“Iyo Ini an Dalan”
1 An Isaias 30:21 nagsasabi: “Asin an saimong mga talinga makakadangog nin tataramon sa likod mo na nagsasabi: ‘Iyo ini an dalan. Maglakaw kamo dian, banwaan.’” An “tataramon sa likod mo” tingog ni Jehova na nagtataram paagi sa saiyang Tataramon asin organisasyon. Kinukuyog daw nindo an “tataramon” na iyan, asin tinatabangan daw nindo an iba na kumuyog dian?—Sant. 4:17.
2 An mga inaadalan niato kaipuhan na makasabot na si Jehova may organisasyon asin mapahiro na magkooperar dian. (Roma 12:5) Ano an magigibo niato tanganing ikadoon an kabtang kan organisasyon sa saindang buhay?
GAMITON SA MARAHAY AN PULYETO
3 An pulyetong An mga Saksi ni Jehova—Sararong Nag-ootob sa Kabotan nin Dios sa Bilog na Kinaban puwedeng makatabang na gayo sa paggiya sa mga inaadalan sa Biblia sa organisasyon ni Jehova. Ginagamit kaiyan nin epektibo an Kasuratan, mga retrato, asin mga hapot sa repaso. Kapakipakinabang an paggamit nin mga dies minutos pagkatapos kan kada pag-adal sa pag-oolay sa impormasyon hale sa pulyeto.
4 An inaadalan maninigong sadolon na patienot na repasohon an kabtang na pag-oolayan nindo. Tibaad puwede nindong limitaran sa saro o duwang hapot an saindong pag-oolay. Halimbawa, kun pinag-oolayan an “Tinitipon Asin Sinasangkapan ni Jehova an Saiyang Banwaan Para sa Gibohon,” puwede nindong gamiton an bilog na panahon sa ikatolong hapot sa pahina 11.
5 Gamiton sa marahay an mga retrato sa “Mga Kongregasyon Para sa Pagpakosog sa Pagkamoot Asin Pagkasararo,” poon sa pahina 12. Taano ta dai ini gamiton sa pagpaliwanag kan pundamental na mga paninimbagan nin kamagurangan? Paagi kaini mas mapapasilan an inaadalan na dumolok sa kamagurangan kun nagkakaproblema.
6 Sa pagrepaso sa mga pagtiripon, saro sana an pag-olayan kada semana. Ini magigibo kun pinag-oolayan an simbag sa hapot 2 sa artikulong “Mga Pagtiripon Para sa Pagsadol nin Pagkamoot Asin Marahay na mga Gibo.” Ipaheling sa inaadalan kun paano mag-aandam para sa Pag-adal sa Libro kan Kongregasyon.
GIBOHON NA SIMPLE
7 Arog kan sabi nin sarong tugang: “An maninigong pagmaigotan pagkasimple. Mga duwa sanang teksto, halipot na pag-oolay sa pangangaipo na magin presente sa mga pagtiripon, asin matubod ka?—iyan epektibo!” An saro pang tugang nagsabi: “Sa sakuyang pambukas asin pantapos na pamibi, permi kong nasasambitan an organisasyon ni Jehova.”
8 Paagi sa regular na paggamit sa pulyetong ini, giyahan niato an mga inaadalan sa organisasyon ni Jehova asin umiba ki Jehova sa pagsabi, “Iyo ini an dalan.”