigo man na itogdok kaiyan sa inaadalan an pag-apresyar para sa organisasyon ni Jehova asin ipasabot sa saiya an mahalagang pangangaipo na magin kabtang kaiyan. An dakulang trabaho na ginibo ni Jesus asin kan saiyang mga disipulo kan enot na siglo nakaakit sa mga odok an boot asin sinararo sinda para sa gibohon sa irarom nin sentral na namamahalang grupo. Sa mga komunidad na marahay an pag-ako, binilog an mga kongregasyon tanganing magtao nin regular na pagsasanay asin pagtotokdo. An mga asosyado napakokosog sa espirituwal, na nakatatabang sainda na tagalan an mga panahon nin kasakitan. (Heb. 10:24, 25; 1 Ped. 5:8-10) Sa satong aldaw katuyohan ni Jehova “na tiponon giraray an gabos dian ki Cristo.” (Efe. 1:9, 10) Bilang resulta, igwa kita nin pambilog na kinaban na “kasararoan nin mga tugang.”—1 Ped. 2:17.
7 An semanal na pag-adal sa Biblia maninigong kaiba an pagtotokdo na matabang sa mga inaadalan na apresyaron an organisasyon asin aprobetsaran an mga probisyon para sa saindang kaligtasan. Magkaigwa nin nagkapirang minuto kada semana tanganing iestorya o sabihon an nagkapirang bagay dapit sa organisasyon asin kun paano iyan nagpupunsionar. Makanonompong kamo nin nakatatabang na mapag-oolayan na mga punto sa Abril 1, 1985 na Torrengbantayan (sa Ingles, Nobyembre 1, 1984). An mga brochure na Jehovah’s Witnesses in the Twentieth Century asin An mga Saksi ni Jehova—Sararong Nag-ootob sa Kabotan nin Dios sa Bilog na Kinaban naglalaman nin mayor na mga kabtang kan organisasyon asin kun paano kita puwedeng makinabang sa mga iyan. An pag-areglo para sa mga inaadalan sa Biblia na dalanon an video na Jehovah’s Witnesses—The Organization Behind the Name totogotan sindang maheling mismo kun ano an ginigibo kaiyan. An piniling mga bareta asin eksperyensia sa Yearbook ikapaheheling an kapangganahan kan gibohon sa mga nasyon asin kultura apuwera sa satong sadiring nasyon. Puwede man na gamiton an ibang publikasyon. Sa laog nin sarong peryodo nin panahon, padagos na ipaliwanag an siring na mga bagay sa kun taano kita ta naghaharongharong, an katuyohan kan satong mga pagtiripon, kun paano niato sinusuportaran sa pinansial an satong gibohon, asin an pambilog na kinaban na sakop kan satong aktibidad.
8 An pakimidbidan sa iba pang Saksi puwedeng magkaigwa nin nakapupukaw na epekto sa mga bagohan, na pinahihiwas an saindang ideya manongod sa kongregasyon. Tanganing magibo iyan, imbitaran an iba pang parahayag na umiba sa pag-adal sa panapanahon. An saro sa kongregasyon na igwa nin kaparehong pinaghalean o kaparehong mga interes tibaad makadugang nin bagong sokol sa pakamansay kan saindong inaadalan. Tibaad puwede kamong ibanan nin sarong magurang tangani sanang makamidbidan sia. An pag-areglo para sa paraataman sa sirkito o sa saiyang agom na dumalaw sa inaadalan puwedeng magin tunay na bendisyon. Kun igwa nin mga Saksi na nag-iistar sa harani, an pagpamidbid sa sainda sa inaadalan sa Biblia puwedeng magtao nin dagdag na pagpakosog para sa inaadalan na umatender sa mga pagtiripon sa kongregasyon.
9 Dagkahon an mga Bagohan na Umatender sa mga Pagtiripon: An mga bagohan nagkakaipo na marealisar kun gurano kaimportante na umatender sa mga pagtiripon. Probaran na pukawon an saindang interes. Itokdo an mga artikulo na pag-oolayan sa Pag-adal sa Torrengbantayan. Sambiton an mga titulo kan masunod na mga pahayag-publiko. Isaysay an mga tampok kan materyal na pag-oolayan sa Teokratikong Paadalan sa Pagmiministro asin sa Pag-adal sa Libro kan Kongregasyon. Ipahayag an sadiri nindong mga saboot dapit sa saindong nanodan sa mga pagtiripon na ini asin kun taano ta namamatean nindo an pangangaipo na umatender. Kun kamo may kakayahan, mag-alok nin transportasyon. An pag-apod sa telepono bago kan pagtiripon tibaad magtao nin dugang na pagpakosog na umatender.
