Paggiya sa mga Inaadalan sa Biblia Pasiring sa Organisasyon ni Jehova
1 Kaipuhan na masabotan nin mga inaadalan sa Biblia na an saindang pag-ayon sa organisasyon ni Jehova kaipuhan sa saindang kaligtasan. (Kap. 7:9, 10, 15) Kun siring, maninigo na ponan niatong giyahan sinda pasiring sa organisasyon oras na maestablisar an pag-adal sa Biblia.
2 Tabangan an mga inaadalan nindo sa Biblia na mamidbid an daganon na organisasyon. Arog kan enot na siglo, an gabos sa banwaan ni Jehova miembro nin mga kongregasyon na kompuwesto nin kamagurangan, ministeryal na mga lingkod, asin parahayag. An mga miembro naoogmang umatender sa limang pagtiripon serosemana. May mga asamblea asin kombension na itinatalaan sa laog kan taon. Igwa man nin mga payunir, misyonero, asin nagbibiyaheng mga paraataman, saka Namamahalang Grupo na naggigiya sa lakop sa kinaban na gibohon. Paano matatabangan an saindong mga inaadalan sa Biblia na masabotan na an estruktura kan organisasyon basado sa Biblia?
PAGGAMIT KAN PULYETONG NAG-OOTOB SA KABOTAN NIN DIOS
3 An pulyetong ini makatatabang saindo na progresibong ipamidbid sa mga inaadalan sa Biblia an organisasyon. An marahay na paagi nin pagpoon iyo an pagsaysay kun ano an nangyayari sa Kingdom Hall. Bago imbitaran sa enot na pangyayari an inaadalan sa pahayag-publiko, repasohon an impormasyon sa pahina 14 asin 15 kan pulyeto. Ipaheling saiya an mga retrato asin iladawan an lugar asin itsura kan saindong lokal na Kingdom Hall.
4 Kun ipaisi an pagsongko kan paraataman sa sirkito, ipakipag-olay sa saindong inaadalan an pahina 20 asin 21. Gamiton an mga hapot sa poro kan pahina 21. Pag-olayan an Makakasuratan na pinaghalean kan satong presenteng areglo paagi sa paggamit sa enot na parapo sa pahina 20.
5 Siring man, bago an saindong pandistritong kombension, pansirkitong asamblea, o espesyal na aldaw nin asamblea, pag-olayan an napublikar sa pahina 19. Idoon an pagigin internasyonal kaiyan arog kan ipinaheheling kan mga retrato sa pahina 18. Sa pagkomento nindo sa retrato na nagpapaheling kan pagluwas nin bagong publikasyon, puwede nindo siang andamon para sa dugang pang orolay sa pahina 24 asin 25. Sa pagpaliwanag kan pagpapayunir, pag-olayan an mga punto sa pahina 22 asin 23.
MAKIBAGAY SA PANGANGAIPO
6 Arog kan maheheling nindo, dai kaipuhan na pumoon sa kapinonan kan pulyetong Nag-ootob sa Kabotan nin Dios. Imbes, sa paglataw kan oportunidad asin pangangaipo, pag-olayan an espisipikong mga punto hale sa pulyeto na makatatabang sa inaadalan na apresyaron an organisasyon ni Jehova asin makadadagka saiya na makiasosyar sa lokal na kongregasyon.
7 An pagtaram na may marigon na pagtubod kun ipinakikipag-olay an mga bagay na ini magwawalat nin parasiyempreng impresyon sa saindong inaadalan. Magin malaad sa espiritu. (Gibo 18:25) Saro pa, seguradohon na kamo, “na nagtotokdo sa iba,” magtao nin marahay na halimbawa sa pagpaheling nin apresasyon sa organisasyon ni Jehova. (Roma 2:21) Sa paggibo kaiyan, tibaad matabangan nindo an iba na umayon sa sarong aripompon na ginigiyahan ni Jesus pasiring sa buhay na daing katapusan.