Paggiya sa mga Estudyante Pasiring sa Organisasyon na Nasa Likod kan Satong Ngaran
1 “Iyan mensahe na itinataram sa labing 200 na lenguahe. Iyan mensahe na nadadangog sa labing 210 na nasyon. Iyan mensahe na personal na dinadara saen man manompongan an mga tawo. Iyan gabos kabtang kan pinakadakulang kampanya nin paghuhulit na napag-araman kasuarin man kan kinaban, mensahe na nakapagpapasaro sa minilyon sa bilog na daga. Inorganisar an Mga Saksi ni Jehova tangani na magibo an trabahong ini sa laog nin labi nang sanggatos na taon!”
2 Siring kaiyan an pagpopoon kan pagsaysay kan video na Jehovah’s Witnesses—The Organization Behind the Name. Nagpapadagos iyan sa pagsimbag kan mga hapot na: Sairisay man nanggad an Mga Saksi ni Jehova? Paano inoorganisar an saindang aktibidad? Pinangengenotan? Ginagastosan? Itinatadom kaiyan sa mga nagdadalan an katunayan na an “Mga Saksi ni Jehova sa bilog na kinaban sinanay bilang sarong organisasyon tangani na tabangan an saindang mga kataed na parigonon an pagtubod sa Biblia,” asin ineenkaminar sinda kaiyan na helingon ninda mismo an organisasyon na nasa likod kan satong ngaran. Pakadalan kaining video, an sarong babae na nag-aadal napahibi sa kagayagayahan asin apresasyon patin nagsabi: “Paano na dai maheheling nin siisay man na ini an organisasyon kan tunay na Dios, si Jehova?”—Ikomparar an 1 Corinto 14:24, 25.
3 An saro pang babae nakapag-adal na sa Biblia sa laog nin haloy na panahon, alagad ta dai nia maako an katunayan na an Trinidad sarong falsong doktrina. Dangan ipinaheling sa sainda mag-agom an satong video. Naghanga sindang marhay sa presentasyon asin dinalan iyan nin duwang beses kan banggi man sanang idto. Kan suminunod nindang pag-adal, ipinahayag kan agom na babae an saiyang pagmawot na magin Saksi. Sinabi nia na pinagparatawan nia nin atension an saiyang paniniwala sa Trinidad asin dai siniyasat an satong organisasyon patin an mga tawo na yaon dian. Paagi sa video narealisar nia na nanompongan na nia an tunay na organisasyon nin Dios. Gusto na niang pumoon tolos-tolos sa paghuhulit sa harong-harong. Pakapaliwanagan sa saiya kun ano an kinakaipuhan na mga lakdang tangani na magin dai pa bautisadong parahayag, sia nagsabi: “Magmasibot kita dian.” Nagdimitir sia sa saiyang iglesia, nagpoon nang maglingkod sa langtad, asin nagin matibay sa pagpahimutik kan Trinidad.
4 Napatunayan nang marhay na mas nag-ooswag sa espirituwal asin mas marikas na nagtatalubo pasiring sa pagkamaygurang an mga estudyante sa Biblia kun namimidbid ninda an organisasyon ni Jehova asin nakikiasosyar dian. Makahulogan nanggad, kan mabautismohan an 3,000 kan Pentecostes, “sinda nagpadagos sa pagdusay kan saindang sadiri sa katokdoan kan mga apostol asin sa pakikabtang sa lambang saro.” (Gibo 2:42, nota sa ibaba) Mahalagang marhay na tabangan niato an mga estudyante na gumibo man kaiyan ngonyan. Paano kita makatatabang?
5 Isaabaga an Paninimbagan: Dapat na marealisar kan lambang paragibo nin disipulo na paninimbagan niang giyahan an estudyante sa Biblia pasiring sa organisasyon nin Dios. (1 Tim. 4:16) An kada sesyon nin pag-adal maninigong mansayon na sarong tangga pasiring sa maogmang aldaw na sisimbolisaran kan bagohan an saiyang pagdusay ki Jehova paagi sa bautismo sa tubig. An saro sa mga ihahapot sa saiya durante kan seremonya sa bautismo iyo an: “Nasasabotan mo daw na an saimong pagdusay asin bautismo nagpapamidbid sa saimo bilang saro sa Mga Saksi ni Jehova na asosyado sa organisasyon nin Dios na ginigiyahan kan espiritu?” Huli kaini, mahalaga na marealisar nia na dai sia makapaglilingkod sa Dios kun dai sia aktibong nakikiasosyar sa tunay na Kristianong kongregasyon.—Mat. 24:45-47; Juan 6:68; 2 Cor. 5:20.