10 Kun an inaadalan sa Biblia umatender sa pagtiripon, ipamate na sia inaako. Ipamidbid sia sa iba, pati sa mga magurang. Kun maatender sia nin pahayag-publiko, ipamidbid sia sa espiker. Ipaheling saiya an bilog na Kingdom Hall. Ipaliwanag an katuyohan kan mga counter nin literatura asin magasin, mga kahon nin kontribusyon, libreriya, asin taonan na teksto. Ipaaram saiya na bako sanang harong nin pagsamba an hall kundi ini sentro man kun saen an paghuhulit inoorganisar sa lokal.
11 Ipaliwanag kun paano ginigibo an satong mga pagtiripon. Ipaheling sa inaadalan an ginagamit niatong mga publikasyon. Idoon na an Biblia an pinakapangenot niatong librong pinag-aadalan. An kada saro puwedeng makikabtang, kaiba an sadit na mga aki. Ipaliwanag na an gabos na musika asin liriko sa satong songbook kinompuwesto kan mga Saksi ni Jehova tanganing gamiton sa satong pagsamba. Apodan an atension sa laen-laen na pinaghalean kan mga nag-aatender. Gumibo nin positibong mga komento manongod sa espiritu nin pagigin makikatood asin mapagpadagos. An maboot, sinserong interes na ini puwedeng saro sa pinakamakosog na mga dahelan na pahiroon an inaadalan na umatender liwat.
12 Kun Taano an Iba ta Nag-aalangan: Sa parate, sa ibong nin gabos na ginigibo nindo, an iba nag-aalangan na dumolok nin orog pa sa organisasyon. Dai tolos sumuko. Probaran na ibugtak an saindong sadiri sa saindang kamugtakan. Sagkod sa panahon na ini, posibleng dai pa ninda talagang namamatean an pangangaipo na umatender sa relihiyosong mga pagtiripon apuwera sa espesyal na mga okasyon. Tibaad ginigipit sinda kan mga miembro kan pamilya o dayupot na mga katood. Tibaad makamate sinda na tinatakot nin mga kataed na nagtataram nin mga pananatsar. Asin siyempre, tibaad mapairarom sinda sa laen-laen na nakalilingling na konektado sa sosyal asin pag-aling-aling na mga aktibidad. Tibaad mansayon ninda ini bilang dai mapanggaganahan na mga olang; nangangaipong tabangan nindo sinda na maheling an mga bagay sa tamang pakamansay asin “makasierto sa orog na mahalagang mga bagay.”—Fil. 1:10.
13 Magtao nin Makakasuratan na mga dahelan tanganing makapagmaigot. Idoon na kita gabos apuradong kinakaipuhan an pagdagka asin espirituwal na pagpakosog na inaako niato sa satong iribang pakiaasosyar. (Roma 1:11, 12) Ipinaliwanag ni Jesus na an pag-olang kan pamilya bakong balidong rason na mag-alangan. (Mat. 10:34-39) Dinagka kita ni Pablo na dai masopog na ipamidbid sa publiko an satong sadiri bilang mga disipulo ni Jesus. (2 Tim. 1:8, 12-14) An personal na mga aktibidad asin kaolangan dapat na kontrolon; ta kun dai, iyan nagigin siod. (Luc. 21:34-36) An mga nagpapahalaga sa bendisyon ni Jehova dapat na magin bilog na kalag, nungkang napipiritan. (Col. 3:23, 24) An pagtanom nin pag-apresyar para sa siring na mga prinsipyo sa Biblia puwedeng magbukas nin dalan para sainda na mag-oswag sa espirituwal.
14 Bukas an mga Pinto: An harong ni Jehova nin tunay na pagsamba pinahalangkaw kisa sa gabos na iba pa. An imbitasyon ipinaaabot sa 229 nasyon sa bilog na kinaban: “Madia, . . . magtukad kita sa bukid ni Jehova, . . . asin totokdoan nia kita dapit sa saiyang mga dalan, asin kita maglalakaw sa saiyang mga dana.” (Isa. 2:3) An positibong paghimate kan mga bagohan puwedeng makaligtas sa saindang buhay. An pagdara kan saindang interes sa organisasyon ni Jehova saro sa pinakamarahay na mga paagi na sinda matabangan niato.