6 Padagos na tokdoan an estudyante manongod sa lokal na kongregasyon asin sa internasyonal na organisasyon na nasa likod kan Mga Saksi ni Jehova. Gibohon ini sa kada sesyon nin pag-adal sa Biblia, na pinoponan sa enot na pag-adal. Sa kapinonan pa sana, imbitaran na an estudyante sa mga pagtiripon, asin padagos siang imbitaran.—Kap. 22:17.
7 Gamiton an Itinataong mga Kasangkapan: An satong pinakamarahay na mga publikasyon na magagamit sa pagkondukta nin mga pag-adal sa Biblia sa harong iyo an brosyur na Ano an Kahagadan sa Sato nin Dios? asin an librong Kaaraman na Minagiya Pasiring sa Buhay na Daing Katapusan. Iyan kapwa nagtatampok kan pangangaipo na makiasosyar sa kongregasyon. An katapusan kan leksion 5 sa brosyur na Kahagadan nagsasabi: “Kaipuhan na padagos kamong mag-adal manongod ki Jehova asin kumuyog sa saiyang mga kahagadan. An pag-atender sa mga pagtiripon sa lokal na Kingdom Hall kan Mga Saksi ni Jehova makatatabang sa saindo na magibo iyan.” Paorootrong ineenkaminar kan librong Kaaraman an estudyante na makiasosyar sa mga pagtiripon. An kapitulo 5, parapo 22, nagpapaabot kan imbitasyon na ini: “[An] Mga Saksi ni Jehova . . . maogma . . . kamong dinadagka na umiba sa sainda sa pagsamba sa Dios ‘sa espiritu asin katotoohan.’ (Juan 4:24)” An kapitulo 12, parapo 16, nagsasabi: “Mantang ipinapadagos nindo an pag-adal na ini asin inuugale nindo an pag-atender sa mga pagtiripon kan Mga Saksi ni Jehova, an saindong pagtubod orog pang maparirigon.” An kapitulo 16, parapo 20, nagsasabi: “Ugaleon nindo na umatender sa mga pagtiripon kan Mga Saksi ni Jehova.” Idinugang pa kaiyan: “Tatabangan kamo kaini na masabotan dangan iaplikar an kaaraman nin Dios sa saindong buhay asin matao ini saindo nin kaogmahan. An pagigin kabtang kan pambilog na kinaban na Kristianong asosasyon nin magturugang matabang sa saindo na magdanay na harani ki Jehova.” An kapitulo 17 maingat na nagpapaliwanag kun paano an saro nakanonompong nin tunay na katiwasayan sa tahaw kan banwaan nin Dios. Mantang nakikipag-adal kita sa iba, paninimbagan niatong idoon an mga kabtang na ini kan materyal.
8 An brosyur na An mga Saksi ni Jehova—Sararong Nag-ootob sa Kabotan nin Dios sa Bilog na Kinaban sarong magayon na kasangkapan na prinodusir tangani na magin pamilyar an mga indibiduwal sa kaiyoiyohing naheheling na organisasyon na ginagamit ni Jehova ngonyan sa paggibo kan saiyang kabotan. An detalyadong impormasyon na yaon dian manongod sa satong ministeryo, mga pagtiripon, asin organisasyon paririgonon an boot kan nagbabasa na makiiba sa sato sa pagsamba sa Dios. Oras na maestablisar an pag-adal sa Biblia, irinerekomendar na tawan niato an estudyante nin sarong kopya kan brosyur na ini tangani na mabasa nia mismo. Dai na kaipuhan na ipakipag-adal iyan sa saiya siring kan ginibo kan nakaagi.
9 An nagkapira sa mga video na prinodusir kan Sosyedad ekselenteng mga kasangkapan sa paggiya sa mga estudyante pasiring sa organisasyon na nasa likod kan satong ngaran. Ini an: (1) The New World Society in Action, an repaso kan 1954 pelikula na nagrekord kan husay, epektibo, asin mamomoton na espiritu na paagi kaiyan nagpupunsionar an organisasyon ni Jehova; (2) United by Divine Teaching, na nagsisiyasat kan matoninong na pagkasararo na ipinaheling sa satong internasyonal na mga kombension sa Sirangan na Europa, Amerika del Sur, Aprika, asin Asia; (3) To the Ends of the Earth, na nagtanda kan ika-50 anibersaryo kan Paadalan sa Biblia kan Watchtower sa Gilead asin ipinaheheling an nagin epekto kan mga misyonero sa pambilog na kinaban na paghuhulit; (4) Jehovah’s Witnesses Stand Firm Against Nazi Assault, na nagsasaysay kan nakapupukaw sa boot na estorya manongod sa kapusoan asin kapangganahan kan mga Saksi sa atubangan kan maringis na paglamag sa sainda ni Hitler; asin, siempre, (5) Jehovah’s Witnesses—The Organization Behind the Name.
10 Magbugtak nin Progresibong mga Pasohan Para sa mga Pagtiripon: Kaipuhan na ipaliwanag sa mga estudyante na pareho niatong kaipuhan an pribadong pagtotokdo sa pag-adal sa Biblia sa harong asin an mga pag-orolay sa paadalan na itinatao sa mga pagtiripon sa kongregasyon. (Juan 6:45) An sarong bagohan kaipuhan na parehong umoswag sa saiyang pakasabot kapwa manongod sa Kasuratan asin sa organisasyon. Tangani na magibo iyan, mayo nin kasalihid an pag-atender sa mga pagtiripon. (Heb. 10:23-25) Ponan na tolos-tolos na imbitaran sia sa mga pagtiripon sa kongregasyon. May mga bagong interesado na nagpoon na umatender sa mga pagtiripon dawa bago pa magkaigwa nin regular na pag-adal sa Biblia sa harong. Siempre, boot niato mismong magtao nin tamang halimbawa paagi sa pagigin regular sa pag-atender.—Luc. 6:40; Fil. 3:17.
11 Ihiras an igong impormasyon dapit sa mga pagtiripon asin kun paano iyan kinokonduktahan tangani na magin komportable an estudyante kun nag-aatender sa kaenot-enote niang pagtiripon. Mantang may mga tawo na dai nanggad napapamugtak an boot kun minaduman sa bagong mga lugar sa kaenot-enote, tibaad magin kapakipakinabang na ibanan an estudyante pasiring sa Kingdom Hall kun maatender sia sa kaenot-enote niang pagtiripon. Magigin mas pamugtak an boot nia kun kaiba nindo sia mantang nakakamidbid nia an mga miembro kan kongregasyon. Orog sa gabos, magin marahay na kag-imbitar sa saindong bisita, na ipinamamate sa saiya na sia inaako asin komportable.—Mat. 7:12; Fil. 2:1-4.
12 Enkaminaron an estudyante na umatender nin espesyal na aldaw nin asamblea, pansirkitong asamblea, o pandistritong kombension sa kaenot-enoteng oportunidad. Tibaad puede nindo siang ikaiba sa saindong mga areglo sa sasakyan.
13 Itadom an Odok sa Pusong Apresasyon: An Organized to Accomplish Our Ministry, pahina 92, nagpapaliwanag: “Kun an saindo mismong hararom na apresasyon sa organisasyon ni Jehova nababanaag sa saindong pakikipag-olay sa interesadong mga tawo, magigin mas pasil para sa sainda na tumalubo sa pag-apresyar asin pahihiroon sinda na gumibo nin mas dakulang pag-oswag sa pakamidbid ki Jehova.” Perming magtaram nin positibo, nungkang negatibo, dapit sa saindong lokal na kongregasyon. (Sal. 84:10; 133:1, 3b) Sa mga pagpamibi nindo sa pag-adal sa Biblia, sambiton an kongregasyon asin an pangangaipo kan estudyante na makiasosyar dian nin regular.—Efe. 1:15-17.
14 Siertong boot niatong pataluboon kan mga bagohan an odok sa pusong apresasyon sa kawiliwiling pag-iribahan asin espirituwal na katiwasayan na nanonompongan sa tahaw kan banwaan nin Dios. (1 Tim. 3:15; 1 Ped. 2:17; 5:9) Bilang Mga Saksi ni Jehova, gibohon niato an bilog niatong makakaya na giyahan an mga estudyante kan Tataramon nin Dios pasiring sa organisasyon na nasa likod kan satong ngaran.
[Blurb sa pahina 3]
Mas marikas na nag-ooswag sa espirituwal an mga estudyante kun naheheling ninda mismo an organisasyon
[Blurb sa pahina 4]
Dai mag-atraso sa pag-imbitar sa mga estudyante na umatender sa mga pagtiripon